"ގެވެށި ގުޅުން" ސީރީސްގެ ފޮތްތައް ސްކޫލްތަކުގެ ކީސްޓޭޖްއެކަކާއި ދޭއްގެ ދަރިވަރުންނަށް ހަދިޔާކޮށްފި އެވެ.
ޖެންޑާ މިނިސްޓްރީން މިކަމަށްޓަކައި އިއްޒުއްދީން ސްކޫލުގައި ބޭއްވި ހާއްސަ ރަސްމިއްޔާތުގައި ވަނީ ކީ ސްޓޭޖް އެކަކާއި ދޭއްގެ ދަރިވަރުންނަށް މި ފޮތް ހަދިޔާކޮށްފަ އެވެ. އެ ރަސްމިއްޔާތު ޝަރަފްވެރި ކޮށްދެއްވީ، ޖެންޑާ މިނިސްޓްރީގެ ސްޓޭޓް މިނިސްޓަރު ޒިފްލީނާ ހަސަން އެވެ.
"ގެވެށި ގުޅުން" ވާހަކަ ފޮތް ސީރީސް ދަރިވަރުންނަށް ތައާރަފްކުރުމުގެ ގޮތުން ރާއްޖޭގެ ހުރިހާ ސްކޫލެއްގައި މި ހަރަކާތްތައް ކުރިއަށް ގެންދިއުމަށް ހަމަޖެހިފައިވާ ކަމަށް ޖެންޑާ މިނިސްޓްރީން ބުނެ އެވެ.
ޖުމްލަ ހަ ފޮތް ހިމެނޭ މި ސީރީޒަކީ ގެވެށި ގުޅުން ކެމްޕެއިންގެ ދަށުން މިދިޔަ އަހަރުގެ ނޮވެމްބަރު މަހުގެ 29 ވަނަ ދުވަހު ޝާއިއުކުރި ފޮތް ސީރީޒެކެވެ. މި ވާހަކަ ފޮތްތައް ކީ ސްޓޭޖް އެކެއް އަދި ދޭއް ގައި ކިޔަވާ ދަރިވަރުން ސްކޫލްތަކުގައި ތިބި ނިސްބަތުން ރާއްޖޭގެ ހުރިހާ ސްކޫލަކަށް ވެސް މިނިސްޓްރީގެ ފަރާތުން ވަނީ ހަދިޔާކޮށްފަ އެވެ.
ގެވެށި ގުޅުން ކެމްޕެއިންގެ ދަށުން ތައްޔާރުކޮށްފައިވާ ކުޑަކުދިންގެ ވާހަކަ ފޮތް ސީރީސްއަކީ ގެވެށި އަނިޔާއިން ރައްކާތެރިވެފައިވާ މުޖުތަމައުއެއް ބިނާކުރުމަށް ކުޑަކުދިންގެ ކިބައިގައި އެންމެ ޅައިރުއްސުރެ އަށަގަންނުވަންޖެހޭ އާދަތައް ބުނެދިނުމަށާއި، އެ އާދަތަކަށް އެ ކުދިން އަހުލުވެރިކުރުވުމުގެ މަގުސަދުގައި ތައްޔާރުކޮށްފައިވާ ވާހަކަ ފޮތް ސީރީޒް އެކެވެ.
ގެވެށި ގުޅުން ކެމްޕެއިންއަކީ ގެވެށި އަނިޔާ އާ ދުރު މުޖުތަމައުއެއް ބިނާކުރުމަށް މަގުފަހިކުރުމުގެ ގޮތުން 2020 ވަނަ އަހަރުގެ ޖުލައި މަހުގެ 15 ވަނަ ދުވަހު މި މިނިސްޓްރީގެ ފަރާތުން ފެށި ކެމްޕެއިނެކެވެ.
މި ކެމްޕެއިންގެ ވަކިވަކި މަގްސަދުތަކުގެ ތެރޭގައި ގެވެށި އަނިޔާއަށް މުޖުތަމައު ހޭލުންތެރިކުރުމާއި، ގެވެށި އަނިޔާގެ ޝިކާރައަކަށްވާ ފަރާތްތައް ބާރުވެރިކުރުވުމަށް ބޭނުންވާ މައުލޫމާތު ފޯރުކޮށްދިނުމާއި، އެ ފަރާތްތަކަށް ފޯރުކޮށްދެވޭ ހިދުމަތްތައް އިތުރުކޮށް، އެ ހިދުމަތްތަކުގެ ފެންވަރު ރަގަޅުކުރުމުގެ އިތުރުން ގެވެށި އަނިޔާއާ ދުރުކޮށްދޭނެ ވިސްނުމާއި އުޅުން ޕްރޮމޯޓްކުރުމަށް ބޭނުންވާ ހޭލުންތެރިކަން އިތުރުކުރުން ހިމެނެ އެވެ.
