ސައުދީ އަރަބިއްޔާގެ ދައުލަތުގެ ތެޔޮ ކުންފުނި އަރަމްކޯއަށް 2022 ވަނަ އަހަރު 161.1 ބިލިއަން ޑޮލަރުގެ ރެކޯޑް ފައިދާއެއް ލިބިއްޖެ އެވެ.
އެއީ 2021 ވަނަ އަހަރާ އަޅާ ބަލާއިރު 46.5 ޕަސެންޓުގެ އިތުރުވުމެކެވެ. އަރަމްކޯގެ އިތުރުން އެހެން ބޮޑެތި ތެޔޮ ކުންފުނިތަކަށް ވެސް 2022 ވަނަ އަހަރު ރެކޯޑް ފައިދާ ލިބިފައިވެ އެވެ.
ތެޔޮ ކުންފުނިތަކަށް ފައިދާވަމުން ދަނީ 2022 ވަނަ އަހަރުގެ ފެބްރުއަރީ މަހު ޔޫކްރެއިންގައި ފެށި ހަނގުރާމައާ ގުޅިގެން ތެލުގެ އަގުތައް އުފުލުމުންނެވެ.
އެމެރިކާގެ އެކްސޮންމޮބިލްއަށް 55.7 ބިލިއަން ޑޮލަރުގެ ފައިދާއެއް ލިބުނު އިރު އިނގިރޭސިވިލާތުގެ ޝެލް ކުންފުންޏަށް 39.9 ބިލިއަން ޑޮލަރުގެ ފައިދާއެއް ލިބުނެވެ.
އަރަމްކޯއަށް ރެކޯޑް ފައިދާއެއް ލިބުނު އިރު، 2022 ވަނަ އަހަރުގެ ފަހު ކުއާޓާގައި ލިބުނު އާމްދަނީއިން ހިއްސާދާރުންގެ މެދުގައި ބަހާނީ 19.5 ބިލިއަން ޑޮލަރު ކަމަށް ވެސް ބުންޏެވެ.
އޭގެ ބޮޑު ބައެއް ދާނީ ސައުދީ އަރަބިއްޔާގެ ސަރުކާރަށެވެ. އަރަމްކޯގެ 95 ޕަސެންޓް ހިއްސާ އޮންނަނީ ސައުދީ ސަރުކާރަށެވެ.
މިހާރު ސާފުނުކުރާ ތެޔޮ ފީފާއެއްގެ އަގު އުޅެނީ 82 ޑޮލަރަށެވެ. ޔޫކްރެއިން ހަނގުރާމަ ފެށުމުން އަގުތައް އުފުލެމުން ގޮސް ފީފާއެއްގެ އަގު 120 ޑޮލަރަށް ވެސް އެރި އެވެ.
