އޯލަންޑޯ، ޔުނައިޓެޑް ސްޓޭޓްސް (މާޗް 8) - އެތުލެޓިކޯ މެޑްރިޑަށް ކުޅެމުން އަންނަ ފްރާންސްގެ ތަރި، އަންޓުއާން ގްރީޒްމަން، އެމެރިކާ ލީގު (އެމްއެލްއެސް) އަށް ބަދަލުވުމުގެ ވާހަކަތައް މި ވަގުތަށް މަޑުޖައްސާލާފައިވާ ކަމަށް މީޑިއާ ރިޕޯޓްތައް ބުނެފި އެވެ.
އުމުރުން 34 އަހަރުގެ ގްރީޒްމަން، ޖެނުއަރީ މަހުން ފެށިގެން އައީ އެމްއެލްއެސްގެ ކްލަބް، އޯލަންޑޯ ސިޓީއާ ވާހަަކަ ދައްކަމުންނެވެ. އެކަމަކު، އެންމެ ފަހު ވަގުތު ގްރީޒްމަން ނިންމީ އެތުލެޓިކޯގައި މަޑުކުރުމަށެވެ.
އެތުލެޓިކޯގެ ސްޕޯޓިން ޑިރެކްޓަރު، މަޓެއު އަލެމާނީ ވިދާޅުވީ، ކްލަބްގައި މަޑުކުރަން ނިންމީ ގްރީޒްމަންގެ ހާއްސަ އަމާޒެއް އޮތުމުން ކަމަށެވެ.
ރިޕޯޓްތައް ބުނާގޮތުން، ގްރީޒްމަން ބޭނުންވަނީ، މި ސީޒަނުގެ ޗެމްޕިއަންސް ލީގުގައި އެތުލެޓިކޯއާ އެކު، ކާމިޔާބު ހޯދަން ކުރެވުނު މަސައްކަތެއް ކުރުމަށް މަޑުކުރާށެވެ.
ސްޕެނިޝް ލީގުގައި މި ފަހަރު އެތުލެޓިކޯގެ 23 މެޗެއްގައި ގްރީޒްމަން ކުޅެފައިވާއިރު، ފުރަތަމަ އެގާރައިގައި ހިމެނުނީ ހަ މެޗެއްގަ އެވެ. މިހާތަނަށް ލީގުގައި ގްރީޒްމަން ވަނީ ހަ ލަނޑު ޖަހައިފަ އެވެ.
އޯލަންޑޯ ސިޓީން ގްރީޒްމަން ހޯދުމުގެ މަސައްކަތް ހުއްޓައިނުލައި ކުރިއަށްގެންދަން ނިންމާފައިވާއިރު، ދެން، އެ ޓީމުން މަޝްވަރާކުރަނީ، ޖުލައި އެއް ވަނަ ދުވަހު ހިލޭ ޓްރާންސްފާއެއްގައި ގްރީޒްމަންގެ ސޮއިހޯދުމަށެވެ. އެއީ، ސޮއިކުރާއިރު، ބޮޑު ބޯނަހެއް ދޭ ގޮތަށެވެ.
މީގެ ކުރިން ވެސް ގްރީޒްމަން ވަނީ އެއް ފަހަރު އެތުލެޓިކޯ ދޫކޮށްލައިފަ އެވެ. އެ ގޮތުން، 2019 ވަނަ އަހަރު ގްރީޒްމަން ވަނީ އެތުލެޓިކޯ ދޫކޮށް ބާސެލޯނާ އަށް ބަދަލުވެފަ އެވެ. އެކަމަކު، ބާސެލޯނާގައި ދެ އަހަރު ހޭދަކުރުމަށްފަހު ގްރީޒްމަން އެނބުރި އެތުލެޓިކޯ އަށް ބަދަލުވީ 2021 ވަނަ އަހަރު އެވެ.
ކުރިން ރެއާލް ސޮސިއެޑާޑަށް ކުޅުނު ގްރީޒްމަން އެންމެ ބޮޑަށް ވިދާލީ، އެތުލެޓިކޯ އަށް 2014 އިން 2019 ވަނަ އަހަރާ ހަމަ އަށް ކުޅުނުއިރުގަ އެވެ. އެތުލެޓިކޯއާ އެކު ގިނަ ކާމިޔާބީތަކެއް ހޯދި ގްރީޒްމަން ވަނީ ފްރާންސްއާ އެކު 2018 ވަނަ އަހަރުގެ ވޯލްޑް ކަޕް ކާމިޔާބުކޮށްފަ އެވެ.
ގްރީޒްމަން ވަނީ 2024 ވަނަ އަހަރުގެ އޮކްޓޫބަރު މަހު ފްރާންސް ގައުމީ ޓީމުން ރިޓަޔާމަންޓް އިއުލާނުކޮށްފަ އެވެ.
