ދާހިލީ ކަންކަމަށް ނުފޫޒު ނުފޯރުވަން އެއްބަސްވެ، ރޯދަ މަހުގެ ތެރޭގައި ސައުދީ އަރަބިއްޔާ އާއި އިރާނުގެ ފޮރިން މިނިސްޓަރުންގެ ބައްދަލުވުމެއް ބާއްވަން ނިންމައިފި އެވެ.
ސައުދީ ޕްރެސް އެޖެންސީ (އެސްޕީއޭ) އިން ރިޕޯޓުކުރި ގޮތުގައި ސައުދީ ފޮރިން މިނިސްޓަރު އަމީރު ފައިސަލް ބިން ފަރްހާން އަދި އިރާނުގެ ފޮރިން މިނިސްޓަރު ހޮސެއިން އާމިރް އަބްދުއްލާހިއާންގެ ބައްދަަލުވުމެއް ވަރަށް އަވަހަށް އޮންނާނެ އެވެ.
އެސްޕީއޭއިން ބުނީ ފޯނު މެދުވެރިކޮށް ދެ މިނިސްޓަރުން ބޭއްވި މަޝްވަރާއެއްގައި މުހިއްމު ކަންކަމާ ގުޅޭ ގޮތުން ހިޔާލު ބަދަލުކުރި ކަމަށާއި އޭގެ ތެރޭގައި އިރާނާއި ސައުދީ އަދި ޗައިނާއިން ސޮއިކުރި އެއްބަސްވުމެއް ހިމެނޭ ކަމަށެވެ.
ގިނަ އަހަރުތަކަކަށް ފަހު ސައުދީ އާއި އިރާނުން އަލުން ޑިޕްލޮމެޓިކް ގުޅުން ގާއިމްކުރަން ނިންމީ މި މަހު ޗައިނާ މެދުވެރިވެގެން ބޭއްވި ބައްދަލުވުންތަކަށް ފަހު އެވެ. ކުރިއަށް އޮތް ދެ މަހުގެ ތެރޭގައި އަލުން އެމްބަސީތައް ހުޅުވަން ވަނީ ނިންމައިފަ އެވެ.
"އެއް ގައުމު އަނެއް ގައުމުގެ އިސްތިގްލާލަށް ކަމޭ ހިތުމަށާއި ދާހިލީ ކަންކަމަށް ނުފޫޒު ނުފޯރުވަން އެއްބަސްވި،" ދެ މިނިސްޓަރުންގެ ފޯނު ކޯލަށް ފަހު ހޯމަ ދުވަހު އެސްޕީއޭއިން ރިޕޯޓުކުރި އެވެ.
އަލުން ޑިޕްލޮމެޓިކް ގުޅުން ގާއިމްކުރުމާ އެކު މީގެ ކުރިން ސޮއިކޮށްފައިވާ ސެކިއުރިޓީ އެއްބަސްވުމާއި ވިޔަފާރިއާ ގުޅޭ އެއްބަސްވުން އަލުން ތަންފީޒު ކުރަން ދެ ގައުމުން ނިންމި އެވެ.
ސައުދީ އަރަބިއްޔާއިން އިރާނާ އެކު އޮތް ގުޅުން ކަނޑާލީ 2016 ވަނަ އަހަރު އިރާނުގެ ބަޔަކު ތެހްރާންގައި ހުންނަ އެ ގައުމުގެ އެމްބަސީ ތެރެއަށް ވަދެގަތުމުންނެވެ.
އިރާނުގައި ސައުދީއާ ދެކޮޅަށް މުޒާހަރާ ކުރަން ފެށީ އެ ގައުމުގައި ޝިއައީންގެ އިސް އިލްމުވެރިއެއްގެ މައްޗަށް މަރުގެ ހުކުމް ތަންފީޒު ކުރުމުންނެވެ.
އޭގެ ފަހުން ޝިއައީންގެ ވެރިކަން އޮންނަ އިރާނާއި ސުންނީންގެ ވެރިކަން އޮންނަ ސައުދީގެ މަޝްރަހު އޮތީ ގޯސްވެފަ އެވެ. އެއީ މެދުއިރުމަތީގެ އެންމެ ވާދަވެރި ދެ ގައުމެވެ.
މެދުއިރުމަތީގައި ހިނގާ ހަމަނުޖެހުންތަކުގައި އިރާނާއި ސައުދީއިން ތާއީދުކުރަނީ ދެ ފަޅިއަށެވެ. އެގޮތުން ލުބްނާން، ސީރިއާ، އިރާގް އަދި ޔަމަން ފާހަގަކުރެވެ އެވެ.
