ރާއްޖޭގައި ފުރަތަމަ ފަހަރަށް ހިންގާ ކައުންސެލިން މާސްޓާސް ކޯހުގެ ކިޔެވުން މިއަދު ފަށައިފި އެވެ.
'މާސްޓާސް އޮފް ސައިންސް އިން ކައުންސެލިން' ކޯހުގެ ކިޔެވުން ފަށާފައި ވަނީ މާލޭގައި ހުންނަ ވިލާ ކޮލެޖުގެ ކިއުއައި ކެމްޕަހުގަ އެވެ. މިއީ ރާއްޖޭގައި ކައުންސެލިންއާ ގުޅޭ މާސްޓާސް ޑިގުރީ ޕްރޮގުރާމެއް ފެށި ފުރަތަމަ ފަހަރެވެ.
ދެ އަހަރު ދުވަހުގެ މުއްދަތަށް ކުރިއަށް ގެންދާ އެ ޕުރޮގުރާމުގެ މައިގަނޑު މަގުސަދަކީ މުޖުތަމައުގައި ކައުންސެލިންގެ ހިދުމަތް ބޭނުންވެފައިވާ ފަރާތްތަކަށް އެ ހިދުމަތް ފޯރުކޮށްދޭނެ ގާބިލު މީހުން ބިނާކުރުން ކަމަށް ވިލާ ކޮލެޖުން ބުނެ އެވެ.
އެގޮތުން ކޯހުގެ ބައިވެރިންނަށް ޕްރޮވިޝަނަލް ކައުންސިލާ ލައިސެންސު ލިބޭނެ އެވެ.
ވިލާ ކޮލެޖުގައި ހިންގާ ޑިގުރީ ޕުރޮގުރާމުގައި ކިޔަވާ ދަރިވަރުން -- ފޮޓޯ: ވިލާ ކޮލެޖު
ވިލާ ކޮލެޖުގެ އޮފިޝަލް ވިދާޅުވީ، އެ ޕުރޮގުރާމު ފުރިހަމަކުރާ ދަރިވަރުންނަކީ މުޖުތަމައުގައި ހުރި އެކި ކަންކަމަށް ވަކި އުސޫލެއްގެ ދަށުން ކައުންސެލިން ފޯރުކޮށްދޭނެ ޕްރޮފެޝަނަލް ކައުންސެލަރުން ކަމުގައި ވެގެންދާނެ ކަމަށާއި އެ ކޯސް ފުރިހަމަ ކުރުމާ އެކު އެ ދަރިވަރުންނަށް ޕްރޮވިޝަނަލް ކައުންސިލާ ލައިސެންސު ލިބޭނެ ކަމަށެވެ.
އެ ކޯސް ފުރިހަމަ ކުރުމަށްފަހު އެލައިޑް ހެލްތު ކައުންސިލްގެ ގަވާއިދުގެ ދަށުން 500 ގަޑި ހަމަކުރުމުން ލައިސަންސްޑު ކައުންސިލަރުންނަށް ވެގެންދާނެ އެވެ.
ރާއްޖޭގެ މާހައުލާ ވެސް ގުޅޭ ގޮތަށް ފަރުމާކޮށްފައިވާ އެ ޕުރޮގުރާމުގައި ކިޔަވައިދޭ ބައެއް މާއްދާތައް:
- ތިއަރީސް އޮފް ކައުންސެލިން އެންޑު ސައިކޮތެރަޕީ
- ހިއުމަން ޑިވެލޮޕްމަންޓް އެންޑް ލައިފް ސްޕޭން
- ކައުންސެލިން ޓެކްނިކްސް
- އެތިކްސް އިން ކައުންސެލިން
- ސައިކޮޕެތަލޮޖީ އެންޑު ޑިފަރެންޝަލް ޑައިގްނޯސިސް
- ޗައިލްޑް އެންޑް އެޑޮލެސެންޓް ސައިކޮޕެތަލޮޖީ
- ޖެރިއެޓިކް ކައުންސެލިން
އަދި މީގެއިތުރުން އެ ޕުރޮގުރާމުގެ ބައެއް މާއްދާތައް ސިމިއުލޭޝަން ބޭސްޑު ލާނިން އާއެކު ކުރިއަށް ގެންދެވޭނެ ކަމަށް ވިލާ ކޮލެޖުން ބުނެ އެވެ.
އެ ޕުރޮގުރާމުގައި ކިޔަވައި ދެއްވުމަށް ހަމަޖެހިފައި ވަނީ، ރާއްޖޭގެ އިތުރުން ސްރީލަންކާ އަދި މެލޭޝިޔާގެ، ކަމުގެ ފަންނީ އަދި ތަޖުރިބާ ލިބިލައްވާފައިވާ ޕުރޮފެސަރުންނާއި ޕީއެޗްޑީ އަދި މާސްޓާސް ޑިގުރީ ފެންވަރުގެ ލެކްޗަރާއިންނެވެ.
އެ ޕުރޮގުރާމާ ބެހޭ އިތުރު މައުލޫމާތު ވިލާ ކޮލެޖުގެ ވެބްސައިޓުން ލިބޭނެކަމަށް އެ ކޮލެޖުން ބުނެ އެވެ.
