މިއަދު ފަތިހު ތުރުކީ އަދި ސީރިއާއަށް އައި ރެކްޓާ މިންގަނޑުން 7.8 މެގްނިޓިއުޑްގެ ބާރުމިނުގެ ބިންހެލުމުގައި މަރުވި މީހުންގެ އަދަދު 500 އަށްވުރެ މައްޗަށް އަރައިފި އެވެ.
މީގެއިތުރުން ބިންހެލުމުގައި އަނިޔާވި މީހުންގެ އަދަދު 3،000 އަށްވުރެ މައްޗަށް ވަނީ އަރާފަ އެވެ.
ތުރުކީ އަދި ސީރިއާގެ އިދާރާތަކުން މިހާރު ދަނީ ވެއްޓިފައިވާ އިމާރާތްތަކުގެ ދަށުގައި ތާށިވެފައިވާ ފަރާތްތައް ސަލާމަތްކުރުމަށް މަސައްކަތް ކުރަމުންނެވެ. އަދި އަނިޔާވެފައިވާ ފަރާތްތަކަށް ސިއްހީ އެހީ ފޯރުކޮށްދިނުމަށް ދެ ގައުމުގެ ސިއްހީ މަސައްކަތްތެރިން އަދި ސަލާމަތީ ބާރުތަކުންވެސް ދަނީ މަސައްކަތް ކުރަމުންނެވެ.
މަރުވި މީހުންގެ ތެރެއިން ތުރުކީއިން މަރުވެފައިވާ މީހުންގެ އަދަދު މިހާރު ހުރީ 284 ގަ އެވެ. އަނިޔާވި މީހުންގެ އަދަދު މިހާރު ހުރީ 2،300 ގަ އެވެ. ސީރިއާއިން މިހާތަނަށް 237 މީހުން މަރުވެފައިވާއިރު އަނިޔާވި މީހުންގެ އަދަދު އުޅެނީ 650 އިން މަތީގަ އެވެ.
އެމެރިކާގެ ޖިއޮލޮޖިކަލް ސާވޭއިން މައުލޫމާތު ދޭ ގޮތުގައި މިއީ ވޭތުވެދިޔަ 100 އަހަރު އެ ސަރަހައްދަށް އައި އެންމެ ބާރުގަދަ ބިންހެލުމެވެ.
ދުނިޔޭގައި މިހާރު ރެފިއުޖީން އެންމެ ގިނަ ތުރުކީ އަދި ހަނގުރާމައިގެ ސަބަބުން ސުންނާފަތިވެފައިވާ ސީރިއާއަށް މިފަދަ ބިންހެލުމެއް އައުމުން ގިނަ ގައުމުތަކާއި ޖަމްއިއްޔާތަކުން ކަންބޮޑުވުން ފާޅުކުރަމުންނެވެެ. އެގޮތުން ފިނި މޫސުމުގެ މި ދުވަސްވަރު އައި މި ބިންހެލުމުގެ ސަބަބުން ގިނަ ބަޔަކަށް އަނިޔާވެ ގިނަ އަދަދެއްގެ ފުރާނަ ގެއްލިދާނެ ކަމަށް ބެލެވޭ ކަމަށް ކަމާބެހޭ ގިނަ އިދާރާތަކުން ދަނީ ބުނަމުންނެވެ.
ސީރިއާ އަދި ތުރުކީއަށް ކުރިމަތިވެފައިވާ މި ދަތި ހާލަތުގައި ދުނިޔޭގެ ގިނަ ބާރުތަކުގެ ވެރިން އަންނަނީ އެ ދެ ގައުމުގެ ވެރިންނާއި ރައްޔިތުންނަށް ތައުޒިޔާ ދަންނަވަމުންނެވެ. އެގޮތުން އެމެރިކާ، އިންޑިއާ، ޕާކިސްތާނު އަދި ޔޫކްރޭނުން ވަނީ އެ ދެ ގައުމަށް ތައުޒިޔާގެ މެސެޖާއެކު އެހީތެރިކަން ފޯރުކޮށްދޭނެ ކަމަށް ބުނެފަ އެވެ.
