އައްޑޫ ސިޓީގައި ސަރުކާރުން ހިންގާ މަޝްރޫއުތަކުގައި ފާހަގަކުރެވޭ ވަރުގެ މައްސަލަތާކައި، އެއާ ގުޅިގެން ރައްޔިތުންގެ ޝަކުވާތަކެއް ހުރުމުން، ޕްލޭނިން މިިނިސްޓަރު މުހައްމަދު އަސްލަމް އަންނަ ހޮނިހިރު ދުވަހު އެ ސިޓީއަށް ވަޑައިގެން ދިގު މުއްދަތަކަށް މަޑުކުރައްވަން ނިންމަވައިފި އެވެ.
އިއްޔެ ރައްޔިތުންގެ މަޖިލީހުގައި އޮތް ޖަލްސާގައި، މަޖިލީހުގެ މެންބަރަކު ކުރި ސުވާލެއްގެ ޖަވާބުގައި އަސްލަމް ވަނީ އޭނާ ހޮނިހިރު ދުވަހުން ފެށިގެން އައްޑޫގައި މިިނިސްޓަރު "ބޭސްވާން" ނިންމަވާފައިވާ ކަމަށް ވިދާޅުވެފަ އެވެ.
"ކައުންސިލާއި ރައްޔިތުންގެ ފަރާތުން ހުށަހެޅޭ މުހިންމު ޝަކުވާއެއް އޮތް ނަމަ، އެ ޝަކުވާއަކަށް އަޅުގަނޑު އެބަ ޖެހޭ އެޑްރެސްކުރަން، އަޅުގަނޑު މޭޔަރާއި ރައްޔިތުންނާ ވެސް ވާހަކަ ދައްކައިގެން ހައްލު ކުރަން ޖެހޭ ކަންކަން ހޯދުން މީގައި ބޭނުމަކީ،" އަސްލަމް މިއަދު "އަދަދު" ނޫހަށް ދެއްވި އިންޓަވިއުއެއްގައި ވިދާޅުވި އެވެ.
މިނިސްޓަރު އަސްލަމް ދެކެވަޑައިގަންނަވާ ގޮތުގައި މަޝްރޫއުތައް ހިންގުމުގައި ދިމާވެފައިވާ މައްސަލަތަކާއި، މަޝްރޫއުތައް ލަސްވާން މެދުވެރިވެފައިވާ ސަބަބަކީ ކޮންޓްރެކްޓް މެނޭޖްމަންޓްގައި އުޅޭ މައްސަލަތަކެއްގެ ސަބަބުން ކަމަށެވެ. ކޮންޓްރެކްޓަރުންނާ އިތުރަށް މުއާމަލާތް ކުރަން ޖެހޭ ކަން ފާހަގަ ކުރެއްވި އެވެ.
ރައްޔިތުންގެ ގިނަ ކަންބޮޑުވުންތަކެއް ހުރީ މަގު ހެދުމުގެ މަޝްރޫއު އަދި ފެނާއި ނަރުދަމާގެ މަޝްރޫއަށެވެ. މަގު ހެދުމުގެ ޑިޒައިނާ ގުޅިގެން ރައްޔިތުންގެ ޝަކުވާތަކެއް ހުރި އިރު، ނަރުދަމާއަށް ބޭނުންވާ ހޮޅިތައް ވަޅު ނުލައި، މަގު ހަދަން ފަށާތީ ވެސް ކަންބޮޑުވުންތަކެއް އެބަ ހުއްޓެވެ.
"ފެނަކައިގައި އެތައް ފަހަރަކު ބުނެފައިވާނެ، މަގު ހެދުމުގެ ކުރިން އޭގެ ކަނެކްޝަންތައް ހަދާށޭ، ފެނަކައިން އެ ކަން ނުވާތީ، މަގު ނުހެދި ތިބެން ޖެހެނީ، ލަސްވަނީ، ލަސްވަނީ، އެހެން ލަސްވާން ފެށީމަ، ކޮންޓްރެކްޓަރުގެ އެ މަސައްކަތް ނިންމަން ކޮންމެ ވެސް ގޮތެއް ހަދަން ފަށާނެތާ،" އަސްލަމް ތަފްސީލްކޮށްދެއްވި އެވެ.
އަސްލަމް ދެކެވަޑައިގަންނަވާ ގޮތުގައި، މަގު ހެދުމުގެ މަޝްރޫއު ހަވާލުކޮށްފައިވާ ކޮންޓްރެކްޓަރާއި ފެނަކައާ ދެމެދު ކޯޑިނޭޝަން އަދި މުއާމަލާތް ކުރުމުގެ މައްސަލަތަކެއް އެބަ އުޅެ އެވެ. އަދި, އަސްލަމް އައްޑުއަށް ވަޑައިގެން، އެ މައްސަލަތައް ހައްލުކުރެވިދާނެ ކަމަށް އޭނާ ގަބޫލުކުރައްވަ އެވެ.
އައްޑޫ ސިޓީގައި ގާއިމްވެގެން މަސައްކަތް ކުރައްވާ ގޮތަށް އެ މިނިސްޓްރީގެ ސްޓޭޓް މިނިސްޓަރު އަބްދުﷲ ސޯދިގު (ސޯބެ) ވެސް ހުންނަވަ އެވެ. އަސްލަމް ވިދާޅުވީ، އައްޑުއަށް ވަޑައިގެން އޭނާ މަސައްކަތް ކުރައްވާނީ، އެ ސިޓީގެ ކުރީގެ މޭޔަރު ސޯދިގުއާ ވެސް އެކުގައި ކަމަށެވެ.
އައްޑޫ މަގު ހެދުމުގެ މަޝްރޫއަކީ އިންޑިއާގެ އެފްކޮންސް ކުންފުންޏާ ހަވާލުކޮށްގެން ކުރަމުން އަންނަ މަސައްކަތެކެެވެ. ފެންހިންދާ ނިޒާމާއެކު 107 ކިލޯމީޓަރުގެ މަގު ހަދާ، ސީސީޓީވީ އަދި މަގު ބައްތި ހަރުކުރުމުގެ މަސައްކަތް ކުރަމުންދަނީ އިންޑިއާގެ އެގްޒިމް ބޭންކުން ހަމަޖައްސައިދީފައިވާ 800 މިލިއަން ޑޮލަރުގެ ކްރެޑިޓް ސްކީމުގެ ދަށުންނެވެ.
