ޔޫރަޕްގައި ހަމަލާތައް ރޭވި އިސްލާމިކް ސްޓޭޓް (އައިއެސް) ގެ އިސް މެމްބަރަކު ސީރިއާގައި މަރާލާފައިވާ ކަމަށް އެމެރިކާއިން ބުނެފި އެވެ.
އެމެރިކާގެ ސެންޓްރަލް ކޮމާންޑުން ބުނީ ހާލިދް އައިދް އަހްމަދު އަލް ޖަބޫރީ މަރުވީ ހޯމަ ދުވަހު ކަމަށެވެ. ނަމަވެސް އޭނާ މަރުވި ސީދާ ތަނެއް ހާމައެއް ނުކުރެ އެވެ.
އޭނާއަށް އަމާޒުކޮށް ދިން ހަމަލާގައި އާއްމުންގެ އެއްވެސް މީހަކު މަރުނުވާ ކަމަށާއި އަނިޔާއެއް ވެސް ނުވާ ކަމަށް އެމެރިކާގެ ސެންޓްރަލް ކޮމާންޑުން ބުންޏެވެ.
އެމެޖެންސީ ޓީމުތަކުން ބުނީ ސީރިއާގެ އިދިކޮޅު ފަރާތްތަކުން ކޮންޓްރޯލް ކުރާ ހުޅަނގު އުތުރުގެ ހިސާބެއްގައި ހޯމަ ދުވަހު ދިން ޑްރޯން ހަމަލާއެއްގައި ފިރިހެނަކު މަރުވި ކަމަށެވެ.
ވައިޓް ހެލްމެޓްސް ގްރޫޕުން ބުނީ އިދްލިބް ޕްރޮވިންސްގެ ކިލި އަވަށުގައި ފިރިހެނަކަށް އަމާޒުކޮށް މިސައިލް ފޮނުވީ އެ ހިސާބުގައި އުޅުނު ޑްރޯނެއް ކަމަށެވެ.
"އަޅުގަނޑުމެންގެ ޓީމުތައް އެ ތަނަށް ގޮސް، ފިރިހެން މީހާ ގެންދިޔައީ ބާބް އަލް ހަވާ ހޮސްޕިޓަލަށް. އޭނާ މަރުވީ ފަރުވާދެނިކޮށް."
އެމެރިކާއިން ބުނީ ހާލިދް އަލް ޖަބޫރީގެ މަރާ އެކު އައިއެސްގެ ހަމަލާތައް ރޭވުމުގެ ގާބިލްކަން ވަގުތީ ގޮތުން ވެއްޓޭނެ ކަމަށެވެ. އޭނާއާ ގުޅުން ހުރީ ކޮން ހަމަލާތަކެއް ކަމެއް އެމެރިކާއިން ނުބުނެ އެވެ.
