މިދިޔަ އަހަރުގެ ޖެނުއަރީ މަހާ އާޅާބަލާއިރު، މިއަހަރުގެ ޖެނުއަރީ މަހު ރާއްޖޭގެ ފަތުރުވެރިކަން 30 ޕަސަންޓު ކުރިއަށް ޖައްސާލައިފި އެވެ.
ޓޫރިޒަމް މިނިސްޓްރީގެ ތަފާސްހިސާބުތަކުން ދައްކާ ގޮތުގައި، މިދިޔަ އަހަރުގެ ފެބްރުއަރީ އެއް ވަނަ ދުވަހާ ހަމައަށް ރާއްޖެ އައިސްފައި ވަނީ 136،146 ފަތުރުވެރިންނެވެ. ނަމަވެސް މި އަހަރުގެ އެ މުއްދަތުގައި 178،159 ފަތުރުވެރިން ރާއްޖެ ޒިޔާރަތްކޮށްފައި ވެއެވެ.
ކޮވިޑުގެ ކުރިން ރާއްޖޭގެ ފަތުރުވެރިކަން ހުރި މިންވަރަށް އިއާދަވެފައިވާއިރު، މިއަހަރު ރާއްޖޭގެ މާކެޓްގެ އެންމެ ބޮޑު ހިއްސާއެއް އޮތީ ރަޝިޔާގަ އެވެ. އެއަށްފަހު އިންޑިއާ، އިޓަލީ، ޔޫކޭ އަދި ޖާމަނީން ވެސް ގިނަ އަދަދަކަށް ފަތުރުވެރިން އާދެ އެވެ.
މި އަހަރު ރާއްޖެ މާކެޓް އެންމެ ބޮޑު ހިއްސާއެއް އޮތް ރަޝިޔާއިން މިހާތަނަށް ރާއްޖެއަށް 24،154 ފަތުރުވެރިން އައިސްފައި ވެއެވެ.
ފަތުރުވެރިކަން ރަނގަޅުވަމުން އަންނައިރު، ރާއްޖޭގައި އޮޕަރޭޝަނަލް ކެޕޭސިޓީގައި 59،840 އެނދު އެބަހުއްޓެވެ. އޭގެ ތެރޭގައި 168 ރިސޯޓުގެ 41،049 އެނދާއި، 13 ހޮޓެލެއްގެ 1640 އެނދާއި، 880 ގެސްޓްހައުސްއެއްގެ 14،250 އެނދު އަދި 157 ސަފާރީއެއްގެ 2901 އެނދު ހިމެނެ އެވެ.
ރާއްޖޭގެ 116 ރަށެއްގައި ގެސްޓްހައުސް ހިންގަމުންދެ އެވެ. އެގޮތުން، އެންމެ ގިނަިއން ގެސްޓްހައުސްތައް ހިންގަމުން އަންނަ އަތޮޅުތަކަކީ ކ، އއ، އދ އަދި ވ އަތޮޅެވެ.
