މިއަދު މާލޭގައި އިދިކޮޅުންް ކުރިއަށް ގެންދިޔަ މުޒާހަރާ ކަވަރުކުރަމުން ދިޔަ ނޫސްވެރިންތަކަކަށް ފުލުހުން އަނިޔާކުރި ކަމަށް ބުނާ މައްސަލަ ބަލަން ފަށައިފި އެވެ.
މުޒާހަރާގެ ތެރެއިން "ޗެނަލް13"ގެ ދެ ނޫސްވެރިއަކަށް އަނިޔާވި އެވެ. އޭގެއިން އެކަކަށް އޭޑީކޭގައި ފަރުވާ ދިނުމަށް ފަހު އިތުރު ފަރުވާއަށް ލަންކާއަށް ގެންދިއުމަށް ނިންމާފައިވާ ކަމަށް އެ ނޫސްވެރިޔާގެ އާއިލާއިން ބުނެފައި ވެއެވެ.
ފުލުހުން މީޑިއާތަކަށް މިރޭ ކުރި މެސެޖެއްގައި ބުނެފައި މި ހާދިސާގައި ކަން ހިނގާފައިވާ ގޮތުގެ ފުރިހަމަ ރިވިއުއެއް ޕްރޮފެޝަނަލް ސްޓަންޑާޑްސް ކޮމާންޑުން ހަދަމުންދާ ކަމަށެވެ.
މިއަދު ޕްރޮގްރެސިވް ކޯލިޝަނުން ކުރިއަށް ގެންދިޔަ އެއްވުމެއްގައި ދެ ނޫސްވެރިއަކަށް އަނިޔާވެފައި ވުމަކީ ކަންބޮޑުވާ ކަމެއް ކަމަށާއި، ނަމަވެސް މިހާތަނަށް ބެލި ބެލުމުން އެއީ ފުލުހުންގެ ފަރާތުން އެ ނޫސްވެރިންނަށް އަމާޒުކޮށް އަނިޔާ ދިނުމުގެ ނިޔަތުގައި ވެފައިވާ ކަމެއް ކަމަށް ނުބެލެވޭ ކަމަށް ފުލުހުން ބުނެފައި ވެއެވެ.
"އަދި ފުލުހުން މުޒާހަރާ ރޫޅާލުމުގެ އިންޒާރުދީ، ރޫޅާލުމަށް ޝީލްތަކާއެކު ކުރިއަށް ޖެހެމުން ދިޔައިރު އެއްވުމުގެ ބައިވެރިން ނޫސްވެރިންގެ ގައިގައި އަޅައި ކޮއްޕުމާއި ނޫސްވެރިން ޝީލްޑް ތަކުގައި އަޅައި ކޮއްޕުން ފަދަ ކަންކަމުގެ ތެރެއިން އެ ނޫސްވެރިން ވެއްޓިފައިވާކަން ފާހަގަ ކުރަމެވެ." ފުލުހުން ކުރި މެސެޖުގައި ބުނެފައި ވައެވެ.
މިކަމާއި ގުޅިގެން އިދިކޮޅުން ވަނީ އެއީ ސީދާ ފުލުހުން އެ ނޫސްވެރިންނަށް އަމާޒުކޮށް ދީފައިވާ ހަމަލާއެއް ކަމަށް ތުހުމަތުކޮށްފަ އެވެ.
އަދި, ނޫސްވެރިންނަށް ހަމަލާދޭނެ ކަމުގެ އިންޒާރު މީގެ ދެ ހަފްތާއެއްހާ ދުވަސް ކުރިން އެނޫސްވެރިންނަށް ލިބިފައިވާ ކަމަށް ވެސް މިއަދު ބޭއްވި ނޫސްވެރިންގެ ބައްދަލުވުމެއްގައި އިދިކޮޅު ކޯލިޝަނުން ބުނެފައިވެ އެވެ.
