ފޯ ނޭޝަންސް ކަޕްގެ ފިރިހެން ބައިގެ ލީގު ބުރުގައި މެލޭޝިއާ އަތުން ވެސް ސިންގަޕޫރު ބަލިވެއްޖެ އެވެ.
މެލޭޝިއާ އަތުން މިއަދު 3-1 ސެޓުން ސިންގަޕޫރު ބަލިވުމާ އެކު އެ ޓީމު ދިޔައީ ލީގު ބުރުގެ ފުލަށެވެ. ސެމީ ފައިނަލުގައި އެ ޓީމު ނުކުންނާނީ ލީގު ބުރުގެ އެއް ވަނައާ ދެކޮޅަށެވެ.
ލީގު ބުރުގެ އެއް ވަނަ ޔަގީން ވާނީ މިރޭ ރާއްޖެ އާއި އަފްގާނިސްތާން ވާދަކުރާ މެޗުގެ ނަތީޖާ އިންނެވެ. މިރޭގެ މެޗު ފަސް ސެޓަށް ގޮސްފިނަމަ އެއް ވަނަ ލިބޭނީ ކުޅުނު ތިން މެޗުގެ ތެރެއިން ދެ މެޗުން މޮޅުވެފައިވާ މެލޭޝިއާ އަށެވެ. އެނޫން ނަތީޖާ އަކުން ނިމިއްޖެ ނަމަ މޮޅުވާ ޓީމަކަށް ލީގު ބުރުގެ އެއް ވަނަ ލިބުމުގެ ފުރުސަތު ބޮޑުވާނެ އެވެ.
ސިންގަޕޫރު އަތުން މެލޭޝިއާ މިއަދު މޮޅުވި މެޗުގެ ސެޓުތައް ނިމުނީ 25-22، 25-18، 20-25 އަދި 25-17 އިންނެވެ.
މެޗުގެ ފުރަތަމަ ސެޓު ފެށިގޮތަށް މެލޭޝިއާ އިން ވަނީ ފޯމުގައި ކުޅެ ފަސް ޕޮއިންޓްގެ ލީޑެއް ނަގައިފަ އެވެ. އެ ގޮތުން، 7-2 އިން މެލޭޝިއާ ލީޑުގައި އޮއްވާ ސިނގަޕޫރުން ޓައިމްއައުޓެއް ނެގި އެވެ. އޭގެ ފަހުން މަޑު މަޑުން ސްކޯކައިރިކޮށް 7-7 އިން އެއްވަރުކުރި އެވެ. އަނެއްކާ ވެސް މެލޭޝިއާގެ ބާރު ހަމަލާތަކާ އެކު އެޓީމުން އަލުން ލީޑު ނެގި އެވެ. މި ލީޑުގައި އޮވެ ކުޅެމުން ގޮސް ސެޓުގެ ފަހުކޮޅު ސްކޯ އޮތީ 19-15 ގަ އެވެ. މި ދަނޑިވަޅުގައި ރަނގަޅު ބްލޮކްތަކެއްކޮށް ސިންގަޕޫރުން 21-20 އަށް ސްކޯ ކައިރި ކުރި އެވެ.
މެލޭޝިއާ އާއި ސިންގަޕޫރު ފޯ ނޭޝަންސް ކަޕްގައި ވާދަކުރި މެޗުގެ ތެރެއިން.--- ފޮޓޯ: މުހައްމަދު ޝާބިން/ އަދަދު
ނަމަވެސް ފަހު ވަގުތު މުހައްމަދު ފަހުމީގެ ބާރު ހަމަލާތަކުން މެލޭޝިއާ އިން 25-22 އިން މި ސެޓު ކާމިޔާބުކުރި އެވެ.
ދެ ވަނަ ސެޓުވެސް މެލޭޝިއާ އިން ފެށީ ފޯމުގަ އެވެ. ހަތަރު ޕޮއިންޓްގެ ލީޑެއް ސެޓު ފެށި ގޮތަށް ނަގައި މަޑު މަޑުން އެ ލީޑު ފުޅާކޮށް ހިފެހެއްޓި އެވެ. އެޓީމްގެ ދެ ބްލޮކަރުންކަމަށްވާ ޝޮން ޝިއަން އާއި ރަޔަން ޓޭންގެ މޮޅު ކުޅޫމާއިއެކު މެލޭޝިއާ އިން މި ސެޓު ހޯދީ 25-18 އިންނެވެ.
ތިން ވަނަ ސެޓު ފަށައިގެން އެއްވަރުކޮށް ދިޔަ ނަމަވެސް ސިންގަޕޫރުން ލީޑު ނެގި އެވެ. އެ ޓީމުގެ ޖޯޑަން ރްޔާން އާއި އަޖޭ ސިންގްގެ ބާރު ހަމަލާތަކުން ހަތަރު ޕޮއިންޓްގެ ލީޑެއް ހޯދައި ސެޓުގެ ފަހުކޮޅާ ހަމައަށް އެ ލީޑު ދެމެެހެއްޓި އެވެ. މި ސެޓުގައި މެލޭޝިއާގެ ޑިފެންސް ފެނުނީ ތަންކޮޅެއް ދަށްކޮށެވެ. އެ ގޮތުން، 16-21 އަށް ސްކޯ ދިޔުމާ އެކު މެލޭޝިއާ އިން ޓީމު ހަމައަކަށް އަޅުވަން ޓައިމްއައުޓެއް ވެސް ނެގި އެވެ.
ޓައިމް އައުޓަށް ފަހު އަރައި، ސްކޯ 20-23 އަށް ކައިރިކުރުމުން ސިންގަޕޫރުން ވެސް އެ ޓީމުގެ ޓައިމްއައުޓްގެ ބޭނުން ކުރި އެވެ. ދެން އައި ދެ ޕޮއިންޓް ހޯދައި 20-25 އިން މި ސެޓު ސިންޕޫރުން ކާމިޔާބުކުރި އެވެ.
ހަތަރު ވަނަ ސެޓުވެސް ލީޑުގައި އޮވެ ފެށީ މެލޭޝިއާ އިންނެވެ. ސެޓު ފެށިގޮތަށް ބާރު ހަމަލާތަކާއި ވަރުގަދަ ބްލޮކްތަކާ އެކު އެޓީމުން ލީޑު ދެމެހެއްޓި އެވެ. ސެޓުގެ މެދުތެރެއިން ލީޑު ފަސް ޕޮއިންޓަށް ފުޅާކުރުމާ އެކު ސިންގަޕޫރު ޓީމަށް އެނބުރި އައުމަށް އުނދަގޫތައް ކުރިމަތިވި އެވެ. ނަތީޖާ އެއްގެ ގޮތުން މެލޭޝިއާ އިން މި ސެޓު 25-17 އިން ކާމިޔާބުކޮށް މެޗުން މޮޅުވި އެވެ.
މުބާރާތުގެ ފިރިހެން ބައިގެ ސެމީ ފައިނަލް ދެ މެޗު މާދަމާ އޮންނާނެ އެވެ. މި ދެ ޓީމު ސެމީ ފައިނަލުގައި ކުޅޭނެ ޓީމެއް އިނގޭނީ މިރޭ ލީގު ބުރުގެ ފަހު މެޗުގައި ރާއްޖެ އާއި އަފްގާނިސްތާން ވާދަކުރާ މެޗުގެ ނަތީޖާ އިންނެވެ.
