އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ މައްޗަށް ކުރެވޭ ޖިނާއީ ތުހުމަތުތަކާ ގުޅިގެން ކޯޓުގައި މައްސަލަ ފެށުމުގެ ގޮތުން އެމަނިކުފާނު ރަސްމީކޮށް ހައްޔަރުކޮށްފި އެވެ.
ނިއު ޔޯކްގެ ކޯޓަށް ޓްރަމްޕް ހާޒިރުވީ ފުލުހުންގެ ބެލުމުގެ ދަށުންނެވެ. އަންގާރަ ދުވަހުގެ އަޑުއެހުމުގައި އޮތީ ދައުވާތައް އިއްވުމެވެ.
ކޯޓުގައި އަޑުއެހުން ފަށައި ޕްރޮސެކިއުޓަރުން ޖުމްލަ 34 ދައުވާއެއް އިއްވުމުން، ޓްރަމްޕް ވަނީ އެ ދައުވާތަކަށް އިންކާރު ކުރައްވައިފަ އެވެ.
ޓްރަމްޕްއާ ދެކޮޅަށް ޖިނާއީ ދައުވާ އުފުލަން ނިންމީ އަންހެނަކާ އެކު ބޭއްވި ގުޅުން ސިއްރުކުރަން ފައިސާ ދިން ކަމަށް ތުހުމަތު ކުރާ މައްސަލައިގަ އެވެ.
އުމުރުން 76 އަހަރުގެ ޓްރަމްޕް ތުހުމަތު ދޮގުކުރައްވަ އެވެ. އެމަނިކުފާނަކީ އެމެރިކާގެ ތާރީހުގައި ވެސް ޖިނާއީ ދައުވާއެއް ކުރިމަތިވި ފުރަތަމަ ކުރީގެ ރައީސެވެ.
ޓްރަމްޕްއާ އެކު އޮތް ސިއްރު ގުޅުމުގެ ވާހަކަތައް ކިޔައިދޭން ބޭނުން ކަމަށް ބުނެ، ބަރަހަނާ ފިލްމު ކުޅުމަށް މަޝްހޫރު ސްޓޯމީ ޑެނިއެލްސް ނޫސްތަކަށް ގުޅީ 2016 ވަނަ އަހަރު އެވެ.
އޭނާ ބުނީ އެ ގުޅުން ބޭއްވީ ޓްރަމްޕް އާއި މިހާރުގެ އަނބިކަނބަލުން މެލާނިއާ ކައިވެނި ކުރެއްވި ފަހުން 2006 ވަނަ އަހަރުގައި ކަމަށެވެ.
އެކަމުގެ ހަބަރު ލިބި، ސްޓޯމީ ޑެނިއެލްސްގެ ވާހަކަތައް ހުއްޓުވުމަށް ޓްރަމްޕްގެ ކުރީގެ ވަކީލު މައިކަލް ކޯހެން އޭނާއަށް 130،000 ޑޮލަރު ދިން ކަމަށް ތުހުމަތު ކުރެވެ އެވެ.
އެ އަދަދަށްވާ ފައިސާ ޓްރަމްޕްގެ ފަރާތުން ވަކީލަށް ފޮނުއްވި އެވެ. އެހެން ނަމަވެސް ރަސްމީ ލިޔުންތަކުގައި ބުނީ އެއީ ގާނޫނީ ފީތަކުގެ ގޮތުގައި ދައްކާ ފައިސާ ކަމަށެވެ. ޕްރޮސެކިއުޓަރުން ބުނީ އެއީ ވިޔަފާރި ލިޔުންތައް އޮޅުވާލުން ކަމަށެވެ. އެއީ ނިއު ޔޯކްގައި ޖިނާއީ ކުށެކެވެ.
ޓްރަމްޕް އާއި އެމަނިކުފާނުގެ ސަޕޯޓަރުން ތަކުރާރުކޮށް ވިދާޅުވަނީ ދައުވާ ކުރަން އުޅެނީ ސިޔާސީ ބޭނުމެއްގައި ކަމަށެވެ. މި މައްސަލައިގެ ސަބަބުން 2024 ވަނަ އަހަރުގެ ރިޔާސީ އިންތިހާބަށް އަސަރު ކުރާނެ އެވެ.
އެގޮތުން ރިޔާސީ އިންތިހާބަށް ރިޕަބްލިކަން ޕާޓީގެ ޓިކެޓް ހޯދުމަށް ޓްރަމްޕް ހިންގަވާ ކެމްޕެއިނަށް ވެސް އޭގެ ސަބަބުން ހުރަސް އެޅޭނެ އެވެ. މި ވަގުތު އެ ޕާޓީގެ ކެންޑިޑޭޓުންގެ ތެރެއިން އެންމެ މަގްބޫލުކަން ބޮޑީ ޓްރަމްޕަށެވެ.
އެހެން ނަމަވެސް ޖިނާއީ ކުށެއް ސާބިތުވާ ކެންޑިޑޭޓަކު ކެމްޕެއިން ކުރެއްވުމާއި ރައީސްގެ މަގާމު އަދާކުރެއްވުން އެމެރިކާގެ ގާނޫނުން މަނާނުކުރެ އެވެ. ކެންޑިޑޭޓަކު ޖަލުގައި ހުންނެވި ނަމަވެސް ގާނޫނީ ހުރަހެއް ނެތެވެ.
