ތުރުކީގައި ބިންހެލުމަށް ފަހު ފޭކު ހަބަރު ފަތުރާ ކަމަށް ބުނެ ނޫސްވެރިން ހައްޔަރު ކުރަމުންދާ ކަމަށް ރިޕޯޓުތައް ބުނެފި އެވެ.
ބީބީސީއިން ރިޕޯޓުކުރި ގޮތުގައި ތުރުކީގެ އިދާރާތަކުން ދަނީ މަދުވެގެން ހަތަރު ނޫސްވެރިންގެ މައްސަލަ ބަލަމުންނެވެ. އެ މީހުންނަށް ތިން އަހަރުގެ ޖަލު ހުކުމެއް އައުން އެކަށީގެންވެ އެވެ.
ނޫސްވެރިންގެ ހައްގުތަކަށް މަސައްކަތް ކުރާ ގްރޫޕްތަކުން ބުނާ ގޮތުގައި ގިނަ އަދަދެއްގެ ނޫސްވެރިން ބަންދުކޮށްފައިވެ އެވެ.
މި މަހުގެ ކުރީކޮޅު ބިންހެލުން އައި ހިސާބުތަކަށް ވަޑައިގެން ރައީސް ތައްޔިބް އުރުދުގާން ވިދާޅުވީ ސިޓީތައް އަލުން ބިނާކުރާނެ ކަމަށެވެ. އޭގެ އިތުރުން "ފޭކު ހަބަރު" ފަތުރައި "އިޖުތިމާއީ ގޮތުން ހަލަބޮލިކުރަމުންދާ" ފަރާތްތައް ހޯދައި ފިޔަވަޅު އަޅާނެ ކަމަށް ވިދާޅުވި އެވެ.
ރިޕޯޓުތައް ބުނާ ގޮތުން ނޫސްވެރިންގެ މައްސަލަތައް ބަލަމުން ދަނީ މިދިޔަ އޮކްޓޯބަރު މަހު އަމަލު ކުރަން ފެށި އާ ގާނޫނެއްގެ ދަށުންނެވެ. އެއީ ދޮގު މައުލޫމާތު ފެތުރުން ޖިނާއީ ކުށަކަށް ހަދައި، ނިއުސް ސައިޓުތަކާއި ސޯޝަލް މީޑިއާ ކޮންޓްރޯލް ކުރަން އިދާރާތަކަށް ބޮޑު ބާރުތަކެއް ލިބިދޭ ގާނޫނެކެވެ.
ކޮމިޓީ ޓު ޕްރޮޓެކްޓް ޖާނަލިސްޓްސް (ސީޕީޖޭ) އިން ބުނީ ތިން ނޫސްވެރިއަކާ ދެކޮޅަށް މިހާރު ވެސް ޖިނާއީ ދައުވާ އުފުލާފައިވާ ކަމަށެވެ.
އިދިކޮޅު ޕާޓީތަކުން ބުނާ ގޮތުގައި އެއީ ހިޔާލު ފާޅުކުރުމުގެ މިނިވަން ކަމަށް ހުރަސް އަޅައި، ކަންކަން ކޮންޓްރޯލް ކުރުމަށް އުފެއްދި "ސެންސާޝިޕް" ގާނޫނެކެވެ.
ހައްޔަރުކޮށްފައިވާ ނޫސްވެރިންގެ ސީދާ އަދަދު ސާފެއް ނޫނެވެ. އެހެން ނަމަވެސް ފުލުހުން މިދިޔަ އަންގާރަ ދުވަހު ބުނީ ފޭކު ޕޯސްޓުތައް ކުރުމުން 134 މީހުން ބަންދުކޮށްފައި ތިބި ކަމަށެވެ. އޭގެ ތެރެއިން 25 މީހުންގެ ބަންދު މުއްދަތު އިތުރުކުރި އެވެ. އެ މީހުންގެ ވަނަވަރު ހާމައެއް ނުކުރެ އެވެ.
