ޕްރެޒިޑެންޓްސް ކަޕްގެ ފުރަތަމަ މެޗުގައި ކްލަބް ވެލެންސިއާ އާއި ކްލަބް އީގަލްސް ކުޅެން ބައްދަލުކުރަން ހަމަޖެހުނު މެޗު ދިމާވި ކަމެއްގެ ސަބަބުން ފަސްކުރަން ޖެހުނުއިރު، އެ މެޗު މި މަހު 24 އަށް އެފްއޭއެމުން ތާވަލުކޮށްފި އެވެ.
ޕްރެޒިޑެންޓްސް ކަޕްގެ ފުރަތަމަ މެޗުގައި މިދިޔަ އާދިއްތަ ދުވަހުގެރޭ ވެލެންސިއާ އާއި އީގަލްސް ކުޅެން އޮތް މެޗު ފަސްކުރީ އެފްއޭއެމްގެ ކޮމްޕެޓިޝަންސް ޑިޕާޓްމަންޓުގެ ހެޑް އިސްމާއިލް ރިޔާޒްގެ ތުއްތު ދަރިފުޅު ނިޔާވުމާ ގުޅިގެން އެވެ. އެ މެޗު އެންމެ ފުރަތަމަ ކުޅެން މަސައްކަތް ކުރީ ރެޔެވެ.
އެކަމަކު، އެފްއޭއެމުން ރޭ ޕްރެޒިޑެންޓްސް ކަޕްގެ ޝެޑިއުލަށް ގެނައި ބަދަލުތަކާ އެކު އާ ޝެޑިއުލް އިއުލާނުކުރިއިރު، ވެލެންސިއާ އާއި އީގަލްސް މެޗު ތާވަލުކޮށްފައި އޮތީ ގްރޫޕް ސްޓޭޖު މެޗުތައް ނިމުމުން ސެމީ ފައިނަލްގެ ކުރިއަށްވާ ގޮތަށް މި މަހުގެ 24 ވަނަ ދުވަހަށެވެ.
ޝެޑިއުލަށް ގެނައި ބަދަލާ އެކު ކުރިން މި މަހު 25 ވަނަ ދުވަހު ކުޅޭ ގޮތަށް އޮތް ސެމީ ފައިނަލް މެޗުތައް މިހާރު ޝެޑިިއުލްކޮށްފައި އޮތީ މި މަހުގެ 27 ވަނަ ދުވަހުގެ ހަވީރާއި ރޭގަނޑު ކުޅޭ ގޮތަށެވެ. އަދި، ކުރިން މި މަހުގެ 29 ވަނަަ ދުވަހުގެރޭ ކުޅެން އޮތް ފައިނަލް މިހާރު ތާވަލުކޮށްފައި އޮތީ މި މަހުގެ 30 ވަނަ ދުވަހު ކުޅޭ ގޮތަށެވެ.
ރިވައިސް ކުރުމަށް ފަހު ނެރުނު ޕްރެޒިޑެންޓްސް ކަޕްގެ ޝެޑިއުލް.
މާލީ މައްސަލަތަކެއްގެ ސަބަބުން ޔުނައިޓެޑް ވިކްޓަރީ (ޔޫވީ) އާއި ކްލަބް ގްރީން ސްޓްރީޓްސް މި ފަހަރުގެ ޕްރެޒިޑެންޓްސް ކަޕްގައި ނުކުޅޭތީ މުބާރާތް ކުރިއަށްދަނީ ހަ ކްލަބްގެ މެދުގަ އެވެ. އެ ހަ ކްލަބް ވަނީ ދެ ގްރޫޕަކަށް ބަހާލައިފަ އެވެ.
ފުރަތަމަ ގްރޫޕްގައި ހިމެނެނީ ވެލެންސިއާ އާއި އީގަލްސް އަދި ސުޕަ ޔުނައިޓެޑް ސްޕޯޓްސް (ސަސް) އެވެ. ސަސް އިން ޕްރެކްޓިސް ފެށީ މިރެ އެވެ. ދެ ވަނަ ގްރޫޕްގައި ހިމެނެނީ މާޒިޔާ ސްޕޯޓްސް އެންޑް ރެކްރިއޭޝަނާއި ޓީސީ ސްޕޯޓްސް ކްލަބް އަދި ބުރު ސްޕޯޓްސް ކްލަބް އެވެ. މިއީ ބުރުން ޕްރެޒިޑެންޓްސް ކަޕްގައި ކުޅޭ ފުރަތަމަ ފަހަރެވެ.
މި ފަހަރުގެ ޕްރެޒިޑެންޓްސް ކަޕްގައި މިހާތަނަށް ކުޅެވުނީ އެންމެ މެޗެކެވެ. އެއީ މާޒިޔާ އާއި ޓީސީ ބައްދަލުކުރި މެޗެވެ. ޓީސީ އަތުން މާޒިޔާ ވަނީ 2-0 އިން މޮޅުވެފަ އެވެ.
