ފްލޯޓިން ސިޓީގެ މަސައްކަތް ކުރިއަށް ދާ ގޮތުގެ މާ ބޮޑު ތަފްސީލެއް ނޭނގޭ ކަމަށާއި އެހެންނަމަވެސް އެ މަސައްކަތް ނުހުއްޓި ކުރިއަށް ދާ ކަމަށް ހައުސިން އެންޑް ޕްލޭނިން މިނިސްޓަރު މުހައްމަދު އަސްލަމް ވިދާޅުވެއްޖެ އެވެ.
ފްލޯޓިން ސިޓީ ފަޅުތައް ޑަޗް ޑޮކްލޭންޑްސްއާ ހަވާލުކުރެވުނު ފަހުން މިވީ ދިހަ އަހަރުގެ ތެރޭގައި އެއިން ފަޅެއްގައި އެއްވެސް މަސައްކަތެއް ކޮށްފައެއް ނުވެ އެވެ. މިފަހުން އެ ތަނުގައި ވިލާ އަޅަން ރާއްޖޭގެ ކުންފުންޏެއް ކަމުގައިވާ ބައިސަން މޯލްޑިވްސްއާ ހަވާލުކުރި ނަމަވެސް އަމަލީ މަސައްކަތް މިހާތަނަށް ފެށިފައި ނުވެ އެވެ.
އޭގެ ފަހުން އެ މަޝްރޫއު އިންޓެގްރޭޓެޑް ޓޫރިޒަމް ޕްރޮޖެކްޓަކަށް ބަދަލުކޮށް، ވަނީ މަސައްކަތް ފަށައިފަ އެވެ. އެހެންނަމަވެސް ދިގުލައިގެން ގޮސްފައިވާ މަޝްރޫއުގެ މިހާތަނަށް ނިމިފައިވަނީ މޮކަޕް އެކަންޏެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ޕްލޭނިން މިނިސްޓަރު ހާޒިރުކުރުމުން މިކަމާ ގުޅޭ ސުވާލު ފްލޯޓިން ސިޓީ މަޝްރޫއުގެ މަޝްވަރާތައް ފެށި ފަޅުތައް ދޫކުރި އިރު ވެސް ހައުސިން މިނިސްޓަރު ކަމުގައި ހުންނެވި އަސްލަމްއާ ވަނީ އަމާޒުކޮށްފަ އެވެ.
ސުވާލު ކުރަން ލިބުނު ފުރުސަތުގައި ފުނަދޫ ދާއިރާގެ މެންބަރު އަހުމަދު ޝާހިދު ވަނީ އެ މަޝްރޫއަށް ކިތައް ފަޅު ދީފައިވޭތޯ ސުވާލު ކުރައްވައިފަ އެވެ. އަދި އެ މަސައްކަތް ދަނީ ކިހިނެއްތޯ ސުވާލު ކުރައްވައިފަ އެވެ.
އެ ސުވާލަށް ޖަވާބު ދެއްވަމުން އަސްލަމް ވިދާޅުވީ ހަނދާނަށް އަންނަނި "އެއް ފަޅު ނޫނީ ދެ ފަޅު" ދެވިފައިވާ ކަމަށެވެ.
އެ ސުވާލަށް އެދެވޭ ޖަވާބެއް ނުލިބުމުން، ތިނަދޫ އުތުރު ދާއިރާގެ މެންބަރު ވެސް އަބްދުލްމުގުނީ ވެސް ވަނީ އެކަމާ ގުޅޭ ގޮތުން ސުވާލު ކުރައްވައިފަ އެވެ. މުގުނީ އެއްސެވީ ފްލޯޓިން ސިޓީ ހަދަން ދޫކުރި ކިތައް ފަޅު ހިއްކާފައިވޭތޯ އާއި އެ ތަންތަން ވިއްކައިގެން އާމްދަނީއެއް ލިބިފައިވޭތޯ އެވެ.
އެއާއެކު ރިޔާސަތުގައި އިންނެވި މަޖިލީހުގެ ރައީސް މުހައްމަދު ނަޝީދު ވަނީ ފްލޯޓިން ސިޓީއާ ގުޅޭ ގޮތުން ވަރަށް ފުރިހަމަ ތަފްސީލް ދެއްވުމަށް މިނިސްޓަރުގެ ކިބައިން އެދިވަޑައިގެންފަ އެވެ.
