ވޯލް ސްޓްރީޓް ޖާނަލްއަށް މަސައްކަތް ކުރާ އެމެރިކާގެ ނޫސްވެރިޔަކު ޖާސޫސް ކުރާ ކަމުގެ ތުހުމަތުގައި ރަޝިއާއިން ހައްޔަރުކޮށްފި އެވެ.
އީވާން ގާޝްކޮވިޗްއަކީ ރަޝިއާގެ ކަންކަމުގައި ތަޖުރިބާ ހުރި ނޫސްވެރިއެކެވެ. އޭނާ ހައްޔަރު ކުރި އިރު މަސައްކަތް ކުރަމުން ދިޔައީ ޔެކަޓެރިންބާގްގަ އެވެ.
ވޯލް ސްޓްރީޓް ޖާނަލްއިން ބުނީ އޭނާ ސަލާމަތާ މެދު "ވަރަށް ކަންބޮޑުވާ" ކަމަށާއި އޭނާގެ މައްޗަށް ކުރަނީ އެއްވެސް ހަގީގަތެއް ނެތް ތުހުމަތެއް ކަމަށެވެ.
ރަޝިއާގެ އިދާރާތަކުން ބުނީ "ނޫސްވެރިޔާ ހައްޔަރު ކުރީ ހެއްކާ އެކު" ކަމަށެވެ. ރަޝިއާގެ ޖާސޫސީ އިދާރާ އެފްއެސްބީއިން ބުނީ "ގާނޫނާ ހިލާފު ހަރަކާތްތައް ހުއްޓުވި" ކަމަށާއި ނޫސްވެރިޔާ މަސައްކަތް ކުރަމުން ދިޔައީ "އެމެރިކާގެ އެންގުމުގެ މަތިން" ރަޝިއާގެ "ސިއްރުތައް ހޯދަން" ކަމަށެވެ.
ހައްޔަރު ކުރުމަށް ފަހު ކޯޓަށް ގެންދިޔުމުން މޭ 29 އާ ހަމައަށް ބަންދުގައި ބަހައްޓަން ވަނީ ހުއްދަ ދީފަ އެވެ. ގާޝްކޮވިޗްގެ ގާނޫނީ ވަކީލު ވަނީ ކޯޓަށް ނުވެއްދި ކަމަށް ވިދާޅުވެ ކަންބޮޑުވުން ފާޅުކޮށްފަ އެވެ.
ރަޝިއާގެ ނިއުސް އެޖެންސީއިން ބުނީ އަޑުއެހުން ފެށުމުގެ ކުރިން ބޮމުގެ އިންޒާރެއް ލިބި ކޯޓުން މުވައްޒަފުންނާއި އެހެނިހެން މީހުން ނެރުނު ކަމަށެވެ.
ވޯލް ސްޓްރީޓް ޖާނަލްގައި އެންމެ ފަހުން ޝާއިއުކުރި ގާޝްކޮވިޗްގެ ލިޔުމަކީ ރަޝިއާގެ އިގުތިސާދު ދަށްވަމުންދާ ކަމަށް ބުނެ ތައްޔާރު ކުރި ރިޕޯޓެކެވެ.
ޖާސޫސް ކުރުމުގެ ކުށް ސާބިތުވެއްޖެ ނަމަ ރަޝިއާގައި 20 އަހަރުގެ ޖަލު ހުކުމެއް އައުން އެކަށީގެންވެ އެވެ. ޔޫކްރެއިން ހަނގުރާމައިގެ ކުރިން ވެސް ރަޝިއާގައި ނޫސްވެރިންނަށް ހުރަސްތައް ގިނަ އެވެ.
