ފުޓްބޯޅަ ކެރިއަރު ނިންމާލުމުގެ ކުރިން މާޒިޔާ ސްޕޯޓްސް އެންޑް ރެކްރިއޭޝަނަށް ކުޅެން ނިންމި އެންމެ ބޮޑު ސަބަބަކީ އެ ކްލަބްގައި އޮތް ޕްރޮފެޝަނަލް މާހައުލު ތަޖުރިބާ ކޮށްލައި، ކާމިޔާބީތަކެއް ހޯދުމުގެ ބޭނުމުގައި ކަމަށް ތަޖުރިބާކާރު ގޯލްކީޕަރު، މުހައްމަދު ފައިސަލް ބުނެފި އެވެ.
އދ. ފެންފުށްޓަށް އުފަން، ފައިސަލް، 34، އޯލްޔޫތުލިންކްއޭޖް (އޭވައިއެލް) އިން ކެރިއަރު ފަށައި އޭގެ ފަހުން ވަނީ ވިކްޓަރީ، ވެލެންސިއާ، އީގަލްސް، ނިއު ރޭޑިއަންޓް އަދި ދަ ގްރާންޑޭ ސްޕޯޓްސް ކްލަބަށް ވެސް ކުޅެފަ އެވެ. ރާއްޖޭން 2018 ވަނަ އަހަރުގެ ސާފް ސުޒުކީ ކަޕް ކާމިޔާބުކުރިއިރު މުބާރާތުގެ މޮޅު ކުޅުންތެރިއަކަށް ހޮވުނު ފައިސަލް، މާޒިޔާއާ ގުޅުނުއިރު، އޭނާ ފާއިތުވި އަހަރުގައި ފުޓްބޯޅަ ކުޅުން ހުއްޓާލުމުގެ ވިސްނުމެއް ވެސް ގެންގުޅުނެވެ.
ވެލެންސިއާ އިން ގަވާއިދުން މުސާރަ ނުދޭތީ، އެ ކްލަބުން ރިލީސް ހޯދަން މިދިޔަ ސީޒަނުގައި ފައިސަލް އެދުނެވެ. އެކަމަކު، ރިލީސް ހަމަނުޖެހި، މިދިޔަ ސީޒަނުގެ ފަހު ބައިގައި ފައިސަލް ނުކުޅެ އެވެ. ގައުމީ ޓީމުން އެންމެ ފަހުން ކުޅުނު އެކުވެރިކަމުގެ ހަތަރު މެޗުގެ ސްކޮޑުގައި ވެސް ފައިސަލް ނުހިމެނެ އެވެ.
ޕީއެސްއެމްގެ "ސާބަސް" ޕްރޮގްރާމަށް ދިން އިންޓަވިއުއެއްގައި ފައިސަލް ވަނީ މާޒިޔާ އަށް ބަދަލުވާން ނިންމި ސަބަބު ކިޔައިދީފަ އެވެ.
"ދެން ވަރަށް ގިނަ ކްލަބަކަށް ކުޅެވިއްޖެ، ފަސް ކްލަބަކަށް ކުޅެވިއްޖެ. ކުޅުނުއިރު، އެހެން ކްލަބްތައް ވެސް ރަނގަޅު. އެކަމަކު، ކުޅުންތެރިން ޑިސިޕްލިން ކުރުމަށްޓަކައި، މާޒިޔާ ގެންގުޅޭ ގޮތްގަނޑު އަސްލު ވަރަށް ހިތްހަމަޖެހޭ. އަސްލު ކުޅުންތެރިން ވަރަށް ޑިސިޕްލިން ވާންޖެހޭ،" ފައިސަލް ބުންޏެވެ.
