ފަލަސްތީނުގެ ހުޅަނގު އައްސޭރީގައި ގާނޫނާ ހިލާފަށް ޔަހޫދީން އާބާދު ކުރުމަށް ހެދި ހަތަރު ސަރަހައްދަކަށް ޔަހޫދީން އަލުން ދިޔުމުގެ ހުއްދަ އިޒްރޭލުގެ ޕާލަމެންޓުން ދީފި އެވެ.
އެ ހަތަރު ސަރަހައްދަށް ޔަހޫދީން ދިޔުން މަނާކުރީ 2005 ވަނަ އަހަރު އެވެ. އަލުން އެ ތަންތަނަށް ދިޔުމުގެ ހުއްދަ ދޭން އުޅޭތީ ބައިނަލްއަގްވާމީ ފަރާތްތަކުގެ ފާޑުކިޔުން އިޒްރޭލަށް އަމާޒުވި އެވެ.
އެހެން ނަމަވެސް އެ ފާޑުކިޔުންތަކަށް ބެލުމެއް ނެތި އިޒްރޭލުގެ ޕާލަމެންޓުން ވަނީ ހުއްދަ ދޭން ނިންމައިފަ އެވެ. އެ ނިންމުން ތަންފީޒު ކުރެވޭނީ އިޒްރޭލް ސިފައިންގެ ކޮމާންޑަރެއްގެ ރުހުން ލިބުމުންނެވެ.
އެ ހަތަރު ސަރަހައްދަކީ ފަލަސްތީނުގެ އަމިއްލަ ބިން ކަމަށް މީގެ ކުރިން ހައި ކޯޓް އޮފް ޖަސްޓިސްއިން ނިންމާފައިވެ އެވެ. އެހެންކަމުން، އަލުން އެ ތަނަށް ޔަހޫދީން ދިޔުމަކީ ކޯޓުގެ ނިންމުމާ ހިލާފުވުމެވެ.
ރޯދަ މަސް ފަށަން އެންމެ ދުވަހަކަށް ވެފައި ވަނިކޮށް އިޒްރޭލުގެ ޕާލަމެންޓުން ނިންމި ނިންމުމާ ހެދި ފަލަސްތީނުގެ ރައްޔިތުންނާއި ޔަހޫދީންނާ ދެމެދު ހަމަނުޖެހުން ބޮޑުވުމުގެ ފުރުސަތު އެބަ އޮތެވެ.
މެދުއިރުމަތީގައި 1967 ވަނަ އަހަރު ކުރި ހަނގުރާމައިގައި އިޒްރޭލުން ހިފި ފަލަސްތީނުގެ ހުޅަނގު އައްސޭރި އާއި އިރުމަތީ ގުދުސްގައި ގާނޫނާ ހިލާފަށް ޔަހޫދީން އާބާދު ކުރަން ހަދާފައިވާ 140 އަށް ވުރެ ގިނަ ސަރަހައްދުގައި 600،000 އަށް ވުރެ ގިނަ ޔަހޫދީން މިހާރު ދިރިއުޅެ އެވެ.
އެ ތަންތަނުގައި ޔަހޫދީން އާބާދު ކުރަނީ ގާނޫނާ ހިލާފަށް ކަމަށް ބައިނަލްއަގްވާމީ މުޖުތަމައިން ދެކެ އެވެ. އެކަމަކު އިޒްރޭލުން އެ ވާހަކަ ގަބޫލެއް ނުކުރެ އެވެ.
