ތުރުކީ އާއި ސީރިޔާ އަށް މިދިޔަ ހޯމަ ދުވަހު އައި ބިންހެލުމުގައި މަރުވި މީހުންގެ އަދަދު 34،000 އަށް އަރާފައިވާ ކަމަށް އޮފިޝަލުން ބުނި އެވެ.
ބިންހެލުމުގައި ތުރުކީން މަރުވި މީހުންގެ އަދަދު 29،600 އަށް އަރާފައިވާއިރު، ސީރިއާގައި 4،500 އަށް ވުރެ ގިނަ މީހުން ވަނީ މަރުވެފަ އެވެ. އަދި އެތައް ހާސް ބަޔަކު ވަނީ ޒަހަމްވެފަ އެވެ.
ރެކްޓާ މިންގަނޑުން 7.8 މެގްނިޓިއުޑްގައި އައި ބިންހެލުމުގައި ވެއްޓިފައިވާ އިމާރާތްތަކުގެ ދަށުން މީހުން ސަލާމާތްކުރުމުގެ މަސައްކަތް ކުރިއަށް ގެންދާއިރު، ގާތްގަނޑަކަށް 150 ގަޑިއިރު ފަހުން، 10 އަހަރުގެ އަންހެން ކުއްޖަކު ވަނީ ސަލާމަތްކޮށްފަ އެވެ.
ސީރިއާގެ ހުޅަނގު އުތުރުގައި ވެއްޓިފައިވާ އިމާރާތްތަކުގެ ދަށުން މީހުން ސަލާމަތް ކުރުމުގެ މަސައްކަތްކުރާ ވައިޓް ހެލްމެޓްސްގެ ފަރާތުން ހުއްޓާލާފައިވާ ކަމަށް އެ ޖަމިއްޔާއިން ވަނީ ބުނެފަ އެވެ.
ބިންހެލުމާއި އެއަށް ފަހުން އަންނަ ލޮޅުންތަކުން ސީރިއާގެ 5.3 މިލިއަން މީހުން ގެދޮރު ނެތިދާނެ ކަމަށް އދ. އިން ލަފާކުރެ އެވެ.
