މި މަހުގެ ހަ ވަނަ ދުވަހު ތުރުކީ އަށް އައިން ބިންލެމުގައި ގެއްލުންވި ސަރަހައްދުތަކުން ލޫޓުވާ، ވައްކަންކުރި ކަމުގެ ތުހުމަތުގައި 98 މީހަކު ހައްޔަރުކޮށްފި އެވެ.
ތުރުކީގެ މީޑިއާތަކުން ރިޕޯޓުކޮށްފައިވާ ގޮތުގައި އެ ގައުމުގެ އިރުމަތީ އަވަށްތަކުގައި ގެއްލުންވެފައިވާ އިމާރާތްތައް ލޫޓުވާ ވައްކަންކުރި މައްސަލަތަކުގައި ގިނަ އަދަދެއްގެ ބައެއްގެ މައްޗަށް ތުހުމަތުކޮށް ސުވާލުކޮށްފައިވެ އެވެ.
"މިފަދަ އެއް އޮޕަރޭޝަނުގައި 40 މީހަކު ހައްޔަރުކޮށް އެ މީހުންގެ އަތުން ނުވަ ބަޑި، ގަހަނާ، ބޭންކު ކާޑު، އަދި 11،000 އެމެރިކާ ޑޮލަރާއި 70،000 ލިރާ ވަނީ އަތުލައިގަނެފައި" އެ ގައުމުގެ ދައުލަތުގެ މީޑިއާއަށް ސަލާމަތީ ބާރުން ދިން މައުލޫމާތުގައި ބުނެފައިވެ އެވެ.
މީގެ އިތުރުން އެހީތެރިން ކަމަށްބުނެ މަކަރު ހަދައިގެން ކާނާ ބަރުކޮށްފައިހުރި ދެ ލޮރީއެއް ލޫޓުވަން އުޅުނު ދެ މީހަކާއި މަކަރާއި ހީލަތުން ބިންހެލުމުގައި ގެއްލުންވި ފަރާތްތަކުގެ އަތުން ފޭރުނު ހަ މީހަކު އެ ގައުމުގެ އެކި ހިސާބުތަކުން ވަނީ ހައްޔަރުކޮށްފަ އެވެ.
ތުރުކީ އަދި ސީރިއާއަށް ހޯމަ ދުވަހު އައި ބާރުގަދަ ބިންހެލުމުގައި ލައްކަ އަކަށްވުރެ ގިނަ މީހުން ހާލުގައި ޖެހި 29،000 މީހުން މަރުވެފައިވާއިރު، ދުނިޔޭގެ އެކި ގައުމުތަކުން އެހީތެރިންގެ ޓީމުތައް ވަނީ އެ ދެ ގައުމަށް ފޮނުވާފަ އެވެ.
މިފަދަ ހާލަތްތަކުގެ ނާޖާއިޒް ފައިދާ ނަގާ މީހުން ގިނަ ކަމާއި އެކަމަށް ސަމާލުކަން ދިނުމަށް ދެ ގައުމުގެ އޮފިޝަލުން އަދި ބައިނަލްއަގުވާމީ ޖަމާއަތްތަކުންވެސް ވަނީ ގޮވާލާފަ އެވެ.
