ރިޔާސީ އިންތިހާބުގައި ކުރިމަތިލުމަށް ނަން ހުށަހެޅުމުގެ މުއްދަތު އިތުރުކުރަން ގާނޫނަށް އިސްލާހު ގެނައުމަށް ހުށަހަޅައިފި އެވެ.
މި ބިލު މިއަދު ހުށަހެޅުއްވީ ސަރުކާރުގެ ފަރާތުން ކެލާ ދާއިރާގެ މެންބަރު އިބްރާހިމް ޝަރީފެވެ.
ބިލުގައި ބުނެފައިވާ ގޮތުގައި ރިޔާސީ އިންތިހާބުގައި ވާދަކުރުމަށް އެދޭ މީހުން، އެކަމަށް އިލެކްޝަންސް ކޮމިޝަނަށް ހުށަހެޅުމަށް މަދުވެގެން 14 ދުވަސް ދޭން ވާނެ އެވެ.
މިހާރު ގާނޫނުގައިވާ ގޮތުން އިންތިހާބަށް ކުރިމަތިލުމަށް ލިބެނީ 10 ދުވަހެވެ.
މި އަހަރުގެ ރިޔާސީ އިންތިހާބު ބާއްވާނެ ތާރީހެެއްގެ ގޮތުގައި އިލެކްޝަން ކޮމިޝަނުން ލަފާކުރާ ތާރީހަކީ ސެޕްޓެމްބަރު 9، ވަނަ ދުވަހެވެ. ދެ ވަނަ ބުރަކަށް ގޮސްފި ނަމަ އެ އިންތިހާބު ބާއްވާނެ ތާރީހެއްގެ ގޮތުގައި ކަނޑައަޅާފައިވަނީ ސެޕްޓެމްބަރު 30، އެވެ.
އިންތިހާބުގައި ވާދަކުރުމުގެ ފުރުސަތު ހުޅުވާލުމަށް ހަމަޖެހިފައިވާ ކަމަށް އީސީން އިއުލާނުކޮށްފައިވަނީ ޖުލައި 23، އިން އޮގަސްޓު 3، ގެ ނިޔަލަށެވެ.
މި ބިލު ގާނޫނަކަށް ބަދަލުވުމާއެކު މި މުއްދަތު އޮގަސްޓު 6، ވަނަ ދުވަހަށް އިތުރުވެގެން ދާނެ އެވެ.
