ފަލަސްތީނަށް ހަމަޖެހުން ގެނެސް، ފުރިހަމަ އަދި އަވަސް ހައްލެއް ހޯދަން ބުރަކޮށް މަސައްކަތް ކުރާނެ ކަމަށް ޗައިނާއިން ބުނެފި އެވެ.
މެދުއިރުމައްޗަށް ޗައިނާއިން ކަނޑައަޅާފައި ހުންނަ ހާއްސަ މަންދޫބާ ހަވާލަދީ ޗައިނާގެ ފޮރިން މިނިސްޓްރީން ހުކުރު ދުވަހު ބުނީ ފަލަސްތީނުގެ މައްސަލައަށް ދާއިމީ ހައްލެއް މުހިއްމު ކަމަށެވެ.
ފަލަސްތީނާއި ލުބްނާނަށް އިޒްރޭލުން ހަމަލާދޭ މައްސަލައިގައި ޗައިނާއިން ކަންބޮޑުވާ ކަމަށާއި ހުރިހާ ފަޅިއަކުން ވެސް ސުލްހަ އިސްކުރުމަށް ޗައިނާގެ މަންދޫބު ޝާއި ޖުން ގޮވާލެއްވި އެވެ.
އޭނާ ވަކިން ހާއްސަކޮށް އިޒްރޭލަށް ގޮވާލެއްވީ ހަމަޖެހުމަށް ބުރޫއަރާ ކަންކަން ހުއްޓާލައި ހަމަލާ ދިނުން ވަގުތުން ހުއްޓާލުމަށެވެ.
ހުކުރު ދުވަހުގެ މެންދަމުން ފެށިގެން ހެނދުނާ ހަމައަށް އިޒްރޭލުގެ ހަނގުރާމަ މަތީ ބޯޓުތަކުން ދިޔައީ ގާޒާއަށް ބޮން އަޅަމުންނެވެ. އިޒްރޭލުން ބުނީ އެއީ ގާޒާގައި ވެރިކަން ކުރާ ހަމާސްއިން ރޮކެޓު ހަމަލާ ފޮނުވުމުން ރައްދުގައި އެޅި ބޮންތަކެއް ކަމަށެވެ.
އިޒްރޭލުގެ ސިފައިން ބުނީ 50 ޓަނުގެ ބޮން ގާޒާއަށް އެޅި ކަމަށެވެ. އެހެން ނަމަވެސް އެއްވެސް މީހަކަށް އަނިޔާ ނުވާ ކަމަށް ފަލަސްތީނުގެ ހެލްތު މިނިސްޓްރީން ބުންޏެވެ.
