ފޯ ނޭޝަންސް ކަޕްގެ އަންހެން ޑިވިޝަނުގައި ކުޅުނު ދެ މެޗުން ވެސް މޮޅުވެ، ސިންގަޕޫރުން މުބާރާތުގެ ފައިނަލުގެ ފުރަތަމަ ޖާގަ ހޯދިއިރު، ދެ ވަނަ އަށް ދިޔަ މެލޭޝިއާ އާއި ތިން ވަނައިގައި އޮތް ރާއްޖެ ސެމީ ފައިނަލުގައި ވާދަކުރަން ޖެހިއްޖެ އެވެ.
ފޯ ނޭޝަންސް ކަޕްގެ އަންހެން ޑިވިޝަނުގެ ލީގު ބުރުގެ ކުޅުން ނިމިފައިވާއިރު، ދެ މެޗުން މޮޅުވެ، ސިންގަޕޫރު ވަނީ އެއް ވަނަ ހޯދައިފަ އެވެ. ސިންގަޕޫރުން މި ފަހަރުގެ ފޯ ނޭޝަންސް ކަޕްގައި ވާދަކުރާއިރު އަންހެން އަދި ފިރިހެން ޓީމުގެ ކޯޗަކަށް ހުރީ މީގެ ކުރިން ރާއްޖޭގެ ގައުމީ ފިިރިހެން ޓީމުގެ ކޯޗަކަށް ހުރި ތައިލެންޑްގެ ސުންޓޮން ފޮސީޓާ އެވެ.
ދެ ވަނަ އަށް ދިޔަ މެލޭޝިއާ އިން ވަނީ ލީގު ބުރުގައި ފަސް ސެޓު ކުޅެގެން ރާއްޖެ ބަލިކޮށްފަ އެެވެ. ރާއްޖެ އޮތީ ތިން ޓީމު ވާދަކުރާ މި ޑިވިޝަނުގެ ތިން ވަނައިގަ އެވެ.
މެލޭޝިއާ އާއި ރާއްޖެ ކުޅޭ ސެމީ ފައިނަލް އޮންނާނީ މާދަމާ ހަވީރު 16:30 ގަ އެވެ. އަދި އެ މެޗުން މޮޅުވާ ޓީމެއް ހޯމަ ދުވަހު ހަވީރު 16:30 ގައި ކުޅޭ އަންހެން ޑިވިޝަނުގެ ފައިނަލުގައި ސިންގަޕޫރާ ބައްދަލުކުރާނެ އެވެ.
ޒުވާނުންގެ މަރުކަޒު އެތެރެ ކޯޓުގައި މިއަދު ކުޅުނު މެޗު ފަށައިގެން ސިންގަޕޫރުން ވަނީ އިއްޔެ ރާއްޖެ އަތުން ތިން ސެޓުން މޮޅުވިއިރު، ދެއްކި ފަދަ ކޮންފިޑެންސެއްގައި ފުރަތަމަ ސެޓުގެ ކޮންޓްރޯލް ނަގައިގެން ކުޅެފަ އެވެ.
ފުރަތަމަ ސެޓުގެ މެޖޯރިޓީ ބައިގައި ސިންގަޕޫރުން ފަސް ޕޮއިންޓުގެ ލީޑެއްގައި އޮތްއިރު، އެ ޓީމުން ސެޓު ނިމުމާ ހަމައަށް ކުޅެލީ މާ ބޮޑު ޕްރެޝަރެއް ނެތި އެވެ. ސިންގަޕޫރުން މި ސެޓު ގެންދިޔައީ 25-20 އިންނެވެ.
ސިންގަޕޫރު ކުޅުންތެރިއަކު ފޮނުވާލާ ޝޮޓެއް ބްލޮކްކުރަން މެލޭޝިއާ ދެ ކުޅުންތެރިން މަސައްކަތް ކުރަނީ.--- ފޮޓޯ: މުހައްމަދު ޝާބިން/ އަދަދު
މެލޭޝިއާ އިން ދެ ވަނަ ސެޓު ފަށައިގެން ކޮންމެ ވެސް ވަރަކަށް އެ ޓީމުގެ ރިސީވް ކުރުމުގެ ކަންކަން ރަނގަޅުކުރި އެވެ.
އެކަމަކު، މެލޭޝިއާ އަށް މައްސަލަ ދިމާވީ އެކަން ދަމަހައްޓައި ރަނގަޅަށް ކުޅެން ލިބުނު ވަގުތުގައި އެކަން ނުކުރެވުމުންނެވެ. އޭގެ ބަދަލުގައި ފުލުފުލުގައި ސިންގަޕޫރުން ކާމިޔާބުކުރި އެޓޭކިން ބޯޅަތަކާ އެކު އެ ޓީމުން ވަރަށް ރަނގަޅު ލީޑަކާ އެކު މި ސެޓުގެ ކޮންޓްރޯލް ނެގި އެވެ. އެ ގޮތުން، ސެޓުގެ މެދަކާ ހަމައިން ސިންގަޕޫރުން ވަނީ ހަތް ޕޮއިންޓުގެ ލީޑެއް ވެސް ނަގައިފަ އެވެ. އެއާ އެކު، މެލޭޝިއާ އިން ޓައިމްއައުޓެއް ވެސް ނެގި އެވެ. އެކަމަކު، ޓައިމްއައުޓަށް ފަހު ވެސް ފެނިގެންދިޔައީ ސިންގަޕޫރު ކައިރީގައި މެލޭޝިއާ އަށް ކުޅެން އުނދަގޫވި މަންޒަރެވެ. ނަތީޖާ އަކަށްވީ ސިންގަޕޫރުން ދެ ވަނަ ސެޓު، 25-14 އިން ގެންގޮސް ސެޓެއް ނުގެއްލި މެޗުން މޮޅުވާން އިތުބާރު ހޯދުމެވެ.
ތިން ވަނަ ސެޓުގައި މެލޭޝިއާ އިން ކޮންމެ ވެސް ވަރަކަށް ކުޅުން ރަނގަޅުކުރި ނަމަވެސް، ސިންގަޕޫރުން ފެނުނީ މާ ވަރުގަދަކޮށެވެ. އެ ޓީމުން މުޅި މެޗުގައި ކުޅެލި ވަރުގަދަ ރޫހުގައި މި ސެޓު، 25-19 އިން ގެންގޮސް މެޗުން މޮޅުވީ އެވެ.
މުބާރާތުގައި މިއަދު، ދެން، އޮންނާނީ ފިރިހެން ޑިވިޝަނުގެ ލީގު ބުރުގެ ފަހު މެޗުތަކެވެ. އެ ގޮތުން 16:30 ގައި އޮތީ ސިންގަޕޫރާއި މެލޭޝިއާ ކުޅޭ މެޗެވެ. އަދި މިރޭ، 20:30 ގައި ރާއްޖެ ކުޅޭނީ އަފްގާނިސްތާނާ އެވެ.
