މިދިޔަ ހޯމަ ދުވަހު ތުރުކީ އާއި ސީރިއާ ގުޅޭ ސަރަހައްދަށް އައި ބިންހެލުމުގައި މަރުވި މީހުންގެ އަދަދު 11،000 އަށްވުރެ މައްޗަށް އަރައިފި އެވެ.
ބިންހެލުމުގެ ސަބަބުން ތުރުކީ އާއި ސީރިއާގެ އެތައް ހާސް އިމާރާތްތަކެއް ބިމާ ހަމަވެ، އިމާރާތްތަކުގެ ތެރޭގައި މީހުން ތާށިވެފައި އެބަތިއްބެވެ. އެ ކުނިތަކާއި ފަރުބަދަތަކުގެ ދަށުގައި ވަޅުލެވިފައި ތިބި މީހުން ހޯދުމުގެ މަސައްކަތް ދެ ގައުމުގެ ވެސް ރެސްކިއު ޓީމުތަކުން ދަނީ ކުރަމުންނެވެ.
ބިންހެލުމުގެ އަސަރު އެންމެ ބޮޑަށް ކުރި ތުރުކީގެ އެއް ސަރަހައްދަށް ވަޑައިގެން އެގައުމުގެ ރައީސް ތައްޔިބް އުރްދުގާން ވިދާޅުވީ ބިންހެލުމުގައި އެގައުމުގެ 8،574 މީހުން މަރުވެފައިވާ ކަމަށެވެ. އޭގެ އިތުރުން ސީރިއާ ސަރުކާރާއި، އެ ގައުމުގައި ހަރަކާތްތެރިވާ ރެސްކިއު ޓީމުތަކުން ދީފައިވާ މައުލޫމާތުތަކުން އެނގޭ ގޮތުގައި ސީރިއާއިން ވެސް ވަނީ 2،530 އަށްވުރެ ގިނަ މީހުން މަރުވެފަ އެވެ.
އެހެންކަމުން މި ކާރިސާގައި މަރުވި މީހުންގެ ޖުމްލަ އަދަދު 11،000 އަށްވުރެ މައްޗަށް ވަނީ އަރާފަ އެވެ.
މި ކާރިސާގައި ގިނަ އަދަދެއްގެ މީހުން މަރުވެފައިވާއިރު، އިމާރާތްތަކުގެ ދަށުގައި ތާށިވެފައި ތިބި މީހުން ސަލާމަތް ކުރުމުގައި ގޮންޖެހުންތަކާ ދަނީ ކުރިމަތިލަމުންނެވެ. އެގޮތުން ފިނި މޫސުމުގެ ސަބަބުން، ބައެއް ސަރަހައްދުތަކުގެ ފިނިހޫނުމިން ވަނީ 4- ޑިގްރީ ސެލްސިއަސްއަށް ވެއްޓިފަ އެވެ.
ފިނީގެ އިތުރުން ހޯމަދުވަހުގެ ރެކްޓާ މިންގަނޑުން 7.8 މެގްނިޓިއުޑުގެ ބާރުގަދަ ބިންހެލުމަށްފަހު ސީރިއާ އަދި ތުރުކީ އަށް އައިސްފައިވާ އެކިވަރު ލޮޅުންތަކުގެ ސަބަބުންވެސް މީހުން ސަލާމަތް ކުރުމަށް ކުރަމުންދާ މަސައްކަތްތަކަށް ވަނީ އެކިވަރުގެ ހުރަސްއެޅިފަ އެވެ. އެގޮތުން ބިންހެލުމަށްފަހު 150 އަށްވުރެ ގިނަ ބޮޑެތި ލޮޅުންތައް ވަނީ ރެކޯޑުކުރެވިފަ އެވެ. މީގެ ސަބަބުން އިމާރާތްތަކުގެ ދަށުވެފައިވާ މީހުންނާއި ރެސްކިއު ޓީމުތަކަށްވެސް ވަނީ ނުރައްކާ ކުރިމަތިވެފަ އެވެ.
ދުނިޔޭގެ ސިއްހީ ވުޒާރާއިން ލަފާކުރާ ގޮތުގައި މި ބިންހެލުމުގެ ސީދާ އަސަރު 23 މިލިއަން މީހުންނަށް ކުރާނެ އެވެ. އަދި މަރުވާ މީހުންގެ އަދަދު 20،000 އަށް އަރާނެ ކަމަށް ކުރިން ލަފާކުރި ނަމަވެސް ފިނީގެ ސަބަބުން ރެސްކިއު ޓީމުތަކަށް ދިމާވާ ދަތިތަކުގެ ސަބަބުން އެ އަދަދު އިތުރުވާނެ ކަމަށް ބެލެވޭ ކަމަށް ޑަބްލިއުއެޗްއޯ އިން ވަނީ ބުނެފަ އެވެ.
