ހުކުރު ދުވަހުގެ ރޭގެ މާފަންނު މުރަނގަމަގުގައި ހުރި ފިހާރައެއްގެ ތެރޭގައި ވަޅިޖަހައި ޒަހަމުކޮށްލި މީހާ މިރޭ މަރުވެއްޖެ އެވެ.
އައްޑު އަށް ނިސްބަތްވާ 30 އަހަރުގެ އެ މީހާ މަރުވިކަން އޭނާގެ އާއިލާއިން މި ނޫހަށް ކަށަވަރުކޮށް ދިނެވެ.
މާރާމާރީއާ ގުޅިގެން އޭނާ ހޮސްޕިޓަލަށް ގެންދިޔަ ވަގުތުން ފެށިގެން އޭނާއަށް ފަރުވާ ދެމުން ގެންދިޔައީ އައިޖީއެމްއެޗްގެ އައިސީޔޫގަ އެވެ.
އޭނާ އަށް ހަމަލާ ދިނީ ހޮނިހިރު ދުވަހުގެ ރޭ ބީޖީ ގަރާޖު ކައިރީގައި ހުންނަ ކޮސްމެޓިކް ސާމާނު ވިއްކާ، ކްރާސާ ފިހާރަ ތެރެއަށް ވަދެ ހުއްޓަ އެވެ. ހަމަލާ ދިނީ ހެލްމެޓު އަޅައިގެން ސައިކަލުގައި އައި ދެ މީހެކެވެ.
މަރުވި މީހާގެ ހަށިގަނޑު އެތައް ތަނަކަށް އަދި ދެ ފަޔަށް ވަޅިން ހަމަލާދީފައިވެ އެވެ.
އެ މީހާ ޒަހަމްވެ ފިހާރަތެރޭގައި އޮތްއިރު ނަގާފައިވާ ވީޑިއޯތަކުން ފެންނަ ގޮތުގައި އޭނާގެ އުނަގަނޑުގައި ވެސް އުރައަކަށް ލައްވައި ހަރުކޮށްފައި ހުރި ވަޅިއެއް ހުއްޓެވެ.
އެ މާރާމާރީގެ މައްސަލައިގައި ހައްޔަރުކޮށްފައިވާ 20 އަހަރުގެ ދިވެހި ފިރިހެން މީހާގެ ބަންދަށް ކްރިމިނަލް ކޯޓުން 15 ދުވަސް ދީފައިވާ ކަމަށް ފުލުހުން ބުނެ އެވެ.
މި ފަހުން މާލޭގައި ހިންގާފައިވާ މާރާމާރީތަކާއި ބުރާސްފަތި ދުވަހުގެ ރޭ ހުޅުމާލޭގައި ހުރި ކެފޭއަކަށް ގެއްލުންދިން މައްސަލަ ގުޅެނީ މާލޭގައި ހަރަކާތްތެރިވާ ގޭންގުތަކުގެ މެދުގައި ހިނގާ ހަމަނުޖެހުންތަކާއި ކަމަށާއި އެ މައްސަލަތަކާ ގުޅޭ 16 މީހުން ހައްޔަރު ކޮށްފައިވާ ކަމަށް ކޮމިޝަނާ އޮފް ޕޮލިސް މުހައްމަދު ހަމީދު ހޮނިހިރު ދުވަހު ވަނީ ވިދާޅުވެފަ އެވެ.
ސިލްސިލާ މާރާމާރީތަކާ ގުޅިގެން ހަމީދު "އަދަދު" އަށް ދެއްވި އެ އިންޓަވިއުގައި ވިދާޅުވީ، މިއީ މާލޭގެ ދެ ގޭންގަކަށް ނިސްބަތްވާ ދެ މީހެއްގެ ދެމެދުގައި މި އަހަރު ކުރީކޮޅު ޖެހުނު މައްސަލައަކާ ގުޅިގެން ހިނގާ މާރާމާރީތަކެއް ކަމަށެވެ.
"މިފަހުން މާލެ ސަރަހައްދުގައި ތޫނު ހަތިޔާރު ބޭނުންކޮށްގެން ހިންގަމުން އަންނަ ނުރައްކާތެރި މާރާމާރީތަކަކީ 'ކުޑަހެންވޭރޭ' ކިޔައިގެން އުޅޭ ބަޔަކާއި 'އެންސީ' އޭ ކިޔައިގެން އުޅޭ ބައެއް ހިންގާ މާރާމާރީ ތަކެއް،" ހަމީދު ވިދާޅުވި އެވެ.
މާރާމާރީތައް އިތުރުވެފައިވާ މި ދަނޑިވަޅުގައި ފުލުހުން ވަނީ ދެ ކަމެއް ނިންމައިފަ އެވެ. އެއީ މާލޭ ސަރަހައްދުގައި ހިންގާ މުހިންމު އޮޕަރޭޝަންތަކުގައި ކަރަންޓު ޝޮކު ޖައްސާ ޓޭޒާ ބަޑި އިއްޔެ ބޭނުންކުރަން ފެށުމެވެ. އަދި ހެލްމެޓް އެޅުން ލާޒިމު ކުރާ ސަރަހައްދުތައް ފިޔަވައި އެހެނިހެން ސަރަހައްދުތަކުގައި ހެލްމެޓް އަޅައިގެން ދުއްވާނަމަ ފާރަވެރިވާނެ ކަމަށް ބުނުމެވެ.
