ޗައިނާ ސަރުކާރުގެ ހިލޭ އެހީގެ ދަށުން މާލޭގެ މަގުތައް ހެދުމުގެ މަޝްރޫއުގެ ސާވޭ އަދި ޑިޒައިން މަރުހަލާ ފެށުމަށް މި މަހުގެ ތެރޭގައި ޓީމެއް ރާއްޖެ އަންނާނެ ކަމަށާއި އަމަލީ މަސައްކަތް ފެށޭނީ ޑިޒައިން ފައިނަލްވުމުން ކަމަށް ކޮންސްޓްރަކްޝަން މިނިސްޓަރު އަބްދުالله މުއްތަލިބު ވިދާޅުވެއްޖެ އެވެ.
މިއަދު ކުރިއަށްދާ ރައްޔިތުންގެ މަޖިލީހުގެ ޖަލްސާގައި އެ މަޝްރޫއުއާ ގުޅޭ ސުވާލު ކުރެއްވީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) އެވެ. މަޝްރޫއު ލަސްވާ ސަބަބާ ގުޅޭގޮތުން ސުވާލުކުރުމުން މުއްތަލިބު ވިދާޅުވި ގޮތުގައި ލަސްތަކެއް އުޅެނީ ހިލޭ އެހީގައި އެ މަޝްރޫއު ކުރިއަށްގެންްދާތީ އެވެ.
“މިހާރު ގޮސްފައި އޮތް ހިސާބަކީ ފީސަބިލިޓީ ސްޓަޑީގެ މަސައްކަތް ނިންމައި ސާވޭ އެެންޑް ޑިޒައިން ކުރާނެ ބަޔަކު ހޮވުމަށް ޓެންޑާގެ މަސައްކަތް މިހާރު ނިމިފައި ވަނީ. މި މެއި މަހުގެ ތެރޭގައި ސާވޭ ޑިޒައިން ކުރުމަށްޓަކައި އެ ޓީމު މިކޮޅަށް އަންނާނެ،” މުައްތަލިބި ވިދާޅުވި އެވެ.
އެ މަސައްކަތް ނިމުމާއެކު މަގު ހަދާނެ ކުންފުންޏެއް ހޯދުމުގެ މަސައްކަތް ޗައިނާއިން ފަށާނެ ކަމަށާއި އަމަލީ މަސައްކަތް ފެށޭނީ ކޮންޓްރެކްޓަރު ހޮވުމުން ކަމަށް އޭނާ ވިދާޅުވި އެވެ.
“މި މަޝްރޫއުގައި ރައީސުލްޖުމްހޫރިއްޔާ އިއުލާން ކުރައްވާފައިވާ ގޮތަށް ކުރިއަށް އެބަދޭ، ޗައިނާ ސަރުކާރުން މަސައްކަތް ކަނޑައަޅާފައިވާ ގޮތަށް ކުރިއަށްގެންދާނެ. ހަމައެއާއެކު މީ ހަމައެކަނި ޗައިނާގެ ހިލޭ އެހީއާ ގުޅިފައިވާ ކަމެއް ނޫނޭ،” މުއްތަލިބު ވިދާޅުވި އެވެ.
މާލޭގެ މަގުތަކުގައި ފެންބޮޑުވުމާއި ތަރައްގީނުކޮށް ގިނަދުވަސްވުމުގެ ސަބަބުން ރައްޔިތުންނަށް ގިނަ ދަތިތަކެއް ތަކުރާރުކޮށް ދަނީ ކުރިމަތިވަމުންނެވެ. މި މައްސަލަތައް ހައްލުކުރަން ހިންގާ މަޝްރޫއުގެ އަގު 100 އެތައް މިލިއަން ޑޮލަރަކަށް އަރާނެ ކަމަށް ސަރުކާރުން އޮތީ ކުރިން ހާމަކޮށްފަ އެވެ.
އެ މަޝްރޫއު ކުރިއަށްގެންދާނީ ޗައިނާގެ ހިލޭ އެހީގައި ކަމަށް މުހައްމަދު މުއިއްޒު ހާމަކުރެއްވީ 2024 ވަނަ އަހަރުގެ ރައްޔިތުންގެ މަޖިލީހުގެ ކެމްޕޭން ތެރޭގަ އެވެ.
މި މަޝްރޫއުގެ ފީސަބިލިޓީ ބެލުމަށް ޓީމެއް ރާއްޖެ އައީ ނޮވެމްބަރު 2024، ގަ އެވެ. އެ ދިރާސާ ހަމަ އެ މަހުގެ ތެރޭގައި ނިމިފައިވާކަން ސަރުކާރުން އޮތީ ހާމަކޮށްފަ އެވެ.
