ގަޒިއަންތެބު، ތުރުކީ (ފެބްރުއަރީ 12) - މި މަހު ހަ ވަނަ ދުވަހު ތުރުކި އަދި ސީރިއާއަށް އައި ބިންހެލުމަށްފަހު ހަ ދުވަސް ފަހުން ބިމާހަމަވެފައިވާ އިމާރާތެއްގެ ދަށުން އާއިލާއެއްގެ ފަސް މެންބަރުން ދިރިތިއްބާ ސަލާމަތް ކޮށްފި އެވެ.
އެ އާއިލާ ސަލާމަތް ކޮށްފައިވަނީ ތުރުކީގެ ގަޒިއަންތެބުގެ އިމާރާތެއްގެ ދަށުންނެވެ. މި އޮޕަރޭޝަނުގައި ހަރަކާތްތެރިވެފައިވާ މެލޭޝިއާގެ ޑިސާސްޓާ އެސިސްޓެންސް އެންޑް ރެސްކިއު ޓީމާ ހަވާލާދީ ރިޕޯޓު ކޮށްފައިވާ ގޮތުގައި އެ އިމާރާތަކީ އެ އާއިލާ ދިރިއުޅެމުންދިޔަ ރެސިޑެންޝަލް ބްލޮކެކެވެ.
"އެންމެ ފުރަތަމަ އެ އިމާރާތުގެ ދަށުން އަޑެއް އިވިގެން ބަލަން ފެށީ، ލައިފް ޑިޓެކްޓާ ސެންސާ ބޭނުންކޮށްގެން ބެލިއިރު އިމާރާތުގެ ދެ މީޓަރު އަޑީގައި އެ މީހުން ތިބިކަން އިނގުނު، ފުރަތަމަ ހީކުރީ ތިން މީހުން ކަމަށް ތާށިވެފަ ތިބީ" އެ ޓީމުގެ އޮފިޝަލަކު ބުންޏެވެ.
ސަލާމަތް ކުރުމަށް ހަރަކާތްތެރިވި ޓީމުގެ އޮފިޝަލަކާ ހަވާލާދީ ބުނެފައިވާ ގޮތުގައި އެންމެ ފުރަތަމަ ސަލާމަތް ކުރެވުނީ ކުޑަ ފިރިހެން ކުއްޖެއް ކަމަށެވެ. އެ ކުއްޖާ ސަލާމަތް ކުރެވުމާއެކު ތާށިވެފައިތިބި އާއިލާގެ މެންބަރުންނާއި ބޭރުގައި ތިބި ތުރުކީގެ ރައްޔިތުން މުޅި ސަރަހައްދު ތަކުބީރުގެ އަޑު ގުގުމާލި ކަމަށާއި އެއީ ރެސްކިއު ޓީމުގެ މެންބަރުންނަށް އިތުރު ހިއްވަރެއް ލިބިގެންދިޔަ ކަމަށެވެ.
ވެއްޓިފައި އޮތް އިމާރާތުގެ ދަށުން ފަހަރަކު މީހަކު ނެރެ މުޅި އާއިލާ ސަލާމަތް ކުރެވުނީ ތިން ގަޑިއިރުގެ ބުރަ މަސައްކަތުން ކަމަށްވެ އެވެ. އަދި މިހާރު އެ އާއިލާގެ މެންބަރުންނަށް އަންނަނީ ލިބުނު އަނިޔާތަކަށް ފަރުވާދެމުން ކަމަށާއި ފަސް މެންބަރުންގެ ހާލުވެސް ރަނގަޅު ކަމަށް ތުރުކީގެ ރިޕޯޓުތައް ބުނެ އެވެ.
ހޯމަ ދުވަހު ތުރުކީ އަދި ސީރިއާ ގުޅޭ ބޯޑަރަށް އައި ރެކްޓާ މިންގަނޑުން 7.8 މެގްނިޓިއުޑުގެ ބާރުގަދަ މި ބިންހެލުމުގައި މީގެ ކުރިން މަރުވާނެ ކަމަށް ލަފާކުރީ 20،000 އެއްހާ މީހުންނެވެ. ނަމަވެސް އެ އަދަދު މިހާރު ވަނީ 29،000 އަށް އަރާފަ އެވެ. އަނިޔާވި މީހުންގެ އަދަދު ވަނީ 100،000 ހުރަސްކޮށްފަ އެވެ. އަދި މި ބިންހެލުމުގެ އަސަރު ދެ ގައުމުން ޖުމްލަ 23 މިލިއަން މީހުންނަށް ކޮށްފައިވާ ކަމަށް ދުނިޔޭގެ ސިއްހީ އިދާރާއިން ވަނީ ބުނެފަ އެވެ. މިއީ ވޭތުވެދިޔަ ގަރުނެއްގެ ތެރޭގައި އެ ސަރަހައްދަށް އައި އެންމެ ބާރުގަދަ ބިންހެލުމެވެ.
