ހަތަރު އަހަރުގެ މެދުކެނޑުމަކަށް ފަހު އޮފީސް/ކުންފުނިތަކުގެ ވޮލީބޯޅަ މުބާރާތް ބާއްވަން ވޮލީބޯޅަ އެސޯސިއޭޝަން އޮފް މޯލްޑިވްސް (ވީއޭއެމް) އިން ނިންމައިފި އެވެ.
އެ ގޮތުން، 2018 ވަނަ އަހަރުގެ ފަހުން ފުރަތަމަ ފަހަރަށް އިންޓަ ކޮމްޕެނީ/އޮފީސް ވޮލީބޯޅަ މުބާރާތް ބާއްވަން ނިންމާފައިވަނީ އަންނަ މެއި މަހުގެ އެއް ވަނަ ދުވަހު އެވެ. މުބާާރާތުގެ މެޗުތައް ކުޅުމަށް ނިންމާފައިވަނީ ހުޅުމާލޭގަ އެވެ.
އެންމެ ފަހުން ބޭއްވި މުބާރާތަށް ފަހު އޮފީސް މުބާރާތް ބޭއްވުން މަޑު ޖައްސާލީ ކޮވިޑް-19ގެ ސަބަބުން ކުޅިވަރުތައް ބޭއްވުމަށް ކުރިމަތިލާން ޖެހުނު ގޮންޖެހުންތަކާ އެކުގަ އެވެ. އޭގެ ފަހުން އިންޑޯ ހޯލު ލިބުމުގައި ދަތިތައްވެސް ދިމާވެ އެ މުބާރާތް ނުބޭއްވުނީ އެވެ.
ހަތަރު އަހަރަށް ފަހު ފުރަތަަމަ ފަހަރަށް ބާއްވާ އޮފީސް/ކުންފުނިތަކުގެ މުބާރާތުގައި ބައިވެރިވުމުގެ ފުރުސަތު ހުޅުވާލާފައިވަނީ މި މަހުގެ 20 ވަނަ ދުވަހާ ހަމައަށެވެ.
މި އަހަރުގެ ގަވާއިދަށް ބަލާލާއިރު ކޮންމެ ޓީމަކަށް ވެސް އެ އޮފީސް ނުވަތަ ކުންފުނީގައި ވަޒީފާ އަދާ ނުކުރާ ދެ ކުޅުންތެރިއަކު ހިމެނުމުގެ ފުރުސަތު އޮންނާނެ އެވެ. އޭގެ ތެރޭގައި ބިދޭސީ އެއް ކުޅުންތެރިއަކު ވެސް ހިމެނިދާނެ އެވެ.
އެ ގޮތުން، 1993 ވަނަ އަހަރު ފުރަތަމަ ބޭއްވަން ފެށި އިންޓަ އޮފީސް/ކުންފުނިތަކުގެ މުބާރާތަކީ ކުރީގައި އޮފީސްތަކުން ބޮޑު އިސްކަމެއްދީގެން ބައިވެރިވަމުން އައި މުބާރާތެކެވެ. މުބާރާތުގެ އެންމެ ފަހުގެ އަންހެން ޗެމްޕިއަން ޓީމަކީ ޕޮލިސް ކުލަބެވެ. ފިރިހެން އެންމެ ފަހުގެ ޗެމްޕިއަނުންނަނީ އެމްއޭސީއެލް އެވެ.
