ހޯމަ ދުވަހު ތުރުކީ އަދި ސީރިއާ ގުޅޭ ސަރަހައްދަށް އައި ބާރުގަދަ ބިންހެލުމާ ގުޅިގެން މަރުވި މީހުންގެ އަދަދު 21،000 އަށް އަރާފައިވާއިރު، އިމާރާތްތަކުގެ ދަށުވެ ގެއްލިފައިވާ މީހުން ދިރި ތިއްބައި ފެނުމުގެ އުންމީދު ކެނޑެމުންދާ ކަމަށް ރެސްކިޔު ޓީމުތަކުން ބުނެފި އެވެ.
ސީރިއާގައި ހަރަކާތްތެރިވާ 'ވައިޓް ހެލްމެޓް' ޖަމިއްޔާއިން ބުނެފައިވަނީ ގެއްލުނު މީހުން އިމާރާތްތަކުގެ ދަށުން ހޯދުމަށް ކެނޑިނޭޅި މަސައްކަތް ކުރަމުންދާތާ މިހާރު 90 ގަޑިއިރު ވެފައިވާ ކަމަށާއި މަސައްކަތް ކުރަމުން ގެންދަނީ ފިނި މޫސުމުގެ އުނދަގޫ ހާލަތްތަކުގައި ކަމަށެވެ.
"އަދިވެސް ކަނޑިނޭޅި މަސައްކަތް ކުރަމުން މިދަނީ ބިމާހަމަވެފައިވާ އިމާރާތްތަކުގެ ދަށުން މީހުން ސަލާމަތް ކުރެވޭތޯ، ނަމަވެސް އިތުރަށް ދިރި ތިބި މީހުން ހޯދުމަށް އޮތް އުންމީދު ދަނީ ފަނޑުވަމުން" ވައިޓް ހެލްމެޓުން ބުންޏެވެ.
ދާހިލީ ހަނގުރާމައެއްގައި އޮތް ސީރިއާ އަށް ބިން ހެލުމުގެ ސަބަބުން ލިބުނު ގެއްލުން ދެ ގުނަ އިތުރުވެގެންދާނެ ނަމަށް ބައިނަލްއަގުވާމީ އެކި ޖަމިއްޔާތަކުން ވަނީ ބުނެފަ އެވެ.
ރެކްޓާ މިންގަނޑުން 7.8 މެގްނިޓިއުޑުގެ ބާރުގަދަ މި ބިންހެލުމުގައި މީގެ ކުރިން މަރުވާނެ ކަމަށް ލަފާކުރީ 20،000 އެއްހާ މީހުންނެވެ. ނަމަވެސް އެ އަދަދު އެއަށްވުރެ އިތުރުވެ، މިހާރު ހުރި އަދަދަށްވުރެ އެތައް ގުނައެއް މަައްޗަށް ދާނެ ކަމަށް ވަނީ ބެލެވިފަ އެވެ. މި ބިންހެލުމުގެ އަސަރު ދެ ގައުމުން ޖުމްލަ 23 މިލިއަން މީހުންނަށް ކުރި އެވެ. މިއީ ވޭތުވެދިޔަ ގަރުނެއްގެ ތެރޭގައި އެ ސަރަހައްދަށް އައި އެންމެ ބާރުގަދަ ބިންހެލުމެވެ.
