އިޒްރޭލުގެ ޖުޑީޝަލް ނިޒާމަށް ގެންނަން އުޅޭ ބަދަލުތައް މަޑުޖައްސާލަން ގޮވާލުމުން ޑިފެންސް މިނިސްޓަރުގެ މަގާމުގައި ހުރި ޔޮއާވް ގަލާންޓް މަގާމުން ވަކިކޮށްފި އެވެ.
ހޮނިހިރު ދުވަހު ޓީވީ މެދުވެރިކޮށް ދިން ކުރު ބަޔާނެއްގައި ގަލާންޓް ވިދާޅުވީ ބަދަލުތައް މަޑުޖައްސާލަން ޖެހެނީ ގައުމީ ސަލާމަތަށް ނުރައްކާ ބޮޑުވަމުން ދާތީ ކަމަށެވެ.
އާދީއްތަ ދުވަހު ބޮޑު ވަޒީރު ބެންޖަމިން ނަތަންޔާހޫ ނިންމެވީ އޭނާ މަގާމުން ވަކިކުރުމަށެވެ. ބޮޑު ވަޒީރުގެ އޮފީހުން ނެރުނު ބަޔާނުގައި ބުނީ ޑިފެންސް މިނިސްޓަރުގެ ޒިންމާތަކުން އެކަހެރިކޮށްފައިވާ ކަމަށެވެ.
އިޒްރޭލުގެ ޖުޑީޝަލް ނިޒާމަށް ބަދަލު ގެންނަން އުޅޭތީ އާއްމުން ހިތްހަމަނުޖެހި މުޒާހަރާ ކުރަމުން ދާތާ ގިނަ މަސްތަކެއް ވެއްޖެ އެވެ.
ނަތަންޔާހޫއާ އެއްބައިވެގެން ކަނާއަތު ފިޔައިގެ ހަރުކަށި ޕާޓީތަކުން އުފައްދާފައިވާ ސަރުކާރުގެ އަމާޒަކީ ޝަރުއީ ނިޒާމަށް ބަދަލުތައް ގެނައުމެވެ. އެކަން ކުރަން ހާއްސަ ޕްލޭނެއް ވަނީ ހަދައިފަ އެވެ.
އޭގެ ދަށުން ޕާލަމެންޓުން ފާސްކުރި އާ ގާނޫނެއްގެ ދަށުން ބޮޑު ވަޒީރުގެ މަގާމުގައި ހުންނަވާ ބޭފުޅަކު އެ މަގާމުން ދުރުކުރުމަށް އެޓޯނީ ޖެނެރަލަށް ލިބިދޭ ބާރު ވަނީ އުނިކޮށްފަ އެވެ.
ގަލާންޓް ޓީވީ މެދުވެރިކޮށް ދެއްވި ބަޔާނުގައި ވިދާޅުވީ އިޒްރޭލުގެ ދިފާއީ ފައުޖުގެ މެމްބަރުން ތިބީ ވަރަށް ބޮޑަށް ނުރުހުން ވެފައި ކަމަށާއި ގައުމަށް އޭގެ ނުރައްކާ ބޮޑު ވާނެ ކަމަށެވެ.
ޖުޑީޝަލް ނިޒާމަށް ބަދަލުތަކެއް ގެންނަން ބޮޑު ވަޒީރު ބެންޖަމިން ނަތަންޔާހޫ ނިންމެވީ ސަރުކާރުގެ އެކި ގޮފިތައް ބެލެންސް ކުރުމަށް ކަމަށް ވިދާޅުވެ އެވެ.
ސަރުކާރުން ރާވާފައިވާ ބަދަލުތަކުގެ ދަށުން ފަނޑިޔާރުން އައްޔަން ކުރުމުގައި ސަރުކާރަށް ނުފޫޒު ފޯރުވޭނެ އެވެ. އޭގެ އިތުރުން ވެރިކަން ހިންގާ ބާރާ ދެކޮޅަށް ސުޕްރީމް ކޯޓުން އަމުރު ނެރުމުގެ ގާބިލްކަން ލިމިޓްކުރާނެ އެވެ.
އެ ރޭވުމާ މެދު އިޒްރޭލުގެ ގިނަ ބަޔަކު ހިތްހަމަނުޖެހެ އެވެ. އިޒްރޭލް ސިފައިންގެ ރިޒާވް ފައުޖުގައި ހިމެނޭ ގިނަ ބަޔަކު ނުރުހުން ފާޅުކުރުމުގެ ގޮތުން ނިންމީ ސިފަައިންގެ މަސައްކަތަށް ނުނިކުތުމަށެވެ.
ރައްޔިތުން ދެކޭ ގޮތުގައި ސަރުކާރުގެ ހުށަހެޅުމުގެ ސަބަބުން ޖުޑިޝަރީގެ ތެރެއަށް ސިޔާސީ ނުފޫޒު ވަަދެ ހުދުމުހުތާރު ވެރިކަމަކަށް މަގުފަހިވާނެ އެވެ.
