ކޮވިޑުގެ ހާލަތު ރަނގަޅުވެ, ޒޫމް ކުންފުނީގެ ހިދުމަތްތަކަށް އޮތް ޑިމާންޑު ދަށްވުމާއެކު, އެ ކުންފުނީގެ 1300 އެއްހާ މުވައްޒަފުން ވަޒީފާއިން ވަކިކުރުމަށް ނިންމާފައިވާ ކަމަށް ޒޫމް ވީޑިއޯ ކޮމިއުނިކޭޝަންސް އިންކް އިން ބުނެފި އެވެ.
ގާތްގަނޑަކަށް 1300 މުވައްޒަފުން ވަޒީފާއިން ވަކިކުރިކަން އިއުލާން ކުރައްވަމުން ޒޫމްގެ ސީއީއޯ އެރިކް ޔުއާން ވިދާޅުވީ, މިއަހަރު އޭނާގެ އަމިއްލަ މުސާރަ ވެސް 98 ޕަސަންޓު ދަށްކުރުމާއެކު ލިބޭ ބޯނަސްތައް ވެސް ދޫކޮށްލާނެ ކަމަށެވެ.
ޔުއާން ވިދާޅުވި ގޮތުގައި, ވަރުބަލިކަމެއް ނެތި ޒޫމްއިން މަސައްކަތް ކުރި ނަމަވެސް ގޯސްތަކެއް ވެސް ހެދުނެވެ. އެގޮތުން, ކުންފުނި ކުރިއަރަމުން އަންނަ މިންވަރާއި ޓީމްތައް އެނަލައިޒް ކުރުމުގައި އެކަށީގެންވާ ވަގުތު ދެވިފައި ނުވާކަން އޭނާ ފާހަގަކުރެއްވި އެވެ.
ރެގިއުލޭޓަރީ ފައިލިންއާ ހަވާލާދީ ބޭރުގެ ރިޕޯޓުތައް ބުނާގޮތުގައި ޒޫމް އިން ވަޒީފާއިން ވަކިކުރުމާ ގުޅޭ ޗާޖުގެ ގޮތުގައި ގާތްގަނޑަކަށް 50 މިލިއަން ޑޮލަރާއި 68 މިލިއަން ޑޮލަރާ ދެމެދުގެ އަދަދެއް ނަގާނެ އެވެ. އަދި އޭގެ ބޮޑު ބައެއް 2024 ވަނަ އަހަރުގެ ފުރަތަމަ ކުއާޓަރުގައި ހަރަދުކުރާނެ ކަމަށް އެ ކުންފުންޏާ ހަވާލާދީ ބުނެފައި ވެއެވެ.
ގިނަ އަދަދެއްގެ މުވައްޒަފުން އެއްފަހަރާ ވަކިކުރަން ނިންމާފައިވާ ވީޑިއޯ ކޮންފަރެންސް ސޮފްޓްވެއާ އުފައްދާ ޒޫމް ކުންފުނިން ބުނީ އެ ކުންފުނީގެ އެގްޒެކެޓިވް ލީޑާޝިޕް ޓީމުގެ ބޭސް މުސާރަ ވެސް 20 ޕަސެންޓް ކުޑަކުރުމަށް ނިންމާފައިވާ ކަމަށެވެ.
މީގެ އިތުރުން ކުންފުނިން ވަކިކުރާ މުވައްޒަފުންނަށް 16 ހަފުތާގެ މުސާރައާއި ސިއްހީ ކަވަރޭޖުގެ އިތުރުން އަހަރުގެ ބޯނަސް ލިބޭނެ ކަމަށް ވެސް ސީއީއޯ ޔުއާން ވިދާޅުވެފައި ވެއެވެ.
އިންފްލޭޝަން މަތިވުމާއި އިންޓްރެސްޓް ރޭޓް މަތިވުމުގެ ސަބަބުން ޑިމާންޑް ދަށަށް ދިއުމާއެކު, އެކަމުން އަރައިގަންނަން ގޯލްޑްމަން ސެކްސް ގްރޫޕް އިންކް އިން ފެށިގެން އަލްފަބެޓް އިންކްއާ ހަމައަށް އެމެރިކާގެ ކުންފުނިތަކުން ވަނީ މި އަހަރު އެތައް ހާސް ބަޔަކު ވަޒީފާއިން ވަކިކޮށްފަ އެވެ.
