ސޮނީ ކަނޑުފޯރީގެ ފުރަތަމަ ފިޒިކަލް މުބާރާތުގެ އެއްވަނަ ޓީމް ބަނޫން އިން ހޯދައިފި އެވެ.
މިދިޔަ ހޮނިހިރު ދުވަހުގެ ހެނދުނު 6:00 ގައި ފެށި އެ މުބާރާތުގެ ޓީމް ކެޓެގަރީގައި ޖުމްލަ ފަސް ޓީމަކުން ބައިވެރިވި އެވެ. އަދި، ސޯލޯ ކެޓެގަރީގައި ރާއްޖޭގެ އެކި ކަންކޮޅުން ވާޗުއަލްކޮށް ގިނަ ބަޔަކު ބައިވެރިވި އެވެ.
މުބާރާތުގެ ޓީމް ކެޓެގަރީން އެއްވަނަ ހޯދައި ޓީމް ބަނޫން އިން 15،000ރ. ގެ ފައިސާގެ އިނާމާއި 10،000ރ. ގެ ގިފްޓު ވައުޗަރު ހޯދިއިރު، ދެވަނައަށް ދިޔަ ކެޕްޓަން ބޯޓް މެންބާސްއަށް 10،000ރ. ގެ ފައިސާގެ އިނާމާއި 8000ރ. ގެ އަގުހުރި ގިފްޓު ވައުޗަރު ލިބުނެވެ. އަދި، ތިންވަނައަށް ދިޔަ ޓްރައިޓަންއަށް 5000ރ. ގެ ފައިސާގެ އިނާމާއި 5000ރ. ގެ ގިފްޓު ވައުޗަރު ލިބުނެވެ.
ކަނޑުފޯރި މުބާރާތުގެ ނިންމުމުގެ ރަސްމިއްޔާތުގެ ތެރެއިން -- ފޮޓޯ: ސޮނީ ފިޝިން
މަސްވެރިކަމުގެ ތަޖުރިބާކާރު، މ. ކުޑަފަރި، އާދަމް ނަސީމް ޝަރަފުވެރިކޮށްދިން މުބާރާތުގެ ނިންމުމުގެ ރަސްމިއްޔާތުގައި މުޅި މުބާރާތުގެ އެންމެ މޮޅު މަސްވެރިޔާގެ މަގާމު ހޯދި ރިއްފަތަށާއި ނަޑޭއަށް ވެސް ވަނީ އިނާމު ހަވާލުކޮށްފަ އެވެ.
ކަނޑުފޯރިއަކީ ވާޗުއަލްކޮށް، ރާއްޖޭގެ ކޮންމެ ސަރަހައްދެއްގައި ހުރެގެންވެސް ބައިވެރިވެވޭ ގޮތަށް ބާއްވާ މިފަދަ ފުރަތަމަ މުބާރާތެވެ. ކަނޑުފޯރީގެ ތަފާތު އެކި މުބާރާތްތައް މިއަހަރު ތެރޭގައި ބޭއްވުމަށް ވަނީ ނިންމާފަ އެވެ.
ކަނޑުފޯރީގެ ކުރިއަށް ހުރި މުބާރާތްތަކާ ބެހޭ މައުލޫމާތު ސޮނީ ފިޝިންގެ ސޯޝަލް މީޑިއާ ޕްލެޓްފޯމްތަކުގައި ހިއްސާ ކުރަމުން ގެންދާނެ ކަމަށް އެ ކުންފުނިން ބުނެ އެވެ.
