ހޯމަ ދުވަހު ފަތިހު ސީރިއާ އަދި ތުރުކީ އަށް އައި ބާރުގަދަ ބިންހެލުމުގައި މަރުވި މީހުންގެ އަދަދު 3،000 އަށްވުރެ މައްޗަށް އަރައިފި އެވެ.
ރިޕޯޓުތައް ބުނާގޮތުން މި ބިންހެލުމުގައި ދެ ގައުމުން 2،800 އަށްވުރެ ގިނަ އިމާރާތް ވަނީ ބިމާ ހަމަވެފަ އެވެ. އަދި މި އިމާރާތްތަކުގެ ދަށުގައި ގިނަ ބަޔަކު ތާށިވެފައިވާކަމަށް ބެލެވޭ ކަމަށް ވެސް ތުރުކީގެ މީޑިއާއިން ދަނީ ބުނަމުންނެވެ.
ބިންހެލުމާއެކު ތުރުކީގެ ރައީސް ރަޖަބް ތައްޔިބު އުރުދުގާން ވަނީ އެ ގައުމުގައި ގައުމީ ހިތާމައިގެ ހަތް ދުވަސް އިއުލާންކުރައްވައިފަ އެވެ.
ރެކްޓާ މިންގަނޑުން 7.8 މެގްނިޓިއުޑުގެ ބާރުގަދަ މި ބިންހެލުމަކީ ވޭތުވެދިޔަ ގަރުނުގެ ތެރޭގައި އެ ސަރަހައްދަށް އައި އެންމެ ބާރުގަދަ ބިންހެލުމެވެ. އަދި މި ފަހުގެ ތާރީހެއްގައި ދުނިޔެ ދުށް އެންމެ ބާރުގަދަ އެއް ބިންހުލުންވެސްމެ އެވެ. މި ބިންހެލުމަށްފަހު ދެ ގައުމަށްވެސް ވަނީ އެކި ވަރުގެ ލޮޅުންތައް އައިސްފަ އެވެ.
މި ލޮޅުންތަކާއި ދެ ގައުމަށްވެސް ކުރިމަތިވެފައިވާ ފިނި މޫސުމުގެ ފިނީގެ އަސަރާއެކު ބިންހެލުމުގައި ގެއްލުން ލިބުނު އަދި އަނިޔާވި މީހުންނަށް އެހީތެރިވުމާއި ގެއްލުނު މީހުން ހޯދުމަށް ކުރަމުންދާ މަސައްކަތްތަކަށް ދަނީ ގިނަ ދަތިތަކެއް ކުރިމަތިވަމުންނެވެ.
ތައުޒިޔާގެ މެސުޖުތަކާއެކު ބައިނަލްއަގުވާމީ މުޖުތަމައުން އަންނަނީ ސީރިއާ އަދި ތުރުކީއަށް އެކި ގޮތްގޮތުން އެހީތެރިކަން ފޯރުކޮށްދެމުންނެވެ.
އެގޮތުން ލިބުނު ގެއްލުންތަކުގައި އެހީތެރިވުމަށް ރަޝިއާއިން ވަނީ 300 ސިފައިން ސީރިއާއަށް ފޮނުވާފަ އެވެ. އެމެރިކާއިން ވަނީ ތުރުކީގައި ތިބި އެ ގައުމުގެ ފައުޖުތައް ބިންހެލުމުގެ ކަންކަމުގައި އެހީތެރިވުމަށް ހުސްކޮށް، އިތުރު ޓީމުތައް ތައްޔާރުވަމުން އަންނަ ކަމަށް ވައިޓް ހައުސް އިން ވަނީ ބުނެފަ އެވެ.
ތުރުކީއަކީ މިހާރު ދުނިޔޭގައި އެންމެ ގިނަ އަދަދެއްގެ ރެފިޔުޖީއިން ތިބި ގައުމެވެ. ހޯމަ ދުވަހުގެ ބިންހެލުން އައިސްފައިވަނީ 3.3 މިލިއަން ރެފިޔުޖީން ތިބި އެ ގައުމުގައި އެންމެ ގިނަ ރެފިޔުޖީ ކޭމްޕުތައް ހުރި ސަރަހައްދަށެވެ. ހަނގުރާމައިގެ ސަބަބުން ސުންނާފަތިވެފައިވާ ސީރިއާގައި މި ބިންހެލުމުގެ ސަބަބުން ގިނަ ބަޔަކު ހާލުގައި ޖެހި، އެހީތެރިކަން ލިބުމަށް ދަތިވާނެ ކަމަށް ބެލެވޭ ކަމަށްވެސް ގިނަ ރިޕޯޓުތަކުން އަންނަނީ ބުނަމުންނެވެ.
