ޔޫކްރެއިނަށް އެފް-16 ޖެޓް ފޯރުކޮށް ނުދޭނެ ކަމަށް އެމެރިކާގެ ރައީސް ޖޯ ބައިޑަން ހޯމަ ދުވަހު ވިދާޅުވެއްޖެ އެވެ.
ރަޝިއާ-ޔޫކްރެއިން ހަނގުރާމައަށް އަހަރެއް ވުމަށް ގާތްވެފައިވާއިރު، ޔޫކްރެއިންގެ ޑެޕިއުޓީ ފޮރިން މިނިސްޓަރު އަންދްރީ މެލްނީކް ދާދި ފަހުން ގޮވާލެއްވީ "ހަނގުރާމަ މަތީ ޖެޓުގެ ކޯލިޝަނެއް" އުފައްދައި ރަޝިއާ ބަލިކުރުމަށެވެ. އެ ކޯލިޝަނުން އެމެރިކާގެ އެފް-16 އަދި އެފް35 އާއި ޔޫރޯފައިޓާ ޖެޓާއި، ޓޯނެޑޯ އަދި ފްރާންސްގެ ރަފަލޭސް އާއި ސްވިޑަންގެ ގްރިޕެން ޖެޓުތައް ފޯރުކޮށްދޭން އޭނާ ބާރުއެޅުއްވި އެވެ.
"ނޫން،" ހޯމަ ދުވަހު ވައިޓް ހައުސްގައި ބޭއްވި ބޭއްވި ނޫސްވެރިންގެ ބައްދަލުވުމެއްގައި، އެފް-16 ޔޫކްރެއިންއަށް ފޮނުވާނެތޯ ނޫސްވެރިން ސުވާލުކުރުމުން، އެމެރިކާގެ ރައީސް ބައިޑަން ވިދާޅުވި އެވެ.
މިކުރު ޖަވާބުން، އެއީ މި ވަގުތަށް އޮތް ނިންމުމެއް ކަމެއް، ނުވަތަ ކުރިއަށް އޮތްތަނުގައި ވެސް އެއްގޮތަކަށް ވެސް އެފަދަ ޖެޓް ފޯރުކޮށް ނުދޭނީ ކަމެއް މުޅީން ސާފެއް ނުވެ އެވެ.
އެންމެ ޒަމާނީ ޓޭންކުތައް ޔޫކްރެއިނަށް ފޯރުކޮށްދޭން އެއްބަސްވުމަށް ފަހު، ހަނގުރާމަ މަތީ ޖެޓުތައް ނުފޮނުވާނެ ކަމަށް ޖަރުމަނުވިލާތުގެ ޗާންސެލަރު އޯލާފް ޝޯލްޒް ވެސް ވަނީ ވިދާޅުވެފަ އެވެ.
އޯލާފް ޝޯލްޒް ވިދާޅުވީ ހަމައެކަނި ވިސްނުމަކީ ޖަރުމަނުގައި އުފައްދާ ލެޕަޑް-2 ޓޭންކުތައް ފޮނުވުން ކަމަށެވެ. ޖަރުމަނުން ޓޭންކު ފޮނުވަން ނިންމުމާ އެކު އެމެރިކާއިން ވެސް ބުނީ އެ ގައުމުގައި އުފައްދާ އެމް1 އަބްރަމްސް ޓޭންކުތައް ފޮނުވާނެ ކަމަށެވެ.
ޔޫކްރެއިނުން ވަނީ ޖެޓު ފޯރުކޮށްދިނުމަށް ހުޅަނގުގެ ގައުމުތަކަށް ގޮވާލައިފަ އެވެ.
