ތުރުކީ އާއި ސީރިއާއަށް ހޯމަ ދުވަހު އައި ބިންހެލުމުގައި ވެއްޓުނު އިމާރާތެއްގެ ދަށުގައި އުފަންވި އަންހެން ކުއްޖާ އެޑޮޕްޓް ކުރަން އެތައް ހާސް ބަޔަކު ހުށަހަޅައިފި އެވެ.
ހޮސްޕިޓަލްގައި ފަރުވާ ދެމުން އަންނަ ކުއްޖާ އަށް ދީފައިވާ ނަމަކީ އާޔާ –އަރަބި ބަހުން މުއުޖިޒާތް- އެވެ.
ބިން ހެލުމުގައި ތުއްތު އާޔާގެ މަންމަ އާއި ބައްޕަ އަދި އެއްބަނޑު އެއްބަފާ ހަތަރު ކުދިން މަރުވެފައިވާ ކަމަށް މީޑިއާތަކުން ވަނީ ރިޕޯޓުކޮށްފަ އެވެ.
ސީރިއާއިން ވެއްޓުނު އިމާރާތެއްގެ ދަށުން ހޯމަ ދުވަހު އާޔާގެ ސަލާމާތްކުރުމަށް ފަހު ރެސްކިޔު ޓީމުން އާޔާގެ މަންމައާ ހަމައަށް ވާސިލު ވެވުނު އިރު އޭނާ ވަނީ މަރުވެފަ އެވެ.
އާޔާ ސަލާމަތްކޮށްގެން ހޮސްޕިޓަލަށް ގެންދިޔައިރު ހާލަތު ވަރަށް ދެރަ އެވެ. ގައިގައި ކުދި ޒަހަމް އާއި ބިހިތަކެއް ހުރިއިރު، ނޭވާ ލުމަށް ވެސް އުނދަގޫތައް ހުރި ކަމަށް ސީރިއާގެ އަފްރީން ސިޓީގައި އެ ކުއްޖާއަށް އަށް ފަރުވާ ދިން ކުޑަކުދިންގެ ޑޮކްޓަރު ބުންޏެވެ.
އާޔާ ސަލާމަތްކުރި ވީޑިއޯ ސޯޝަލް މީޑިއާގައި ވައިރަލް ވެގެންދިޔައިރު، އެ ކުއްޖާ އެޑޮޕްޓް ކުރަން އެދި ހުށަހެޅުންތައް ވަނީ އޮއްސާލައިފަ އެވެ.
ކުވޭތުގެ ޓީވީ ޕެރެޒެންޓަރަކު ބުނީ ގާނޫނީ އިޖުރާއަތްތަކުން ހުއްދަ ދީފި ނަމަ އެ ކުއްޖާ އެޑޮޕްޓުކުރަން ތައްޔާރަށް ހުރި ކަމަށެވެ.
އެހެން މީހަކު ބުނީ އާޔާ އެޑޮޕްޓުކޮށް ރަނގަޅު ދިރިއުޅުއް ހޯދައިދޭން ބޭނުންވާ ކަމަށެވެ.
އާޔާ އެޑޮޕްޓުކުރަން އެދޭ މީހުން ހޮސްޕިޓަލަށް ވެސް ދަނީ ގުޅަމުންނެވެ.
ނަމަވެސް ހޮސްޕިޓަލްގެ މެނޭޖަރު ޑރ. ހާލިދު ބުނީ އާޔާ އެޑޮޕްޓުކުރަން ފުރުސަތު ދޭން ބޭނުން ނުވާ ކަމަށެވެ. އާޔާ އަށް ވުރެ ހަތަރު މަސް ދޮށީ ކުއްޖެ ހާލިދުގެ ހުރެ އެވެ. އެހެންވެ، އާޔާގެ ތިމާގެ މީހުން އަންނާންދެން ބަލަހައްޓާނެ ކަމަށް އޭނާ ބުންޏެވެ.
އާޔާއަށް ގާތުން ދެނީ ހާލިދުގެ އަންހެނުންނެވެ.
ތުރުކީ އަކީ މިހާރު ދުނިޔޭގައި އެންމެ ގިނަ އަދަދެއްގެ ރެފިޔުޖީއިން ތިބި ގައުމެވެ. ހޯމަ ދުވަހުގެ ބިންހެލުން އައިސްފައިވަނީ 3.3 މިލިއަން ރެފިޔުޖީން ތިބި އެ ގައުމުގައި އެންމެ ގިނަ ރެފިޔުޖީ ކޭމްޕުތައް ހުރި ސަރަހައްދަށެވެ. ހަނގުރާމައިގެ ސަބަބުން ސުންނާފަތިވެފައިވާ ސީރިއާގައި މި ބިންހެލުމުގެ ސަބަބުން ގިނަ ބަޔަކު ހާލުގައި ޖެހި، އެހީތެރިކަން ލިބުމަށް ދަތިވާނެ ކަމަށް ބެލެވޭ ކަމަށްވެސް ގިނަ ރިޕޯޓުތަކުން އަންނަނީ ބުނަމުންނެވެ.
ބިންހެލުމުގައި ވެއްޓިފައިވާ އިމާރާތްތައް -- ފޮޓޯ: ގެޓީ އިމޭޖް
މި ބިންހެލުމުގައި މިހާތަނަށް 20،000 މީހުން މަރުވެފައިވާ ކަމަށް ވަނީ ރެކޯޑުކުރެވި އެވެ.
ހޯމަ ދުވަހު އެ ސަރަހައްދަށް އައި ރެކްޓާ މިންގަނޑުން 7.8 މެގްނިޓިއުޑުގެ ބާރުގަދަ ބިންހެލުމަކީ މި ގަރުނުގާވެސް އެ ސަރަހަށްދަށް އައި އެންމެ ބާރުގަދަ ބިންހެލުން ކަމަށް ތުރުކީގެ މީޑިއާތަކުން ވަނީ ރިޕޯޓުކޮށްފަ އެވެ.
