ހޯމަ ދުވަހު ފަތިހު ސީރިއާ އަދި ތުރުކީ ގުޅޭ ސަރަހައްދަށް އައި ބިންހެލުމުގައި ބިމާހަމަވި އިމާރާތެއްގެ ދަށުގައި ތާށިވި އަންހެނަކު ވިހެއުމަށް ފަހު މަރުވެއްޖެ އެވެ.
މި ހާދިސާ ހިނގާފައިވަނީ ސީރިއާގެ ހަލަބުގަ އެވެ. އެ އަންހެން މީހާ ވިހޭ ތުއްތު ކުއްޖާ އިމާރާތުގެ ދަށުން ނެގުނު ނަމަވެސް، އަވަސް ފަރުވާދޭ ޓީމުތަކަށް އަންހެން މީހާއާ ހަމައަށް ފޯރުމުގެ ކުރިން ވަނީ ދުނިޔެ ދޫކޮށްފަ އެވެ.
ތުއްތު އަންހެން ކުއްޖާއަށް އަވަަސް ފަރުވާދީފައިވާ ކަމަށާއި މިހާރު ހާލު ރަނގަޅު ކަމަށްވެސް ރިޕޯޓުތައް ބުނެ އެވެ. ނަމަވެސް އެ ކުއްޖާގެ އާއިލާގެ އެއްވެސް ފަރާތެެއް މިހާތަނަށް ދިރި ތިއްބާ ހޯދިފައިނުވާ ކަމަށްވެސް މައުލޫމާތު ލިބެ އެވެ. ސީރިއާގެ އޮފިޝަލުން މައުލޫމާތު ދޭ ގޮތުގައި އެ އާއިލާގެ ހުރިހާ މެންބަރުން މި ބިންހެލުމުގައި މަރުވެފައިވާ ކަމަށް ބެލެވެ އެވެ.
ބިންހެލުމުގައި މިހާތަނަށް ދެ ގައުމުން މަރުވި މީހުންގެ އަދަދު 5،000 އިން މައްޗަށް އަރާފައިވާއިރު، މި އަދަދު 20،000 އަށް އަރާނެ ކަމަށް ބެލެވޭ ކަމަށް ދުނިޔޭގެ ސިއްހަތު ޖަމިއްޔާ، ޑަބްލިޔޫއެޗްއޯއިން ވަނީ ބުނެފަ އެވެ. އަދި ބިންހެލުމަށް 48 ގަޑިއިރު ވެފައިވާއިރު އިމާރާތްކަގެ ދަށުގައި ތިރި ތިއްބާ މީހުން ހޯދުމުގެ ފުރުސަތު ކުޑަ ކަމަށާއި މީހުން ހޯދުމުގެ މަސައްކަތުގެ ވަގުތު ފާއިތުވަމުންދާ ކަމަށް އެކަމުގައި ހަރަކާތްތެރިވަމުންދާ ޓީމުތަކުން އަންނަނީ ބުނަމުންނެވެ.
ތުރުކީއަކީ މިހާރު ދުނިޔޭގައި އެންމެ ގިނަ އަދަދެއްގެ ރެފިޔުޖީއިން ތިބި ގައުމެވެ. ހޯމަ ދުވަހުގެ ބިންހެލުން އައިސްފައިވަނީ 3.3 މިލިއަން ރެފިޔުޖީން ތިބި އެ ގައުމުގައި އެންމެ ގިނަ ރެފިޔުޖީ ކޭމްޕުތައް ހުރި ސަރަހައްދަށެވެ. ހަނގުރާމައިގެ ސަބަބުން ސުންނާފަތިވެފައިވާ ސީރިއާގައި މި ބިންހެލުމުގެ ސަބަބުން ގިނަ ބަޔަކު ހާލުގައި ޖެހި، އެހީތެރިކަން ލިބުމަށް ދަތިވާނެ ކަމަށް ބެލެވޭ ކަމަށްވެސް ގިނަ ރިޕޯޓުތަކުން އަންނަނީ ބުނަމުންނެވެ.
ހޯމަ ދުވަހު އެ ސަރަހައްދަށް އައި ރެކްޓާ މިންގަނޑުން 7.8 މެގްނިޓިއުޑުގެ ބާރުގަދަ ބިންހެލުމަކީ މި ގަރުނުގާވެސް އެ ސަރަހަށްދަށް އައި އެންމެ ބާރުގަދަ ބިންހެލުން ކަމަށް ތުރުކީގެ މީޑިއާތަކުން ވަނީ ރިޕޯޓުކޮށްފަ އެވެ.
