މުބާރާތުގެ ލީގު ބުރުގައި ހުރިހާ މެޗެއް ކާމިޔާބުކޮށް 100 ޕަސެންޓް ރެކޯޑަކާ އެކު އޮތް އަފްގާނިސްތާން ސީދާ ތިން ސެޓުން ބަލިކޮށް ފޯ ނޭޝަންސް ކަޕްގެ ފިރިހެން ބައިގެ ފައިނަލުން ސިންގަޕޫރު ޖާގަ ހޯދައިފި އެވެ.
މުބާރާތުގެ ފިރިހެން ބައިގެ ސެމީ ފައިނަލާ ހަމައަށް ސިންގަޕޫރު އައީ ލީގު ބުރުގައި ކުޅުނު ތިން މެޗުން ވެސް ބަލިވެ ލީގު ބުރުގެ ހަތަރު ވަނަ ޓީމުގެ ގޮތުގަ އެވެ. ކުޅުނު ތިން މެޗު ކާމިޔާބުކޮށް ރަނގަޅު ފޯމެއްގައި އޮތް އަފްގާނިސްތާން އަތުން ސިންގަޕޫރު މޮޅުވި މެޗުގެ ސެޓުތައް ނިމުނީ 25-18، 25-22 އަދި 25-22 އިންނެވެ.
ފިރިހެން ބައިގެ ސެމީ ފައިނަލް މެޗުގެ ފުރަތަމަ ސެޓު ހީކުރި ގޮތާ ހިލާފަށް މޮޅަށް ކުޅެ ލީޑު ކުރީ ސިންގަޕޫރުންނެވެ. ސެޓުގެ ކުރީކޮޅު ނެގި ފަސް ޕޮއިންޓްގެ ލީޑު ދަމަހައްޓައި އެ ލީޑު ފަހު ވަގުތު ފުޅާކުރި އެވެ. އެ ޓީމުގެ ދެ އެޓޭކަރުން ކަމަށްވާ ޖޯޑަން ވޮންގް އަދި އަޖޭ ސިންގްގެ ބާރު ހަމަލާތަކާ އެކު އަފްގާނިސްތާނަށް މެޗުގައި އުނދަގޫތައް ދިމާވި އެވެ. ސިންގަޕޫރުން ފުރަތަމަ ސެޓު ކާމިޔާބުކުރީ 25-18 އިންނެވެ.
ދެ ވަނަ ސެޓު ފަށައިގެން އަފްގާނިސްތާނުން ކުޅުން ރަނގަޅުކުރި ނަމަވެސް ޑިފެންސް ދަށްވެ، އަނެއްކާވެސް ސިންގަޕޫރުން ލީޑު ނެގި އެވެ. މި މެޗަކީ މިހާތަނަށް މި މުބާރާތުގައި އަފްގާނިސްތާނުގެ ބްލޮކިން ޑިޕާޓްމެންޓް އެންމެ ދަށްކޮށް ފެނުނު މެޗެވެ. އެ ޓީމަށް ލިބުނު ފުރުސަތުތަކުގެ ބޭނުންނު ކުރެވުމުން އޭގެ ފައިދާ ސިންގަޕޫރުން ނެގި އެވެ. އިތުބާރާ އެކު ކުޅެ މި ސެޓު ސިންގަޕޫރުން ގެންދިޔައީ 25-22 އިންނެވެ.
ފޯ ނޭޝަންސް ކަޕްގެ ސެމީ ފައިނަލްގައި އަފްގާނިސްތާނާއި ސިންގަޕޫރު ކުޅުނު މެޗުގެ ތެރެއިން.--- ފޮޓޯ: މުހައްމަދު ޝާބިން/ އަދަދު
ތިން ވަނަ ސެޓު ފަށައިގެން ވެސް ފެނުނީ އެއް މަންޒަރެކެވެ. އަފްގާނިސްތާނުގެ އެޓޭކަރުން ވަރަށް ރަނގަޅަށް ރީޑްކޮށް ސިންގަޕޫރުން މޮޅެތި ބްލޮކްކުރި އެވެ. މި ސެޓުގެ ފަހުކޮޅަށް ދިޔައިރު ހަތަރު ފަހަރެއްގެ މަތިން އަފްގާނިސްތާނުން ސްކޯ އެއްވަރުކުރި އެވެ. އެހެންނަަމަވެސް، 22-22 ގައި ސްކޯ އޮއްވައި މޮޅު ދެ ބްލޮކެއް ކޮށް ސިންގަޕޫރުން ސެޓު ނިންމާލި އެވެ. ސީދާ ތިން ސެޓުން އަފްގާނިސްތާނުން ބަލިކޮށް ސިންގަޕޫރުން މުބާރާތުގެ ފުރަތަމަ މޮޅު ހޯދީ ފަހު ސެޓު 25-22 އިން ހޯދައިގެންނެވެ.
މުބާރާތުގަ ފައިނަލުގައި ސިންގަޕޫރު ވާދަކުރާނީ މިރޭ ރާއްޖެ އާއި މެލޭޝިއާ ވާދަކުރާ މެޗުން މޮޅުވާ ޓީމަކާ ދެކޮޅަށެވެ. ފައިނަލް މެޗު ކުޅޭނީ މާދަމާ ރޭ 8:30 ގަ އެވެ. ފޯ ނޭޝަންސް ކަޕްގެ އަންހެން ބައިގެ ވެސް ފައިނަލުން ސިންގަޕޫރު ވަނީ ކުޅުނު ދެ މެޗުން މޮޅުވެގެން ފުރުސަތު ހޯދައިފަ އެވެ. ސިންގަޕޫރު އަންހެން އަދި ފިރިހެން ޓީމުގެ ވެސް ކޯޗަކީ ކުރިން ރާއްޖޭގެ ފިރިހެން ޓީމުގެ ކޯޗަކަށް ހުރި ތައިލެންޑްގެ ސުންޓޮން ފޮސީޓާ އެވެ.
