ހޯމަ ދުވަހު ފަތިހު ސީރިއާ އަދި ތުރުކީ ގުޅޭ ސަރަހައްދަށް އައި ބިންހެލުމުގައި ގެއްލިގެން ހޯދަމުންދާ މީހުން އަދި އިމާރާތްތަކުގެ ދަށުވެފައިވާ މީހުން ސަލާމަތް ކުރުމަށް ފިނި މޫސުމުގެ ސަބަބުން ބޮޑެތި އުނދަގޫތަކެއް ކުރިމަތިވަމުންދާ ކަމަށް ރިޕޯޓުތައް ބުނެފި އެވެ.
މައުލޫމާތު ލިބިފައިވާ ގޮތުގައި ބިންހެލުން އައި ދުވަހު އެ ސަރަހައްދުގެ ފިނިހޫނުމިން ހުރީ 4- ޑިގްރީ ސެލްސިއަސްގަ އެވެ. މި އަހަރުގެ ފިނި މޫސުން ވެގެންގޮސްފައިވަނީ މެދުއިރުމަތީގެ ގިނަ ގައުމުތަކަށް ރެކޯޑު މިންވަރަކަށް ފިނި މޫސުމަކަށެވެ.
ފިނީގެ އިތުރުން ހޯމަދުވަހުގެ ރެކްޓާ މިންގަނޑުން 7.8 މެގްނިޓިއުޑުގެ ބާރުގަދަ ބިންހެލުމަށްފަހު ސީރިއާ އަދި ތުރުކީ އަށް އައިސްފައިވާ އެކިވަރު ލޮޅުންތަކުގެ ސަބަބުންވެސް މީހުން ސަލާމަތް ކުރުމަށް ކުރަމުންދާ މަސައްކަތްތަކަށް ވަނީ އެކިވަރުގެ ހުރަސްއެޅިފަ އެވެ. އެގޮތުން ބިންހެލުމަށްފަހު 150 އަށްވުރެ ގިނަ ބޮޑެތި ލޮޅުންތައް ވަނީ ރެކޯޑުކުރެވިފަ އެވެ. މީގެ ސަބަބުން އިމާރާތްތަކުގެ ދަށުވެފައިވާ މީހުންނާއި ރެސްކިއު ޓީމުތަކަށްވެސް ވަނީ ނުރައްކާ ކުރިމަތިވެފަ އެވެ.
ދުނިޔޭގެ ސިއްހީ ވުޒާރާއިން ލަފާކުރާ ގޮތުގައި މި ބިންހެލުމުގެ ސީދާ އަސަރު 23 މިލިއަން މީހުންނަށް ކުރާނެ އެވެ. އަދި މަރުވާ މީހުންގެ އަދަދު 20،000 އަށް އަރާނެ ކަމަށް ކުރިން ލަފާކުރި ނަމަވެސް ފިނީގެ ސަބަބުން ރެސްކިއު ޓީމުތަކަށް ދިމާވާ ދަތިތަކުގެ ސަބަބުން އެ އަދަދު އިތުރުވާނެ ކަމަށް ބެލެވޭ ކަމަށް ޑަބްލިއުއެޗްއޯ އިން ވަނީ ބުނެފަ އެވެ.
ބިންހެލުމަށް މިހާރު 48 ގަޑިއިރު ވެފައިވާއިރު ދެ ގައުމުން މަރުވި މީހުންގެ އަދަދު ވަނީ 8،000 އަށް އަރާފަ އެވެ. އަނިޔާވި މީހުންގެ އަދަދު މިހާރު ހުރީ 40،000 އަށްވުރެ މަތީގަ އެވެ.
ގިނަ އަދަދެއްގެ ބަޔަކު އަދިވެސް އިމާރާތްތަކުގެ ދަށުގައި ތާށިވެފައިވާއިރު އެކި ގައުމުތަކުން އަންނަނީ ސީރިއާ އަދި ތުރުކީއަށް އެހީތެރިކަން ފޯރުކޮށްދެމުންނެވެ. އެގޮތުން ނޭޓޯއިން މިއަދު 1،400 އެމަޖެންސީ ރެސްޕޮންސް އޮފިސަރުން މިއަދު ތުރުކީއަށް ފޮނުވާނެ އެވެ. އެމެރިކާގެ ރެސްކިއު ޓީމުތައްވެސް މިއަދު މެންދުުރު ފަހު ތުރުކީއަށް ދިއުމަށް ވަނީ ހަމަޖެހިފަ އެވެ.