"އެކަމާ ގުޅޭ ވީހާ ވެސް ބޮޑު ތަފްސީލެއް ދެއްވުމަކީ ވަރަށް ބޮޑަށް އަޅުގަނޑު ހިތުން މި މަޖިލީހަށް ލިބޭނެ، ވަޒީރަށް އެނގިވަޑައިގަންނަވާނެ އެކަމާ ގުޅޭ އެންމެހާ ތަފްސީލު،" އަޑަށް ބާރު ލައްވައި ނަޝީދު ވިދާޅުވި އެވެ.
އެކަމާ ގުޅިގެން އަސްލަމް ވިދާޅުވީ ފްލޯޓިން ސިޓީގެ މަސައްކަތުގައި ބަޔަކު އުޅޭތާ ވަރަށް ގިނަ ދުވަސް ވެއްޖެ ކަމަށާއި އެންމެ ފުރަތަމަ އެކަން ކުރަން އޮތީ ފަޅު ހިިއްކައިގެން ކަމަށް ހަނދާނަށް ނާންނަ ކަމަށެވެ.
"މޮކަޕްއެއް ހެދުމަށް ރާއްޖޭގެ ކުންފުންޏަކާ ހަވާލުކުރިކަން ދެނަހުރިން، ސީދާ މިނިސްޓްރީގެ ދަށުން މިހާރު ހިނގާ ޕްރޮޖެކްޓެއް ނޫން އެއީ، އެހެންވީމާ އޭގެ ހުރިހާ ތަފްސީލެއް އެންމެ އެކިއުރޭޓް ލެވެލްގައި ނޭނގިދާނެ،" އަސްލަމް ވިދާޅުވި އެވެ.
"ހުއްޓިފައި އޮތް ކަމަކަށް ނުދެންނެވޭނެ، އެކަމަކު ވަރަށް ދުވަސް ވެއްޖެ," އަސްލަމް ވިދާޅުވި އެވެ.
ނަޝީދުގެ ވެރިކަމުގައި ސޮއިކުރެވުނު އެއްބަސްވުމާއެކު، ޑަޗް ޑޮކްލޭންޑްސްއަށް މާލެ އަތޮޅުން ފަސް ފަޅެއް ވަނީ ދޫކުރެވުނެވެ. މި ފަޅުތައް އެ ކުންފުންޏަށް ކުއްޔަށް ދޫކޮށްފައިވަނީ 27 ޖެނުއަރީ 2011 ގަ އެވެ.
އެހެންނަމަވެސް އޭގެ ތެރެއިން ދެ ފަޅު ވަނީ ކުރީގެ ރައީސް ޔާމީން އަބްދުލްގައްޔޫމްގެ ވެރިކަމުގައި ކުއްޔަށް ދީފަ އެވެ.
ޑަޗް ޑޮކްލޭންޑްސްއާއެކު ޖޮއިންޓް ވެންޗާއެއް ހަދައިގެން ފްލޯޓިން ރަށްތަކެއް ހަދަން މި ސަރުކާރުން ސޮއިކުރީ 2021ގެ މާޗުގަ އެވެ. "ފްލޯޓިން ސިޓީ މޯލްޑިވްސް" ގެ ނަން ދީފައިވާ މި އެއް ބިލިއަން ޑޮލަރުގެ ޕްރޮޖެކްޓުގެ ފުރަތަމަ ފިޔަވަހީގެ ތެރޭގައި ރިސޯޓާއި ޑޮކްޔާޑާއި ލަގްޒަރީ ވިލާތަކުގެ އިތުރުން ދިވެހިންނަށް ވިއްކާލަން އަޅާ ގެތައް ހިމެނޭނެ ކަން އިއުލާނު ކުރި އެވެ.
ފުރަތަމަ ތަރައްގީކުރާނެ ކަމަށް ބުނީ އާރަށާ އެންމެ ކައިރިން އޮންނަ 200 ހެކްޓަރުގެ ފަޅެވެ. އެ ފަޅުގައި ތަރައްގީކުރާ 5000 ހައުސިން ޔުނިޓުގެ މަސައްކަތް ނިމުނު ފެބްރުއަރީ މަހުގެ 10 ގައި ވަނީ ބައިސަން މޯލްޑިވްސްއާ ހަވާލު ކުރި އެވެ.
