ކާއްޓަކީ އެންމެ އިހު ޒަމާނުއްސުރެ ވެސް ދިވެހީންގެ ކެއުންބުއިމުގައި އެންމެ މުހިންމު ދައުރެއް އަދާ ކުރާ އެކައްޗެވެ. މަހާ އެކުގައި ވެސް ކާށި ކަޔެވެ. ޒީނަތްތެރިވުމަށް އޭގެ ނާށި ބޭނުންކުރެ އެވެ. ބޭސްވެރިކަމަށް ވެސް ކާއްޓަކީ މުހިންމު އެއްޗެކެވެ.
ނަމަވެސް މި ރޯދަ މަހާ ކުރިމަތިލީއިރު، އެންމެ ބޮޑު ކަންބޮޑުވުމެއްގެ ގޮތުގައި އޮތީ ދިވެހި މަތިވަރުގެ އަގު އިންތިހާއަށް ބޮޑުވުމެވެ. އަތް ފޯރާ އަގެއްގައި ދިވެހިރުކުން ލިބޭ އެއްވެސް އެއްޗެއް ބާޒާރުގައި ލިބެން ނެތުމެވެ.
ކުރުނބަލެއް ލިބެނީ 50ރ. - 45ރ. އަށެވެ. ހެޔޮވަރުގެ ގަބުޅިއެއް ވެސް ތިރީހުގެ މިކޮޅަކުން ލިބޭކަށް ނެތެވެ. ކާށީގެ އަގުގެ ވާހަކަ ދައްކާނެ ވެސް ކަމެއް ނެތެވެ.
ރޯދަ މަހުގެ ފުރަތަމަ ހަފުތާ ނިމުމަކާ ހަމައަށް އައިއިރު ވެސް ކުރުނބާ، ގަބުޅި، ކާށީގެ އިތުރުން ދިވެހި ގިނަ އުފެއްދުންތަކުގެ އަގަށް މާބޮޑު ހެޔޮ ބަދަލެއް ނާދެ އެވެ.
"ކޮންމެ ހަތަރު އަހަރަކުން އެއް އަހަރު މަތިވަރު ދަށްވާނެ، މިއީ އެ އަހަރު، އެހެންވެ ލިބުން ތަދީ،" މާރުކޭޓުގައި ގޮޅިއެއް ހިންގާ މީހަކު ބުންޏެވެ.
އޭނާ ބުނީ މަތިވަރު ދަށްވުމުގެ އިތުރުން ރުށްއަރައި ސާފު ކުރާ މީހުން ވެސް މިހާރު މަދު ވުމަކީ ރުކުގައި އެއްޗެހި ނުގަންނަ މައިގަނޑު އެއް ސަބަބު ކަމަށެވެ.
"މިހާރުގެ މީހުން ކަންނެތީއޭ ބުނެވޭނީ، ރުށްއަރައި ސާފުކޮށްލާ ނަމަ ވެސް މިއަށްވުރެ ރަނގަޅަށް އެއްޗެހި ލިބޭނެ،" އޭނާ ބުންޏެވެ.
ކަން މިހެން އޮއްވައި ރާއްޖޭގެ އެންމެ ބޮޑު ވިޔަފާރި ކުންފުނި، އެސްޓީއޯއިން ވަނީ އަވައްޓެރި އިންޑިއާއިން ރާއްޖެއަށް ކާށީގެ ބޮޑު ޝިޕްމެންޓެއް ގެނެސްފަ އެވެ. އެއާއެކު ރަނުގެ އަގުގައި ވިއްކަމުން އައި ދިވެހި މަތިވަރުގެ އަގު މިވަނީ ވަރަށް ބޮޑަށް ވެއްޓިފަ އެވެ.
ލޯކަލް މާރުކޭޓުގައި ކުރުނބާ ވިއްކަން ބަހައްޓާފައި -- ފޮޓޯ: އަދަދު
ކުރިން 40ރ. އަށް 50ރ. އަށް ވިއްކަމުން އައި ކާއްޓެއްގެ އަގު މިއަދު ބާޒާރުގައި ހުރީ 20ރ. އަށެވެ. 35ރ. އަށް ވިއްކި ސައިޒުގެ ކާއްޓެއް 15ރ. އަށް ލިބެން ހުރިއިރު، ކުރިން 20ރ. އަށް 25ރ. އަށް ވިއްކަމުން އައި ސައިޒުގެ ކާއްޓެއް މިހާރު 8ރ. އަށް 6ރ. އަށް ލިބެން އެބަ ހުއްޓެވެ.
"މިއީ ދުވަހަކުވެސް ކުރަން ޖެހުނު ކަމެއް ނޫން. މީގެ ކުރިން ފުދޭވަރަށް އަބަދުވެސް ރުއްރުކުން މަތިވަރު ލިބޭ، ވެގެން މިއުޅޭ ގޮތަކީ ރުއްތައް މުސްކުޅިވެ މަތިވަރުތައް ހުސްވީ،" މާރުކޭޓު ގޮޅިއެއް ހިންގާ ބ. އަތޮޅު ގޮއިދޫގެ އިސް ރަށްވެއްސަކު ބުންޏެވެ.
ބާޒާރުގައި ކުރުނބާ، ގަބުޅި، ކާށީގެ އަގު އަތްފޯރާފަށަށް ތިރިވިއެއް ކަމަކު މިއީ މައް ދިވެހީންނަށް ލިބުނު ހިތާމައަކާއި ދެރައެއް ކަމަށް މި މައުލޫއުގައި ވާހަކަދެއްކި ގިނަ މީހުން ބުންޏެވެ.
"އެންމެ އިހު ޒަމާނުއްސުރެ ބައްޕަމެން ބުނާނެ، ދިވެހީންގެ މައިގަނޑު ކެއުމާއި ބުއިމަކީ ރޯދި ކުރެއްވި އެއްޗަކާއި ދިވެހި ހަކުރޭ، މިއަދު އެކަމަކު އެކަން ކުރާން ވެސް މިޖެހެނީ އެހެން ގައުމަކުން ގެނެސްގެން،" ކަރު އެލުވާލައިފައި އެ މީހާ ބުންޏެވެ.
