ލަންޑަން (ޖެނުއަރީ 24) - އިނގިރޭސި ޕްރިމިއާ ލީގުގައި އާދިއްތަ ދުވަހުގެ ރޭ އާސެނަލް އަތުން މެންޗެސްޓާ ޔުނައިޓެޑް 3-2 އިން ބަލިވުމުން ޔުނައިޓެޑްގެ ކުރީގެ ލެޖެންޑް ޑޭވިޑް ބެކަމް އަށް އޭނާގެ ދަރިފުޅު، ރޮމެއޯ "މަލާމާތް"ކޮށްފި އެވެ.
މެންޗެސްޓާ ޔުނައިޓެޑް އަތުން ފަހު ވަގުތު ލަނޑުޖަހައިގެން މޮޅުވެ އާސެނަލް މި ވަގުތު އޮތީ އިނގިރޭސި ލީގު ތާވަލްގެ އެއް ވަނައިގައި ފަސް ޕޮއިންޓުގެ ލީޑަކާ އެކުގަ އެވެ. އާސެނަލް އަށް 50 ޕޮއިންޓް ލިބިފައިވާއިރު 39 ޕޮއިންޓާ އެކު ޔުނައިޓެޑް އޮތީ ތާވަލްގެ ހަތަރު ވަނައިގަ އެވެ.
ޕްރިމިއާ ލީގުގެ ވާދަވެރި ދެ ޓީމްގެ ކުރިމަތިލުމަށް ފަހު ސޯޝަލް މީޑިއާގައި ދެ ޓީމްގެ ކުރީގެ ކުޅުންތެރިންނާ ސަޕޯޓަރުން އެކި ޝުއޫރުތައް ފާހަގަކުރަމުން ދިޔައިރު އެންމެ ބޮޑު ސަމާލުކަމެއް ލިބުނީ ޔުނައިޓެޑްގެ ކުރީގެ ކެޕްޓަން ޑޭވިޑް ބެކަމްގެ ދަރިފުޅު ރޮމެއޯ ބެކަމް ކުރި ޕޯސްޓެކަށެވެ.
ރޮމެއޯގެ އިންސްޓަގްރާމްގައި އޭނާގެ ބައްޕަ (ބެކަމް)އާ އެކު ނަގާފައިވާ ސެލްފީއާ އެކު ކުރި ޕޯސްޓްގައި އޮތީ "ބައްޕަ ރަނގަޅަށް ނިދާލައްޗޭ" މިހެންނެވެ.
އާސެނަލްގެ އެމިރޭޓްސް ސްޓޭޑިއަމްގެ ބޭރުގައި ނެގި މި ސެލްފީއަށް ގިނަ ބައެއްގެ ސަމާލުކަން ލިބެމުން އަންނައިރު އަމިއްލަ ދަރިފުޅު ބައްޕަ އަށް މިގޮތަށް ސަމާސާކުރުމުން އެ ކަމަށް ވެސް ގިނަ ބަޔަކު އަންނަނީ ޝުއޫރު ފާޅުކުރަމުންނެވެ. ބެކަމްގެ ދެ ބަފައިން މެޗު ބަލަން، އާސެނަލްގެ އެމިރޭޓްސް ސްޓޭޑިއަމަށް ވެސް ވަނެވެ. އަދި މެޗު ކުރިއަށްދިޔައިރު ދަނޑުގެ ވީއައިޕީ ބޮކްސްގައި ދެ މީހުން ތިއްބައި، ކެމެރާތަކުން ވެސް ދެއްކި އެވެ.
ޔުނައިޓެޑްގެ ކުރީގެ ތަރި ބެކަމްގެ ތިން ފިރިހެން ކުދިންގެ ތެރެއިން މެދަށް ހުންނަ ރޮމެއޯ އާސެނަލް އަށް ސަޕޯޓްކުރި ނަމަވެސް އޭނާގެ ދެން ތިބި ދެ ކުދިން ސަޕޯޓްކުރަނީ ޔުނައިޓެޑަށެވެ. ރޮމެއޯ އަކީ ކުޑައިރުސުރެ އާސެނަލްގެ ސަޕޯޓަރެކެވެ. ތިން ކުދިންވެސް ވަނީ އާސެނަލްގެ އެކަޑެމީގައި ތަމްރީންވެފަ އެވެ. އޭގެ ތެރެއިން އެންމެ ދޮށީ ދަރިފުޅު ބްރޫކްލީން ވަނީ އާސެނަލްގެ 16 އަހަރުން ދަށުގެ ޓީމަށް ވެސް ކުޅެފަ އެވެ.
ރޮމެއޯ އާސެނަލް އަށް ސަޕޯޓްކުރި ސަބަބުގެ ގޮތުގައި ބެކަމް ބުނަނީ އާސެން ވެންގާ އެވެ.
"އަހަރެން ރޮމެއޯ ކުޑައިރު އާސެނަލް މެޗެއް ބަލަން އައިން ދަނޑަށް. އެ ފަހަރު ވެންގާ ވަނީ ރޮމެއޯއާ ވާހަކަދައްކައި އޭނާގެ ފޭވަރިޓު ނަންބަރު ޖަހާފައި ނަން ޖަހާފައި އިން ޖާޒީއެއް ވެސް ދީފައި. އޭގެ ފަހުން ރޮމެއޯ ވަރަށް ސަޕޯޓްކުރޭ އާސެނަލް އަށް" ބެކަމް ބުންޏެވެ.
ބެކަމް ދެކޭ ގޮތުގައި ރޮމެއޯ އާސެނަލް އަށް ސަޕޯޓްކުރުމަކީ މައްސަލައެއް ނޫނެވެ. ބެކަމް ކުޅުނު ކުލަބަކަށް އޭނާގެ ދަރިން ސަޕޯޓްކުރުން މަޖުބޫރެއް ނޫން ކަމަށް ވެސް ވަނީ ބުނެފަ އެވެ.
ރޮމެއޯ މި ވަގުތު ކުޅެމުން އަންނީ އިނގިރޭސި ޕްރިމިއާ ލީގުގެ ބްރެންޓްފޯޑްގެ ރިޒާވް ޓީމަށެވެ. ހަ މަސްދުވަހުގެ ލޯން އެއްބަސްވުމެއްގެ ދަށުން އޭނާ ރިޒާވް ޓީމަށް މިހާތަނަށް ކުޅުނު ހަމައެކަނި މެޗަކީ ލަންޑަން ސީނިއާ ކަޕްގައި ކުޅުނު މެޗެވެ. މި މެޗު ބެލުމަށް ރެކޯޑް އަދަދަކަށް ސަޕޯޓަރުން ވަނީ ދަނޑަށް ވަދެފަ އެވެ.
