މެޑްރިޑް (މާޗު 5) - އެތުލެޓިކޯ މެޑްރިޑްގެ ކޯޗުގެ މަގާމުގައި 613 މެޗު ހަމަކޮށް، އެ ޓީމުގެ ކޯޗު އާޖެންޓީނާގެ ޑިއޭގޯ ސިމިއޯނީ ކްލަބުގެ ރެކޯޑެއް މުގުރާލައިފި އެވެ.
އެތުލެޓިކޯ އަށް އެންމެ ގިނަ މެޗު ކޯޗުކޮށްދިނުމުގެ ރެކޯޑް ސިމިއޯނީ، 54، މުގުރާލިއިރު، 612 މެޗާ އެކު މި ރެކޯޑް ކުރިން އޮތީ މަޝްހޫރު ކޯޗު ލުއިސް އަރަގޮނޭސްގެ އަތުގަ އެވެ.
ސްޕެނިޝް ލީގުގައި ރޭ ސެވިއްޔާ އަތުން 6-1 އިން އެތުލެޓިކޯ މޮޅުވި މެޗުގެ ކުރިން، ސިމިއޯނީގެ ރެކޯޑް ފާހަގަކޮށް އެ ކްލަބުން ވަނީ ސިމިއޯނީ އަށް ހާއްސަ ޖޯޒީއެއް ހަދިޔާކޮށްފަ އެވެ.
މި ޖޯޒީ ސިމިއޯނީ އަށް ހަވާލުކުރީ އަރަގޮނޭސްގެ ދަރިފުޅެވެ. މި ޖޯޒީގެ ފަހަތުގައި "ލެޖެންޑް ސިމިއޯނީ" ޖަހާފައި އިންއިރު، ސަޕޯޓަރުން ވެސް ވަނީ ސިމިއޯނީގެ ހިދުމަތުގެ އަގު ވަޒަންކޮށް، އޭނާ އަށް ތަރުހީބު ދީފައެވެ.
އެތުލެޓިކޯ އަށް ކުރިން ކުޅުނު ސިމިއޯނީ އެ ކްލަބުގެ ކޯޗުކަމާ ހަވާލުވީ 2011 ވަނަ އަހަރެވެ. ސިމިއޯނީގެ ކޯޗުކަމުގެ ދަށުން އެތުލެޓިކޯ އިން ވަނީ 2014 އަދި 2021 ވަނަ އަހަރުގެ ސްޕެނިޝް ލީގު ކާމިޔާބުކޮށްފަ އެވެ. އަދި 2013 ވަނަ އަހަރުގެ ކޮޕާ ޑެލް ރޭ ވެސް ކާމިޔާބުކުރި އެވެ.
ސިމިއޯނީ ވަނީ ސްޕެއިންގެ ވަރުގަދަ ދެ ބާރު ކަމަށްވާ ރެއާލް މެޑްރިޑާއި ބާސެލޯނާއާ ވާދަކުރެވޭ ފެންވަރުގެ ޓީމަކަށް އެތުލެޓިކޯ ބައްޓަންކޮށްފަ އެވެ. ޗެމްޕިއަންސް ލީގުގެ ފައިނަލްގައި 2014 ވަނަ އަހަރާއި 2016 ވަނަ އަހަރު އެތުލެޓިކޯ ވާދަކުރި އެވެ. މީގެ އިތުރުން ޔޫރޮޕާ ލީގުގެ ޗެމްޕިއަންކަން 2012 އަދި 2018 ވަނަ އަހަރު ހޯދި އެވެ.
