ގުދުސްގައި ހުންނަ އަލް އަގްސާ މިސްކިތުގެ ގޯތިތެރޭގައި ބުދަ ދުވަހު ފަތިސް ވަގުތު ނަމާދަށް ތިބި މީހުންނަށް އިޒްރޭލް ފުލުހުން ދިން ހަމަލާ މުސްލިމް ގައުމުތަކުން ކުށްވެރިކޮށްފި އެވެ.
ފަލަސްތީނުގެ ރެޑް ކްރެސެންޓުން ބުނީ ފަލަސްތީނުގެ ހަތް މީހުންނަށް އަނިޔާވި ކަމަށެވެ. ރެޑް ކްރެސެންޓުގެ ވޮލަންޓިއަރުން މީހުންނަށް އެހީވުމަށް އިޒްރޭލުގެ ސިފައިން ހުރަސްއަޅަމުންދާ ކަމަށް ވެސް ބުންޏެވެ.
"އަހަރެން އިނީ ގޮނޑިއެއްގައި އިށީނދެ ގުރުއާން ކިޔަވަން،" މިސްކިތާ ދުރަށް ދިޔުމަށް ފަހު މުސްކުޅި އަންހެނަކު ރޮއިޓާޒް ނޫހަށް ބުންޏެވެ.
"އެ މީހުން ސްޓަން ގްރެނޭޑް އެއްލީ. އެކަތި ޖެހުނީ އަހަރެންގެ މޭ މަތީގައި،" ނޭވާ ކުރުވެ، ރޮމުން ރޮމުން އެ އަންހެން މީހާ ރޮއިޓާޒް ނޫހަށް ބުންޏެވެ.
އެކަމާ ގުޅިގެން ހުޅަނގު އައްސޭރީގައި ދަނީ މުޒާހަރާ ކުރަމުންނެވެ. އިޒްރޭލް ސިފައިން ބުނީ އެއީ ގާޒާއިން ފޮނުވި ނުވަ ރޮކެޓެއް ރައްދު ދިނުމުގެ ގޮތުން ހިންގި ކަމެއް ކަމަށެވެ.
ފާއިތުވި އަހަރެއްހާ ދުވަހުގެ ތެރޭގައި ހުޅަނގު އައްސޭރި އާއި ގުދުސްގައި އިޒްރޭލުގެ އަނިޔާވެރިކަން ވަނީ އިތުރުވެފަ އެވެ. ކޮންމެ އަހަރަކު ވެސް ރޯދަ މަހު އެކަން އެތައް ގުނައެއް ގޯސްވެ އެވެ.
އިޒްރޭލް ސިފައިން ނެރުނު ބަޔާނެއްގައި ބުނީ މިސްކިތުގެ ގޯތިތެރެއަށް ވަންނަން ޖެހުނީ މާސްކު އަޅައިގެން ތިބި ބަޔަކު ބަޑިބޭހާއި، ގަލާއި، ހިލަ ހިފައިގެން މިސްކިތް ތެރޭގައި ފިލުމުން ކަމަށެވެ.
"ފުލުހުން ވަނުމާ އެކު ގާ އުކައި ބަޑިބޭހުގައި ރޯކުރި،" ފުލުހެއްގެ ފަޔަށް އަނިޔާވި ކަމަށް ފާހަގަކުރަމުން، އިޒްރޭލުގެ ބަޔާނުގައި ބުންޏެވެ.
މީގެ ކުރީ އަހަރުތަކުގައި އަގްސާ މިސްކިތުގައި ހަމަނުޖެހުން ހިނގުމުން ހަނގުރާމައަށް މަގުފަހިވެފައިވެ އެވެ.
ފަލަސްތީނުން އިޒްރޭލުގެ އަމަލު ކުށްވެރިކޮށް ބުނީ އަޅުކަމުގައި ތިބޭ މީހުންނަށް ހަމަލާ ދިނުމަކީ ބޮޑު ޖަރީމާއެއް ކަމަށެވެ.
އުރުދުން އާއި މިސްރުން ވެސް އިޒްރޭލް ކުށްވެރިކޮށް ބަޔާން ނެރުނެވެ. ދާދި ފަހުން އިޒްރޭލާއި ފަލަސްތީނާ ދެމެދު މަޝްވަރާ ބޭއްވުމަށް އެމެރިކާއާ އެކު މެދުވެރިއެއްގެ ގޮތުގައި އުޅުނީ އެ ދެ ގައުމެވެ.
ސައުދީ އަރަބިއްޔާއިން ނެރުނު ބަޔާނެއްގައި އިޒްރޭލުގެ އަމަލުތައް ކުށްވެރިކޮށް ބުނީ އިޒްރޭލުގެ އަމަލުތަކުން ސުލްހައަށް ހުރަސްއެޅެމުންދާ ކަމަށެވެ.
