ހިދުމަތާއި ވަސީލްތަކުގެ ފެންވަރު ވަޒަން ކުރުމަށްފަހު ފޯބްސް ޓްރެވެލް ގައިޑުންދޭ "ސްޓާ އެވާޑްސް" ގައި ރާއްޖޭގެ 13 ރިސޯޓަކަށް ފަސް ތަރީގެ ރޭޓިން ލިބިއްޖެ އެވެ.
މީގެ 65 އަހަރު ކުރިން މޮބިލް ގައިޑުގެ ނަމުގައި ދޭން ފެށި އެ އެވޯޑަކީ ދުނިޔޭގެ ފަތުރުވެރިކަމުގެ ދާއިރާގައި ދޭ އެފަދަ އެންމެ ޝަރަފުވެރި އެވޯޑެވެ.
މިއަހަރުގެ ސްޓާ އެވޯޑުގައި ރާއްޖެއިން ފަސްތަރި ލިބިފައިވަނީ:
- ޗެވެލް ބްލެންކް
- ފޯ ސީޒަންސް ރިސޯޓްސް މޯލްޑިވްސް އެޓް ކުޑަ ހުރާ
- ފޯ ސީޒަންސް ރިސޯޓްސް މޯލްޑިވްސް އެޓް ލަނޑާ ގިރާވަރު
- ޖޯލި ބީންގް
- ޖޯލި މޯލްޑިވްސް
- ކުޑަދޫ މޯލްޑިވްސް ޕްރައިވެޓް އައިލެންޑް
- ވަން އެންޑު އޮންލީ ރީތި ރަށް
- ޕެޓީނާ މޯލްޑިވްސް، ފަރި އައިލެންޑްސް
- ދަ ރިޓްޒް ކާލްޓަން މޯލްޑިވްސް، ފަރި އައިލެންޑް
- ސޮނޭވާ ޖާނީ
- ދަ ސެއިންޓް ރެޖިސް މޯލްޑިވްސް ވޮއްމުލި ރިސޯޓް
- ވެލާ ޕްރައިވެޓް އައިލެންޑް
- ވަލްޑޯފް އެސްޓޯރިއާ މޯލްޑިވްސް އިތާފުށި
އޭގެ ތެރެއިން ޖޯލި ބީންގް އާއި ޕެޓީނާ މޯލްޑިވްސް އާއި ފަރި އައިލެންޑްސް އާއި ދަ ރިޓްޒް ކާލްޓަން މޯލްޑިވްސްގެ އިތުރުން ސޮނޭވާ ޖާނީއަކީ މިއަހަރު އަލަށް ފަސްތަރި ލިބުނު ރިސޯޓުތަކެވެ.
އެ ގައިޑުގެ ހަތަރު ތަރީގެ ރޭޓިން ރާއްޖޭގެ ހަ ރިސޯޓަކަށް ލިބިފައިވެ އެވެ. އަދި ރިކޮމެންޑެޑް ރޭޓިން ލިބިފައިވަނީ ރާއްޖޭގެ ތިން ރިސޯޓަށެވެ.
އެމެރިކާގެ އެންމެ ދުވަސްވީ ޓްރެވެލް ގައިޑު، ފޯބްސް ޓްރެވެލް ގައިޑުގެ މުވައްޒަފުން ކޮންމެ އަހަރުވެސް ދުނިޔޭގެ އެކި ކަންކޮޅަށް ފަތުރުވެރިންގެ ގޮތުގައި ދަތުރުކުރެ އެވެ. އެ ދަތުރުތަކުގައި އެކި ހޮޓާތަކުގައި އެމީހުން ތިން ދުވަހާއި ދެ ރޭ ހޭދަ ކުރެ އެވެ. ރޭޓިންއެއް ކަނޑައަޅަނީ އެ މުއްދަތުގެ ތެރޭގައި 900 އެތައް ކަމެއްގެ މައްޗަށް ބިނާކޮށް ހަދާ އިވެލުއޭޝަންއެއްގެ މައްޗަށް ބިނާކޮށެވެ. އެއީ އެތަންތަނުން ފޯރުކޮށްދޭ ހިދުމަތަށްދޭ 75 ޕަސެންޓާއި ތަނުގެ ވަސީލަތްތަކަށްދޭ 25 ޕަސެންޓެވެ.
މިއަހަރުގެ ސްޓާ އެވޯޑުގެ ފަސްތަރި ރާއްޖޭގެ 13 ރިސޯޓަކަށް ލިބުނުއިރު، މިދިޔަ އަހަރު ރާއްޖޭން ވަނީ ވޯލްޑްސް ލީޑިން ޑެސްޓިނޭޝަނުގެ މަގާމު ޖެހިޖެހިގެން ތިން ވަނަ ފަހަރަށް ހޯދައި އެ އެވޯޑު މިލްކުކޮށްފަ އެވެ.
ކޮވިޑުގެ ބަލިމަޑުމަކަށްފަހު ރާއްޖޭގެ ފަތުރުވެރިމަށް އަނެއްކާވެސް ދިރުން އައިސްފައި ވާއިރު، މިއަހަރު ރާއްޖެއަށް 1.8 މިލިއަން ފަތުރުވެރިން ގެނައުމަށް ޓޫރިޒަމް މިނިސްޓަރީން ވަނީ އަމާޒު ހިފައިފަ އެވެ.
