އިޒްރޭލުން އުރުދުންއަށް ކަނޑައަޅާފައި ހުންނަ މަންދޫބު އެ ގައުމުން ފޮނުވާލަން އުރުދުންގެ ޕާލަމެންޓުން ނިންމައިފި އެވެ.
މީގެ ތިން ދުވަސް ކުރިން އިޒްރޭލުގެ މިނިސްޓަރަކު އިޒްރޭލުގެ ބިން ކަމަށް ބުނެ ފަލަސްތީނާއި އުރުދުންގެ ސަރަހައްދު ޗާޓަކުން ދެއްކި މައްސަލަ އޮތީ ހޫނުވެފަ އެވެ.
ޕާލަމެންޓުގެ ތިރިގޭގެ ރައީސް އަހްމަދު ސަފަދީ ގޮވާލެއްވީ އިޒްރޭލް މިނިސްޓަރުގެ އެ އަމަލާ މެދު ފިޔަވަޅު އެޅުމަށް ކަމަށް އުރުދުންގެ ޕެޓްރާ ނިއުސް އެޖެންސީއިން ރިޕޯޓުކުރި އެވެ.
ޕާލަމެންޓު މެމްބަރުންގެ ބަހުސްގައި ވަނީ އިޒްރޭލް މިނިސްޓަރާ މެދު ނުރުހުން ފާޅުކޮށް، ބައިނަލްއަގްވާމީ މުއާހަދާތަކަށް އިޒްރޭލުން އިހްތިރާމް ނުކުރާތީ ކަންބޮޑުވުން ފާޅުކޮށްފަ އެވެ.
އާދީއްތަ ދުވަހު އިޒްރޭލުގެ ފިނޭންސް މިނިސްޓަރު ބެޒަލޭލް ސްމޮޓްރިޗް ވިދާޅުވީ "ފަލަސްތީނުގެ ރައްޔިތުންނޭ ކިޔާ ބަޔަކު ނޫޅޭ" ކަމަށާއި ފަލަސްތީނުގެ ތާރީހެއް އަދި ސަގާފާތެއް ވެސް ނޯންނަ ކަމަށެވެ.
އޭނާ ވާހަކަދައްކަން ހުރި ޕޯޑިއަމްގެ ފަހަތުގައި ބަހައްޓާފައި ހުރި ޗާޓުގައި އިޒްރޭލުގެ ބިން ކަމަށް ކަނޑައަަޅާފައި އޮތީ ފަލަސްތީނާއި އުރުދުންގެ ހިސާބުތަކެވެ.
ޔޫއޭއީ އާއި ސައުދީ އަރަބިއްޔާ ހިމެނޭހެން ގިނަ ގައުމުތަކުން ވަނީ އޭނާގެ ވާހަކަ ކުށްވެރިކޮށްފަ އެވެ. އެ މައްސަލައިގައި ހޯމަ ދުވަހު އިޒްރޭލްގެ ސަފީރު އުރުދުން ފޮރިން މިނިސްޓްރީއަށް ހާޒިރުކުރި އެވެ.
ރޮއިޓާޒް ނޫހުން ބުނީ އިޒްރޭލުގެ ނޭޝަނަލް ސެކިއުރިޓީ އެޑްވައިޒަރު އުރުދުންގެ ފޮރިން މިނިސްޓަރު އައިމަން ސަފަަދީއަށް ގުޅުއްވައި، އިޒްރޭލުން އުރުދުންގެ އިސްތިގްލާލަށް އިހްތިރާމް ކުރާ ވާހަކަ ދެންނެވި ކަމަށެވެ.
