ފޯ ނޭޝަންސް ކަޕްގެ އަންހެން ޑިވިޝަންގެ ސެމީ ފައިނަލްގައި މިއަދު ހަވީރު މެލޭޝިއާއާ ދެކޮޅަށް ނިކުންނަނީ އިތުބާރާ އެކު ކަމަށާއި، ޓީމުގެ ހުރިހާ ފޯކަސް އެއް މިހާރު އޮތީ ސެމީ ފައިނަލް މެޗަށް ކަމަށް ގައުމީ އަންހެން ވޮލީބޯޅަ ޓީމްގެ ކޯޗު ނިޒާރު އިބްރާހިމް (ބޮޑޭ) ބުނެފި އެވެ.
ރާއްޖެ ސެމީ ފައިނަލް މެޗު ކުޅެން ޖެހުނީ ލީގު ބުރުގައި ކުޅުނު ދެ މެޗުން ބަލިވުމުންނެވެ. ތިން ޓީމު ވާދަކުރާ މުބާރާތުގެ އަންހެން ފައިނަލުގެ ފުރަތަމަ ޖާގަ ހޯދީ ސިންގަޕޫރެވެ. އެ ޓީމުން ވަނީ ލީގު ބުރުގެ ދެ މެޗުވެސް ކާމިޔާބު ކޮށްފަ އެވެ. ރާއްޖެ ސެމީ ފައިނަލް މެޗުގައި ނިކުންނާނީ މެލޭޝިއާ އާ ދެކޮޅަށެވެ.
މެލޭޝިއާއާ ދެކޮޅަށް ލީގު ބުރުގައި ކުޅުނު މެޗުން ރާއްޖެ ވަނީ ފަސް ސެޓު ކުޅެގެން 3-2 އިން ބަލިވެފަ އެވެ.
ސެމީ ފައިނަލް މެޗާ ގުޅޭގޮތުން ނިޒާރު ބުނީ ފުރަތަމަ މެޗަކީ ރާއްޖެ އަށް މޮޅުވެވޭނެ މެޗެއް ކަމަށާއި، އެ މެޗުގައި ގިނަ މިސްޓޭކްތަކެއް ވެސް ހެދުނު ކަމަށެވެ. ނަމަވެސް ކުޅުންތެރިން މަސައްކަތް ކޮށްގެން ކުޅެ ފަހު ވަގުތާ ހަމައަށް ހިތްވަރުކުރި ކަމަށާއި، މިހާރު ފޯކަސް ހުރީ އާ ވިސްނުމަކާ އެކު މިއަދުގެ މެޗަށް ނިކުންނަން ކަމަށެވެ.
ގައުމީ ފިރިހެން ޓީމުގެ ކުރީގެ އެސިސްޓަންޓް ކޯޗު ނިޒާރު ބުނީ ސެމީ ފައިނަލް މެޗަކީ އާ މެޗެއް ކަމަށާއި، ކުރީ މެޗުގެ ނަތީޖާ އާއި ދެއްކުނު ކުޅުމާ މެދު އެއްވެސް ވަރަކަށް ނުވިސްނާ ކަމަށެވެ. ހަމައެކަނި ވިސްނުމަކީ މި މެޗަށް ރަނގަޅަށް ތައްޔާރުވެ މެޗު ކާމިޔާބު ކުރަން ކަމަށް ވެސް ނިޒާރު ބުނެފައިވެ އެވެ.
"ފުރަތަމަ މެޗުގައިވެދިޔަ ކަންތައް އެ އޮތީ ނިމިފައި. މިހާރު މިއީ އާ މެޗެއް. މިހާރު މުބާރާތުގެ މިހާ ހިސާބަށް އައިއިރު ޓީމަށް ކުރިއެރުން ވެސް ލިބިއްޖެ. އަހަރުމެންގެ އަސްލު ފެންވަރުގައި ކުޅެވޭނެ ކަމަށް އުއްމީދުކުރަނީ، އެ އިތުބާރު އެބައޮތް" ކޯޗު ނިޒާރު ބުންޏެވެ.
ނިޒާރު ބުނީ ސެމީ މެޗުގެ ކުރިން އެއް ދުވަސް ރެސްޓް ކުރަން ލިބުމަކީ ވެސް ލިބުނު ހިތްހަމަޖެހުމެއް ކަމަށާއި، ރަނގަޅަށް ރިކަވާވެ، މެޗަށް ތައްޔާރުވާން އެކަށިގެންވާ ވަގުތު ހުރިހާ ގޮތަކުން ވެސް ޓީމަށް ލިބިއްޖެ ކަމަށެވެ.
ރާއްޖެ އަކީ ވަރުގަދަ ޓީމެއް، ސެމީ ފައިނަލް މެޗު އުނދަގޫވާނެ: މެލޭޝިއާ
މެލޭޝިއާގެ ކޯޗު ލިއު ކޮކް ހޯ ބުނީ އޭނާގެ ޒުވާން ޓީމަށް މި މުބާރާތުން ގިނަ ފިލާވަޅުތަކެއް ލިބިއްޖެ ކަމަށާއި، ކުރިއަށް އޮތް މެޗަކީވެސް އާ ޗެލެންޖެއް ކަމަށެވެ.
އޭނާ ބުނީ ސިންގަޕޫރު މެޗުންވެސް ބަލިވި މައިގަނޑު ސަބަބަކީ ކުޅުންތެރިންގެ ތަޖުރިބާ މަދުވުން ކަމަށާއި، ޒުވާން ކުޅުންތެރިންނަށް ޕްރެޝަރު ދަނޑިވަޅުތަކުގައި ރަނގަޅަށް ނުކުޅެވެނީ ކަމަށެވެ. އޭނާ ބުނީ މުހިންމު ދަނޑިވަޅުގައި ކުޅުންތެރިން ހިތް އަވަސްވެ، ނިންމުންތައް ގޯސްވަނީ ކަމަށާއި، ސެމީ މެޗުގައި އެކަން ރަނގަޅުވާނެ ކަމަށް އުއްމީދުކުރާ ކަމަށެވެ.
"ކުޅުން ގޯހެއް ނޫން. ޕްރެޝަރަށް ދާ ގަޑީގައި މާ މިސްޓޭކް ގިނަވަނީ، ސިންގަޕޫރު އަތުން ބަލިވީވެސް އެހެންވެ. ދެން މިހާރު އުއްމީދުކުރަނީ ސެމީ މެޗުގައި ރަނގަޅު ކުރެވޭނެކަމަށް" ކޯޗު ބުންޏެވެ.
ކޯޗު ލިއު ހޯ ބުނީ ސެމީ މެޗުގައި ރާއްޖޭގެ ގިނަ ސަޕޯޓަރުން ހޯލަށް އަންނާނެކަން އެނގޭކަމަށާއި، ސަޕޯޓަރުން ގިނަވުމަކީ އެ ޓީމުން ވެސް ބޭނުންވާ ގޮތް ކަމަށެވެ.
މެލޭޝިއާ އާއި ރާއްޖެ ފޯ ނޭޝަންސް ކަޕްގެ އަންހެން ޑިވިޝަނުގެ ސެމީ ފައިނަލުގައި ބައްދަލުކުރާ މެޗު ފަށާނީ ރާއްޖެ ގަޑިން 16:00 ގަ އެވެ.
