އެމެރިކާ އާއި އިޒްރޭލުން އިރާނަށް ހަމަލާދީ ފެށި ހަނގުރާމަ އާއެކު ދުނިޔޭގެ ބާޒާރުގައި ތެލުގެ އަގު ގާތްގަނޑަކަށް 10 ޕަސެންޓު އުފުލިއްޖެ އެވެ.
ސާފުނުކުރާ ތެޔޮ ފީފާއެއްގެ އަގު 82.37 ޑޮލަރަށް އަރާފައިވާއިރު މިއީ މިދިޔަ ހަފްތާއަށްވުރެ 13 ޕަސެންޓު ބޮޑު އަދަދެކެވެ. މާކެޓުތައް އިއްޔެ ބަންދުކުރިއިރު ފީފާއެއްގެ އަގު 79.78 ޑޮލަރުގައި ހުރުއިރު އެއީ 9.5 ޕަސެންޓު ބޮޑުވުމެކެވެ.
މި ހަނގުރާމައާއެކު ހޮރުމޫޒު ކަނޑުއޮޅިން ދަތުރުކުރާ ޓޭންކަރުތައް ވަނީ ވަރަށް ބޮޑަށް މަދުވެފަ އެވެ. ދުނިޔޭގެ ކަނޑުމަގުން ކުރެވޭ ތެޔޮ ޝިޕްމަންޓްތަކުގެ 20 އިން 30 އިންސައްތަ ދަތުރުކުރަނީ މި ކަނޑުއޮޅިންނެވެ.
ހޮރުމޫޒު ކަނޑުއޮޅިން ކުރި ދަތުރުކުރާ އަދަދަށް ތެޔޮ ޝިޕްމަންޓްތަކަށް ދަތުރު ނުކުރެވޭނަމަ ތެލުގެ އަގު އިތުރަށް އުފުލި ސަޕްލައިއަށް އަސަރުކުރާނެ އެވެ.
ޖޭޕީ މޯގަން ފަދަ ދުނިޔޭގެ އިންވެސްޓްމަންޓް ބޭންކުތަކާއި އިގްތިސާދީ ދިރާސާ ކުރާ އިދާރާތަކުން ލަފާކުރާ ގޮތުގައި، ހޮރުމުޒް ކަނޑުއޮޅި މުޅިން ބަންދުކޮށް، އަސްކަރީ ކުރިމަތިލުންތައް އިތުރުވެއްޖެނަމަ، ދުނިޔޭގެ ބާޒާރުގައި ތެލުގެ އަގު ފީފާއަކަށް 120 އާއި 130 ޑޮލަރަށްވުރެ މައްޗަށް އަރާނެ އެވެ.
އިރާނުގެ ޑްރޯން ހަމަލާއެއް އަމާޒުވެ ސައުދީ އަރަމްކޯގެ އެންމެ ބޮޑު އެއް ތެޔޮ ސާފުކުރާ ކާރުހާނާ ކަމަށްވާ ރަސް ޓަނޫރާގެ މަސައްކަތް ވެސް މިއަދު ވަނީ ހުއްޓާލާފަ އެވެ. ރަސް ޓަނޫރާ ކާރުހަނާއަކީ ދުވާލެއްގެ މައްޗަށް 550،000 ފީފާގެ ތެޔޮ ސާފުކުރުމުގެ ގާބިލުކަން ލިބިފައިވާ ކާރުހާނާއެކެވެ. މިއީ ތެޔޮ ސާފުކުރާ ދުނިޔޭގެ އެންމެ ބޮޑެތި ކާރުހާނާތަކުގެ ތެރޭގައި ހިމެނޭ ތަނެކެވެ.
އީރާނުގެ މި ހަމަނުޖެހުންތަކުގެ ސަބަބުން ދުނިޔޭގެ މާލީ ބާޒާރުތަކަށް ނުތަނަވަސްކަން އައިސް، ފޮރެކްސް އަދި ހިއްސާގެ ބާޒާރުތައް ބަލިކަށިވެދާނެ ކަމުގެ ބިރު ވެސް ވަނީ ހީވެފަ އެވެ.