"ބައެއް ކްލަބްތައް ހުންނަނީ ކޮންމެ ގޮތެއް ވަރިހަމަވެފައި. ސެލަރީ މައްސަލަ ޖެހޭތީ މެނޭޖްމަންޓަކަށް ވެސް ނުބުނެވޭ މި ގޮތަށް ހަދާށެކޭ. އެކަމަކު، މާޒިޔާ އަކީ މިހާތަނަށް އައިއިރު ހުރިހާ އެންމެނަށް ވެސް ވަރަށް ރަނގަޅަށް ކަންތައް ކޮށްދިން ކްލަބެއްގެ ގޮތުގައި މި ފެންނަނީ،"
ކްލަބުން މުސާރަ ނުދޭތީ މީގެ ކުރިން ވޮލީ ކުޅުމަށް ވެސް ދިޔަ ފައިސަލް ބުނީ މިހާރު އޭނާ ގުނަމުން އެ އަންނަނީ ކެރިއަރުގެ ފަހު އަހަރުތައް ކަމަށްވާއިރު، ކުޅުމާ ދުރަށް ދިއުމުގެ ކުރިން މާޒިޔާގެ މާހައުލުގައި މަސައްކަތްކޮށް ކާމިޔާބު ހޯދަން ބޭނުންވާ ކަމަށެވެ.
"އަޅުގަނޑު ބޭނުންވީ މާޒިޔާ އެކްސްޕީރިއަންސް ކޮށްލަން މާޒިޔާގެ މެނޭޖްމަންޓާ އެކު މަސައްކަތް ކޮށްލަން. މާޒިޔާ އަކީ މިހާރު ވަރަށް ކާމިޔާބު ކްލަބެއް. އެއީ ވެސް ސަބަބެއް މި ކްލަބަށް އައި،" ފައިސަލް ބުންޏެވެ. "މި އަހަރު މާޒިޔާ އެހެން އަހަރުތަކަށް ވުރެ ކާމިޔާބު ހޯދާނެ،"
ފައިސަލް ދެކޭގޮތުގައި ގައުމީ ޓީމުގައި ގަވާއިދުން ކުޅެމުން އަންނަ ގިނަ ކުޅުންތެރިންތަކެއް މާޒިޔާ ސްކޮޑުގައި ހިމެނުމަކީ ގައުމީ ކޯޗު ފްރެންޗެސްކޯ މޮރިއޭރޯ އަށް ލިބޭނެ ފަސޭހަ އެކެވެ.
"(މާޒިޔާގައި) މި ކުޅުންތެރިން އެއްކޮށް ބޮޑު ލީގެއް ކުޅެފައި، ގައުމީ ޓީމު އެކުލަވާލާއިރު، ގައުމީ ޓީމުގައި މީގެއިން ގިނަ ކުޅުންތެރިން ކުޅޭނެ ފުލްކޮށް، އެހެންވެއްޖެ ކަމަށް ވިއްޔާ ގައުމީ ޓީމުގައި އެ ހުންނަ ކޯޗަކަށް ވެސް ވަރަށް ފަސޭހަވާނެ. އެއީ ގޭމް ވެސް ފަސޭހަވާނެ، ބޭނުން ގޮތަކަށް އަތުރާލުމުގައި ވެސް ފަސޭހަގޮތްތަކެއް ހުންނާނެ،" ފައިސަލް ބުންޏެވެ.
ބަލްގޭރިއާގެ ކޯޗު އިވާން ކޮލޭވްގެ އިރުޝާދުގެ ދަށުން މާޒިޔާ އިން އާ ސީޒަނަށް ޕްރެކްޓިސްތައް ކުރިއަށްގެންދަމުން އަންނައިރު، އެ ޓީމާ އަލަށް ގުޅުނު ކުޅުންތެރިން އަންނަނީ ބައިވެރިވަމުންނެވެ. ފައިސަލްގެ އިތުރުން މާޒިޔާއާ ދެން ގުޅުނު ކުޅުންތެރިންނަކީ ކުރިން އީގަލްސް އިން ފެނުނު ހުސެއިން ސިފާއު ޔޫސުފް (ކުރޯ)، ހަސަން ރާއިފް އަހުމަދު (ހަންނަ)، އަހުމަދު ނޫމާން (ހެލްމެޓް)، ވެލެންސިއާ އަށް ކުޅުނު އަލީ ފާސިރު (ސެންޓޭ) އާއި މިސްރުގެ މިޑްފީލްޑަރު، ހަލީލް ޖަމާލް، ކްލަބް ގްރީން ސްޓްރީޓްސްގެ ހަސަން ނަޒީމް ގާސިމް (ޗޯޓު) އަދި ނިއު ރޭޑިއަންޓަށް ކުޅުނު އުންމީދީ ފުލްބެކް، ޝަމްވީލް މުހައްމަދު (ބޮންޑާ) އެވެ.
