ހުޅަނގު އައްސޭރީގައި އިޒްރޭލަށް ޖާސޫސްކޮށްދިން "ގައްދާރެއް" މަރާލާފައިވާ ކަމަށް ފަލަސްތީނުގެ އަސްކަރީ ގްރޫޕު ލަޔަންސް ޑެންއިން އިއުލާންކޮށްފި އެވެ.
އެ ގްރޫޕުން އާއްމުކުރި ޓެލެގްރާމް ޕޯސްޓެއްގައި އެކަން ޔަގީންކޮށްދިން ނަމަވެސް އިތުރު ތަފްސީލެއް ނުދެ އެވެ. އެއީ އުތުރު ނަބްލޫސް ސިޓީއިން ހިންގާ ގްރޫޕެކެވެ.
ފަލަސްތީނުގެ އިންސާނީ ހައްގުތަކާ ބެހޭ ކޮމިޝަނުން ވެސް ބުނީ ހޮނިހިރު ދުވަހުގެ ރޭގެ ވަގުތެއްގައި "ޖާސޫސްކުރުމުގެ" ތުހުމަތުގައި މީހަކު މަރާލާފައިވާ ކަމަށެވެ.
ނަބްލޫސްއިން ވާހަކަދެއްކި ފަރާތަކުން އޭއެފްޕީއަށް ބުނީ ތުހުމަތު ކުރެވޭ މީހާގެ ގަޔަށް ބަޑި ޖަހައި މަރާލީ އޯލްޑް ސިޓީ ސަރަހައްދުގައި ކަމަށެވެ.
އިޒްރޭލަށް ޖާސޫސްކޮށްދިން ކަމަށް މީހަކު އިއުތިރާފުވާ ވީޑިއޯއެއް ސޯޝަލް މީޑިއާގައި ވަނީ ދައުރުވެފަ އެވެ. ރިޕޯޓުތައް ބުނާ ގޮތުން މަރާލީ ވީޑިއޯއިން ފެނުނު މީހާ އެވެ.
"އަޅުގަނޑުމެންގެ މެސެޖު އަމާޒުކުރަނީ ދީނާއި، އަބުރާއި، ގައުމާއި އަމިއްލަ ނަފުސު ވިއްކާލާ ހުރިހާ ގައްދާރުންނަށް،" އެ ގްރޫޕުން ނެރުނު މެސެޖުގައި ބުންޏެވެ.
ފަލަސްތީނުގެ ހުޅަނގު އައްސޭރިއަށް އިޒްރޭލުން އަތްގަދަކުރީ 1967 ގަ އެވެ. އިޒްރޭލުގެ އަޅުވެތިކަމާ ދެކޮޅަށް ކުރާ މަސައްކަތުގެ ތެރެއިން ލަޔަންސް ޑެން ގްރޫޕް އުފެދުނީ މިދިޔަ އަހަރު އެވެ.
ފާއިތުވި މަސްތަކުގެ ތެރޭގައި އިޒްރޭލުން ވަނީ އެ ގްރޫޕުގެ ގިނަ ބަޔަކު މަރާލައިފަ އެވެ. ހުޅަނގު އައްސޭރީގައި އިޒްރޭލުގެ މީހުންނަށް ދޭ ބައެއް ހަމަލާތަކަށް ޒިންމާ ވަނީ އެ ގްރޫޕުންނެވެ.
މި އަހަރުގެ މިހާތަނަށް އިޒްރޭލާއި ފަލަސްތީނުގެ ހަމަނުޖެހުމުގައި ފަލަސްތީނުގެ 92 މީހުންނާއި، އިޒްރޭލުގެ 18 މީހުންނާއި، ޔޫކްރެއިން މީހަކާއި އިޓަލީ މީހަކު މަރުވެފައިވެ އެވެ.
