ޔަމަންގެ އަދަންގައި ހުންނަ މަރުކަޒީ ބޭންކުގައި އެއް ބިލިއަން ޑޮލަރުގެ ޑިޕޮސިޓެއް ބަހައްޓަން ސައުދީ އަރަބިއްޔާއިން ނިންމާފައިވާ ކަމަށް ރިޕޯޓުތައް ބުނެފި އެވެ.
ޔަމަން ފައިސާގެ އަގު ވެއްޓި، ތެލާއި ތަކެތީގެ އުފުލެމުން ދާތީ ތަކުލީފުތައް ކުރިމަތިވަމުން ދަނިކޮށް ސައުދީން ނިންމި ނިންމުން އަދި ރަސްމީކޮށް އިއުލާނެއް ނުކުރެ އެވެ.
އެހެން ނަމަވެސް، ސައުދީގެ މަސްދަރަކުން ރޮއިޓާޒް ނޫހަށް ބުނީ އިންސާނީ އެހީއާ ގުޅޭ ބޮޑު ކޮންފެރެންސެއްގެ ތެރެއިން އެކަން އިއުލާން ކުރައްވާނީ ރިޔާދުގައި ހުންނަަ ކިންގް ސަލްމާން ހިޔުމެނިޓޭރިއަން އެއިޑް އެންޑް ރިލީފް ސެންޓަރުން ކަމަށެވެ.
ޔަމަނުގެ ގާނޫނީ ސަރުކާރާ ދެކޮޅަށް އިރާނުގެ އެއްބާރުލުމާ އެކު ހޫތީން ހަނގުރާމަ ފެށުމުން، ޔަމަން ސިފައިންނަށް އެހީވުމަށް ސައުދީން އަސްކަރީ ކޯލިޝަނެއް ހެދީ 2015 ގަ އެވެ. މިއަދާ ހަމައަށް ވެސް ޔަމަނުގެ ދާހިލީ ހަމަނުޖެހުން ދަނީ ކުރިއަށެވެ.
ހަމަނުޖެހުމުގައި މިހާރު މާ ބޮޑު ހަމަލާ ބަދަލުކުރުމެއް ނެތް ނަމަވެސް ސުލްހަ އިއުލާންކޮށްފައެއް ނުވެ އެވެ. ވަގުތީ ގޮތުން ސުލްހަ ގެނައުމަށް އދ. މެދުވެރިވެގެން ސޮއިކުރި އެއްބަސްވުމެއް ދިގުދަންމަމުން ގޮސް މުއްދަތު ހަމަވީ އޮކްޓޯބަރުގަ އެވެ. އޭގެ ފަހުން އެއްބަސްވުން ދަމަހައްޓަން ހޫތީން ދެކޮޅު ހެދި އެވެ.
ހަނގުރާމައިގެ ސަބަބުން އިގްތިސާދީ ގޮތުން ބަލިކަށިވެ ބޮޑު އިންސާނީ ކާރިސާއެއް ޔަމަނުގައި އުފެދިފައިވާ އިރު، އެ ގައުމުގެ އިގްތިސާދީ ރިފޯމް ޕްރޮގްރާމަށް އެހީވާން އަރަބް މަނިޓަރީ ފަންޑުން ނޮވެމްބަރު މަހު އެއް ބިލިއަން ޑޮލަރުގެ އެއްބަސްވުމެއްގައި ސޮއިކުރި އެވެ.
