އިރާނުގައި ބުރުގާ ނާޅާ އުޅޭ އަންހެނުން ދެނެގަންނަން އާއްމު ތަންތަނުގައި ކެމެރާ ހަރުކުރަން ނިންމާފައިވާ ކަމަށް ފުލުހުން އިއުލާނުކޮށްފި އެވެ.
ކެމެރާ މެދުވެރިކޮށް ދެނެގަންނަ އަންހެނުންގެ ފޯނަށް އިންޒާރުގެ މެސެޖެއް ފޮނުވާނެ އެވެ. އެއީ ބުރުގާ އެޅުން މަޖުބޫރުވާ ގާނޫނު ތަންފީޒު ކުރަން އަޅާ ފިޔަވަޅެއް ކަމަށް ފުލުހުން ބުންޏެވެ.
މިދިޔަ އަހަރުގެ ފަހުކޮޅު އިރާނުގެ މަޝްރަހު ހޫނުވީ ބުރުގާ ނާޅާ އުޅުނު ޒުވާން އަންހެނަކު ފުލުހުންގެ ބަންދުގައި ހުއްޓައި މަރުވި މައްސަލައިގަ އެވެ.
އެ ހާދިސާއަށް ފަހު ބުރުގާ އެޅުން މަޖުބޫރު ކުރުމާ ދެކޮޅަށް އިރާނުގެ ގިނަ އަދަދެއްގެ އަންހެނުން ވަނީ މުޒާހަރާކޮށްފަ އެވެ.
އިރާނުގައި އަންހެނުން ބުރުގާ އެޅުން މަޖުބޫރުވާ ގާނޫނަށް އަމަލުކުރަން ފެށީ 1979 ވަނަ އަހަރު އެވެ. އެ ގާނޫނާ ހިލާފުވެއްޖެ ނަމަ ޖޫރިމަނާ ނުވަތަ ޖަލު ހުކުމެއް ކުރިމަަތިވެދާނެ އެވެ.
އިހްތިޖާޖު ކުރުމުގެ ގޮތުން ބައެއް އަންހެނުން އުޅެނީ ބުރުގާ ނާޅަ އެވެ. އެފަދަ އަންހެނުންނަށް އަމާޒުކޮށް ވަރަށް ގިނައިން ހަމަލާދެ އެވެ.
މިދިޔަ ހަފުތާގައި ބުރުގާ ނާޅައި ތިބި ދެ އަންހެނުންގެ ބޮލަށް ޔޯގަޓު ޖެހި ވީޑިއޯއެއް އާއްމުވި އެވެ. އެ މައްސަލައިގައި ދެ އަންހެނުންނާއި ޔޯގަޓް ޖެހި މީހާ ވެސް ހައްޔަރުކުރި އެވެ.
