ފްލޮރިޑާ (ފެބްރުއަރީ 15) - މީގެ ދެ އަހަރު ކުރިން ހެއިޓީގެ ރައީސް އަވަހާރަކޮށްލި މައްސަލައިގައި އެމެރިކާއިން ހަތަރު މީހަކު ހައްޔަރުކޮށްފި އެވެ.
އެމެރިކާގެ ފެޑެރަލް އޮފިޝަލުން ބުނި ގޮތުގައި 2021 ގައި ހެއިޓީގެ އޭރުގެ ރައީސް ޖޮވެނެލް މޮއިޒް އަވަހާރަކޮށްލުމުގައި ބައިވެރިވި ކަމުގެ ތުހުމަތުގައި އެމެރިކާގެ ފްލޮރިޑާއިން ހައްޔަރުކުރީ އެ ގައުމުގެ ތިން މީހަކާއި ކޮލަމްބިއާއަށް ނިސްބަތްވާ މީހެކެވެ.
އެމީހުންނަށް ކުރާ ތުހުމަތަކީ މޮއިޒް ރަހީނުކުރުން ނުވަތަ މަރާލުމަށް ރޭވި ރޭވުމުގައި ބައިވެރިވުމާއި އެ ކަމުގައި އަމަލީ ގޮތުން ބައިވެރިވި މީހުންނަށް އެމެރިކާ މަގުން 20 އަސްކަރީ ވެސްޓު ފޯރުވައިދިނުމުގެ ތުހުމަތެވެ.
މޮއިޒް އަވަހާރަކޮށްލީ އޭނާގެ އަމިއްލަ ގެކޮޅުގައި ހުންނަވަނިކޮށް ހަތިޔާރު އެޅި ގްރޫޕަކުން ގެކޮޅަށް ވަދެ ބަޑިން ހަމަލާދީގެންނެވެ. އެ ހަމަލާގައި މޮއިޒްގެ އަނބިކަނބަލުން ވެސް ޒަހަމްވި އެވެ.
މި ހަމަލާއަށްފަހު އެ ގައުމުގެ ބޮޑު ބަޔެއް ކޮންޓްރޯލްކުރަމުން އަންނަނީ ހަތިޔާރު އެޅި ގޭންގުތަކުންނެވެ. އަދި އެ ގައުމުގެ ސަރުކާރުން ގައުމުގެ ކޮންޓްރޯލް ނެގުމަށް އެކި ގައުމުތަކުގެ އެހީތެރިކަމަށް ދަނީ އެދެމުންނެވެ. އެގޮތުން ކެނެޑާއިން ވަނީ މި މަހު ހެއިޓީގައި ހަރަކާތްތެރިވާ ގޭންގުތަކުން އެ ގައުމުގައި ހިންގަމުންދާ ހަމަނުޖެހުންތައް ހުއްޓުވުމަށް އެހީތެރިވުމުގެ ގޮތުން ކެނެޑާއިން އަސްކަރީ އެއާ ކްރާފްޓެއް ފޮނުވާފަ އެވެ.
ނަމަވެސް، ގިނަ ގައުމުތަކުން އެ ގައުމުގެ ސަރުކާރަށް ސީދާ އަސްކަރީ އެހީވުމަށް ވަނީ ފަސްޖެހިފަ އެވެ. ނަމަވެސް އަވަށްޓެރި ޖަމައިކާއިން ވަނީ ގޭންގުތަކާ ދެކޮޅަށް ކުރާ މަސައްކަތުގައި ބައިވެރިބުމަށް ސިފައިން ފޮނުވާނެ ކަމަށް މީގެ ކުރިން ބުނެފަ އެވެ.
